ଏମିତି ଗଢ଼ା ଯାଉଛି ବଣ୍ଡା ପିଲାଙ୍କ ଭବିଷ୍ୟତ: ସ୍କୁଲ୍‌ର ଛପର ନାହିଁ, ହଷ୍ଟେଲ୍‌ରେ ଚାଲିଛି କ୍ଲାସ୍‌

ମାଲକାନଗିରି (ଜିତେନ୍ଦ୍ର ବେଉରା): ବଣ୍ଡାମାନଙ୍କୁ ସମାଜର ମୁଖ୍ୟସ୍ରୋତରେ ସାମିଲ କରିବାକୁ ସରକାର ବହୁତ ଯୋଜନା କରିଛନ୍ତି। ତେବେ ମାଲକାନଗିରି ଜିଲ୍ଲା ମୁଦୁଲିପଡ଼ାରେ ବଣ୍ଡା ପିଲାଙ୍କ ପାଇଁ ଥିବା ସ୍କୁଲ୍‌ର ଅବସ୍ଥା ଦେଖିଲେ ଏହା ସ୍ପଷ୍ଟ ଭାବେ ଜାଣି ହେଉଛି ଯେ ଏମାନଙ୍କୁ ମୁଖ୍ୟସ୍ରୋତରେ ସାମିଲ କରିବା ପାଇଁ ସରକାର ପ୍ରକୃତରେ କେତେ ତତ୍ପର।

malkangiriମୁଦୁଲିପଡ଼ା ସ୍ଥିତ ବଣ୍ଡାଘାଟିରେ ଥିବା ସ୍କୁଲ୍‌ର ଛାତ ଉଡ଼ିଯାଇଛି। ଏତେତେଣେ ପଡ଼ି ରହିଛି ଆଜ୍‌ବେଷ୍ଟସ୍‌। ଗତ ମେ’ ମାସରୁ ସ୍କୁଲ୍‌ର ଏମିତି ଅବସ୍ଥା ହୋଇଛି। କାଳବୈଶାଖୀ ବର୍ଷାରେ ଉଡ଼ି ଯାଇଥିଲା ସ୍କୁଲ୍‌ର ଛାତ।  ଏହା ମଧ୍ୟରେ ଦୁଇ ମାସ ବିତିଯାଇଛି। ହେଲେ ମରାମତି ହୋଇପାରିନି। ଫଳରେ ବାଧ୍ୟ ହୋଇ ହଷ୍ଟେଲ୍‌ରେ ପିଲାଙ୍କୁ ପାଠପଢ଼ା ଯାଉଛି।

malkangiriହଷ୍ଟେଲ୍‌ ଅବସ୍ଥା ବି କିଛି ଭଲ ନାହିଁ। ବର୍ଷା ହେଲେ କଥା ସରିଲା। ବର୍ଷା ହେଲେ ଛାତରୁ ପାଣି ଗଳେ ଓ ପାଠପଢ଼ାରେ ବାଧା ସୃଷ୍ଟି ହୁଏ। ହଷ୍ଟେଲ୍‌ରେ ରହୁଥିବା ପିଲାଏ ଏଥିପାଇଁ ବହୁତ ହଇରାଣ ମଧ୍ୟ ହେଉଛନ୍ତି।

ନରେଶ କିର୍ସାନୀ ନାମକ ଜଣେ ଛାତ୍ର କହିଛନ୍ତି,“ବର୍ଷା ହେଲେ ହଷ୍ଟେଲ୍‌ ଘରେ ପାଣି ପଶିଯାଉଛି। ତେଣୁ ପାଠ ପଢ଼ା ଠିକ୍‌ରେ ହୋଇପାରୁନି।”

ଅନ୍ୟ ଜଣେ ଛାତ୍ର ସୋମନାଥ ମୁଦୁଲି କହିଛନ୍ତି, “ଶ୍ରେଣୀଗୃହର ଅବସ୍ଥା ଭଲ ନାହିଁ। ହଷ୍ଟେଲ୍‌ରେ ବି ରହିବାକୁ ବହୁ ସମସ୍ୟା ହେଉଛି। ଜାଗା ହେଉ ନଥିବାରୁ ବହୁତ କଷ୍ଟରେ ରହୁଛୁ।”

ଶିକ୍ଷକ ଶିବ ପ୍ରସାଦ ନାୟକ କହିଛନ୍ତି, “ଘରୁ ପାଣି ଗଳୁଛି। ଗୋଟିଏ ନଳକୂପ ଥିବାରୁ ସମସ୍ୟା ହେଉଛି। ପିଲାମାନେ ରହିବାକୁ ହଷ୍ଟେଲ୍‌ରେ ଆବଶ୍ୟକ କୋଠରୀ ନାହିଁ। ଉଚ୍ଚ କର୍ତ୍ତୃପକ୍ଷଙ୍କୁ ଅବଗତ କରିଛୁ। ସେ ଯାହା ପଦକ୍ଷେପ ନେବେ।”

ମାଲକାନଗିରି ଉପଜିଲ୍ଲାପାଳ ଲିଙ୍ଗରାଜ ପଣ୍ଡା କହିଛନ୍ତି, “ମୁଦୁଲିପଡ଼ା ସ୍କୁଲର ମରାମତି ପାଇଁ ବିଜୁ କେବିକେ ଯୋଜନାରେ ଅର୍ଥ ବରାଦ ହୋଇଛି। ଖୁବ୍‌ଶୀଘ୍ର ଏହାର ମରାମତି କରାଯିବ।”