ସୋର (ଶଶୀକାନ୍ତ ବେହେରା): ନାଳରେ ଭାସୁଛି ସାର୍କର ମୃତଦେହ। ସମୁଦ୍ରକୁ ସଂଯୋଗ କରୁଥିବା ନାଳରେ ସାର୍କର ମୃତଦେହ ଦେଖିବାକୁ ମିଳିଛି। ଏହି ଖବର ପ୍ରଚାରିତ ହେବାରେ ସେଠାରେ ଲୋକଙ୍କ ଭିଡ଼ ଲାଗି ରହିଛି।
ବାଲେଶ୍ୱର ଜିଲ୍ଲା ସୋର ଥାନା ଶ୍ରୀଜଙ୍ଗ ପଞ୍ଚାୟତ କଣ୍ଟିଆଚେରା ନାଳ ସୁଟିଂପାହି ନିକଟରେ ସାର୍କର ମୃତଦେହଟି ପଡ଼ିଥିଲା। ରବିବାର ସକାଳେ ସ୍ଥାନୀୟ ଲୋକେ ଦେଖିବାକୁ ପାଇଥିଲେ। ମୃତ ସାର୍କର ଓଜନ ୫ କ୍ୱିଣ୍ଟାଲ୍ରୁ ଅଧିକ ହେବ। ଏହାର ଲମ୍ୱ ୧୦ ଫୁଟ୍ ହେବ। ସାର୍କଟି ନାଳକୁ କେମିତି ଆସିଲା, ତାହା ଜଣାପଡ଼ି ନାହିଁ।
ସ୍ଥାନୀୟ ଲୋକଙ୍କ କହିବା ଅନୁସାରେ ମତ୍ସ୍ୟଜୀବୀମାନେ ସମୁଦ୍ରକୁ ମାଛ ମାରିବାକୁ ଯାଆନ୍ତି। ଗଭୀର ସମୁଦ୍ରରେ ମାଛ ମାରିବା ବେଳେ ଭୁଟ୍ଭୁଟି ମାଡ଼ରେ ସାର୍କଟି ଆହତ ହୋଇଥିଲା। ପରେ ମତ୍ସ୍ୟଜୀବୀମାନେ ଆହତ ସାର୍କକୁ ଆଣି କୂଳରେ ଛାଡ଼ିଥିବା ଆଲୋଚନା ହେଉଛି। ସମୁଦ୍ର କୂଳରେ ସାର୍କ ପଡିଥିବା ଦେଖି ଛୋଟ ପିଲାମାନେ ନାଳକୁ ଟାଣିଆଣିଥିବା ଚର୍ଚ୍ଚା ହେଉଛି। ହେଲେ ବର୍ତ୍ତମାନ ସୁସ୍ଥା ବନ ବିଭାଗର କୌଣସି ଅଧିକାରୀ ସେଠାରେ ପହଞ୍ଚି ନଥିବା ଜଣାପଡ଼ିଛି।
ସୂଚନାରୁ ପ୍ରକାଶ, ଏହା ପୂର୍ବରୁ ତାଳପଦାରେ ଏକ ବିରାଟକାୟ ସାର୍କର ମୃତଦେହ ଦେଖିବାକୁ ମିଳିଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
