ଏଣିକି ପ୍ରତି ୫ବର୍ଷରେ ସୋସାଇଟି ନବୀକରଣ, ବାର୍ଷିକ ଅଡିଟ୍ ରିପୋର୍ଟ ନଦେଲେ ରଦ୍ଦ ହେବ ପଞ୍ଜିକରଣ

ଭୁବନେଶ୍ୱର(ଓଡ଼ିଶା ରିପୋର୍ଟର): ରାଜ୍ୟରେ ସୋସାଇଟି ଆକ୍ଟ ବଳରେ ପଞ୍ଜିକୃତ ହୋଇ ଅନେକ ଚିଟଫଣ୍ଡ ସଂସ୍ଥା ଲୋକଙ୍କଠୁ କୋଟି କୋଟି ଟଙ୍କା ଲୁଟ୍ କରିବାର ଦୀର୍ଘ ଦଶନ୍ଧି ପରେ ରାଜ୍ୟ ସରକାରଙ୍କ ଚେତା ପଶିଛି। ଆଜିଠୁ ସଂଶୋଧିତ ସୋସାଇଟି ରେଜିଷ୍ଟ୍ରେସନ ଆକ୍ଟ-୨୦୨୧ କାର୍ଯ୍ୟକାରୀ ହୋଇଛି। ଏହି ସଂଶୋଧିତ ଆଇନ ଅନୁଯାୟୀ ଏଣିକି ସରକାର ସଦସ୍ୟ ନଥିବା ପ୍ରତ୍ୟେକ ସୋସାଇଟିକୁ ପ୍ରତି ୫ବର୍ଷରେ ନବୀକରଣ କରିବାକୁ ପଡ଼ିବ। ଆଉ ବାର୍ଷିକ ଅଡିଟ୍ ରିପୋର୍ଟ ଦାଖଲ କରୁନଥିବା ସୋସାଇଟିର ପଞ୍ଜିକରଣ ମଧ୍ୟ […]

secreatariate

secreatariate

Ordigital Desk
  • Published: Friday, 21 May 2021
  • Updated: 22 May 2021, 11:39 AM IST

Sports

Latest News

ଭୁବନେଶ୍ୱର(ଓଡ଼ିଶା ରିପୋର୍ଟର): ରାଜ୍ୟରେ ସୋସାଇଟି ଆକ୍ଟ ବଳରେ ପଞ୍ଜିକୃତ ହୋଇ ଅନେକ ଚିଟଫଣ୍ଡ ସଂସ୍ଥା ଲୋକଙ୍କଠୁ କୋଟି କୋଟି ଟଙ୍କା ଲୁଟ୍ କରିବାର ଦୀର୍ଘ ଦଶନ୍ଧି ପରେ ରାଜ୍ୟ ସରକାରଙ୍କ ଚେତା ପଶିଛି। ଆଜିଠୁ ସଂଶୋଧିତ ସୋସାଇଟି ରେଜିଷ୍ଟ୍ରେସନ ଆକ୍ଟ-୨୦୨୧ କାର୍ଯ୍ୟକାରୀ ହୋଇଛି। ଏହି ସଂଶୋଧିତ ଆଇନ ଅନୁଯାୟୀ ଏଣିକି ସରକାର ସଦସ୍ୟ ନଥିବା ପ୍ରତ୍ୟେକ ସୋସାଇଟିକୁ ପ୍ରତି ୫ବର୍ଷରେ ନବୀକରଣ କରିବାକୁ ପଡ଼ିବ। ଆଉ ବାର୍ଷିକ ଅଡିଟ୍ ରିପୋର୍ଟ ଦାଖଲ କରୁନଥିବା ସୋସାଇଟିର ପଞ୍ଜିକରଣ ମଧ୍ୟ ରଦ୍ଦ ହୋଇଯିବ।

ଆଜି ରାଜସ୍ୱ ଓ ବିପର୍ଯ୍ୟୟ ପ୍ରଶମନ ବିଭାଗ ପକ୍ଷରୁ ଜାରି ସୂଚନା ଅନୁସାରେ, ରାଜ୍ୟ ଓ ଜିଲ୍ଲାସ୍ତରରେ ସୋସାଇଟିଗୁଡ଼ିକର ଗତିବିଧିର ଉତ୍ତମ ପରିଚାଳନା ଓ ନିୟନ୍ତ୍ରଣ ପାଇଁ ରାଜ୍ୟ ସରକାର ସୋସାଇଟି ରେଜିଷ୍ଟ୍ରେସନ ଆକ୍ଟ-୧୮୬୦ରେ ସଂଶୋଧନ କରିଛନ୍ତି। ଏହି ସଂଶୋଧିତ ରେଜିଷ୍ଟ୍ରେସନ୍ (ଓଡ଼ିଶା ସଂଶୋଧନ) ଆକ୍ଟ-୨୦୨୧ ଆଜିଠୁ ସମଗ୍ର ରାଜ୍ୟରେ କାର୍ଯ୍ୟକ୍ଷମ ହୋଇଛି। ସୋସାଇଟି ଆକ୍ଟରେ ପଞ୍ଜିକୃତ ହୋଇଥିବା ସୋସାଇଟିଗୁଡ଼ିକର ବୈଧତା ଏଣିକି ୫ବର୍ଷ ରହିବ। ପ୍ରତି ୫ବର୍ଷରେ ଏହି ସୋସାଇଟିକୁ ନବୀକରଣ କରିବାକୁ ପଡ଼ିବ।

ଯେଉଁ ସୋସାଇଟିରେ ସରକାର ସଦସ୍ୟ ଥିବେ ସେହି ସୋସାଇଟି ପଞ୍ଜିକୃତ ହେବାପରେ ଆଉ ତା’ର ରେଜିଷ୍ଟ୍ରେସନ ନବୀକରଣର ଆବଶ୍ୟକତା ନାହିଁ। ସୋସାଇଟିଗୁଡ଼ିକୁ ଉତ୍ତରଦାୟୀ କରିବା ନିମନ୍ତେ ସୋସାଇଟିର ଆୟବ୍ୟୟର ଅଡିଟ୍ କରାଯିବ। ଆଉ ବାଲାନ୍ସ ସିଟ୍ ସହ ବାର୍ଷିକ ଅଡିଟ୍ ରିପୋର୍ଟକୁ ସମ୍ପୃକ୍ତ ସୋସାଇଟି ପକ୍ଷରୁ ସମବାୟ ରେଜିଷ୍ଟ୍ରାରଙ୍କ ନିକଟରେ ଦାଖଲ କରିବାକୁ ପଡ଼ିବ। ଅବଶ୍ୟ ଯେଉଁ ସୋସାଇଟିର ବାର୍ଷିକ ଆୟ ଗତ ୩ବର୍ଷ ମଧ୍ୟରେ ହାରାହାରି ୧ଲକ୍ଷ ଟଙ୍କାରୁ କମ୍ ଥିବ ସେହି ସୋସାଇଟି ପାଇଁ ବାର୍ଷିକ ଅଡିଟ୍ ରିପୋର୍ଟ କିମ୍ବା ବାଲାନ୍ସ ସିଟ୍ ଦାଖଲ କରିବା ଅନାବଶ୍ୟକ।

ସେହିପରି ସଂଶୋଧିତ ନିୟମ ଅନୁସାରେ ଏହି ଆଇନ ବଳରେ ପଞ୍ଜିକୃତ ସୋସାଇଟି ନିଜର ପରିଚାଳନା ସଦସ୍ୟ କିମ୍ବା ସାଧାରଣ ସଦସ୍ୟଙ୍କୁ କୌଣସି ପ୍ରକାରର ଆର୍ଥିକ କିମ୍ବା ସାମଗ୍ରୀ ଭାବେ ଫାଇଦା ଦେଇପାରିବେ ନାହିଁ। ସେହିପରି ଯେଉଁ ସୋସାଇଟି ବାଲାନ୍ସ ସିଟ୍ ସହ ନିଜର ବାର୍ଷିକ ଅଡିଟ୍ ରିପୋର୍ଟ ଦାଖଲ ନକରିବେ ତାଙ୍କର ପଞ୍ଜିକରଣ ରଦ୍ଦ ହୋଇଯିବ। ସୋସାଇଟି ଭିତରେ କୌଣସି ବିବାଦ ଥିଲେ ସୋସାଇଟିର ଯେକୌଣସି ସଦସ୍ୟ ସୋସାଇଟି କାର୍ଯ୍ୟାଳୟ ରହିଥିବା ଅଂଚଳର ସିନିୟର ସିଭିଲ୍ ଜଜ୍ କୋର୍ଟରେ ପିଟିସନ୍ ଦାଖଲ କରିପାରିବେ। ଏହି ବହୁପ୍ରତୀକ୍ଷିତ ସଂଶୋଧିତ ଆଇନ ଫଳରେ ରାଜ୍ୟ ସରକାର ଏହାର ଉତ୍ତମ କାର୍ଯ୍ୟକାରିତା ପାଇଁ ରୁଲ୍ ପ୍ରଣୟନ କରିପାରିବେ।

ସୂଚନାଯୋଗ୍ୟ, ରାଜ୍ୟରେ ଦୀର୍ଘବର୍ଷ ୧୦-୧୨ ବର୍ଷ ପୂର୍ବରୁ ସୋସାଇଟି ଆକ୍ଟରେ ପଞ୍ଜିକୃତ ହୋଇଥିବା ଅନେକ ସଂସ୍ଥା ରାଜ୍ୟର ଗରିବ ଲୋକଙ୍କଠୁ ଚିଟଫଣ୍ଡ ନାଁରେ ଅର୍ଥ ସଂଗ୍ରହ କରି ପରବର୍ତ୍ତୀ ଅବସ୍ଥାରେ ଫାଙ୍କି ଦେଇଥିଲେ। ସୋସାଇଟି ଆକ୍ଟରେ ରହିଥିବା ଗଳା ବାଟର ସୁଯୋଗ ନେଇ ସମ୍ପୃକ୍ତ ସଂସ୍ଥାଗୁଡ଼ିକ ଏଭଳି ଜାଲସାଦି କରିବାରେ ସକ୍ଷମ ହୋଇଥିଲେ। ତେବେ ବିଳମ୍ବରେ ହେଲେ ବି ରାଜ୍ୟ ସରକାରଙ୍କ ସଦବୁଦ୍ଧି ଉଦୟ ହୋଇଛି ଓ ନୂଆ ସଂଶୋଧିତ ସୋସାଇଟି ପଞ୍ଜିକରଣ ଆଇନକୁ ଆଜିଠୁ ରାଜ୍ୟରେ କାର୍ଯ୍ୟକାରୀ କରିଛନ୍ତି।

telegram ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।

Related Stories

Trending

Photos

Videos