୨୫ ବର୍ଷ ପରେ ଘରକୁ ଫେରିଲା ପୁଅ

ଦାରିଙ୍ଗିବାଡ଼ି(ଅଜିତ୍ କୁମାର ନାୟକ): ପୁଅକୁ ପାଖରେ ପାଇ ଆତ୍ମବିଭୋର ହୋଇପଡ଼ିଛି ମାଆ। ସାନ ଭାଇ ଓ ଭଉଣୀ ମଧ୍ୟ ବଡ଼ଭାଇକୁ ପାଖରେ ପାଇ ବହୁତ ଖୁସି। ଏହି ଦୃଶ୍ୟ ଦେଖିବାକୁ ମିଳିଛି କନ୍ଧମାଳ ଜିଲ୍ଲା ଦାରିଙ୍ଗବାଡ଼ିରେ।

ଦାରିଙ୍ଗିବାଡିର ତରୁଣ ବିଶୋୟୀ ଦୀର୍ଘ ୨୫ ବର୍ଷ ତଳେ କୌଣସି କାରଣରୁ ରାଗି ଯାଇ ଘର ଛାଡ଼ି ଚାଲି ଯାଇଥିଲେ। ସେ ଘରକୁ ନ ଫେରିବାରୁ ତାଙ୍କ ପରିବାର ଲୋକେ ତାଙ୍କୁ ବହୁ ଖୋଜାଖୋଜି କରିଥିଲେ। ହେଲେ ତାଙ୍କୁ ପାଇ ନଥିଲେ। ଏହି ଦୁଃଖରେ ତରୁଣଙ୍କ ମାଆ ପୂରାପୂରି ଭାଙ୍ଗି ପଡ଼ିଥିଲେ। ହେଲେ ଆଜି ସେ ତାଙ୍କ ପୁଅକୁ ଫେରି ପାଇଛନ୍ତି। ଏମିତିକି ତରୁଣଙ୍କ ସାନ ଭାଇ ବରୁଣ ମଧ୍ୟ ଭାଇକୁ ଦେଖିବା ପାଇଁ ମୁମ୍ୱାଇରୁ ନିଜ ଗାଁକୁ ଆସିଛନ୍ତି।  ଗାଁକୁ ଫେରିବା ପରେ ତରୁଣ ନିଜ ଦୁଃଖ କଥା ପରିବାର ଆଗରେ ବଖାଣିଛନ୍ତି।

ତରୁଣ ରାଗିଯାଇ ପଞ୍ଚାବର ଅମୃତସରକୁ ଚାଲି ଯାଇଥିଲେ। ଆଉ ସେଠାରେ ପହଞ୍ଚିଲା ପରେ କ’ଣ କରିବେ  କିଛି ଜାଣି ପାରିନଥିଲେ।  ଭୋକ ଉପାସରେ ଅମୃତସର ଷ୍ଟେସନରେ ପଡ଼ି ରହିଥିଲେ। ଆଉ ଏହି ସମୟରେ  ଜଣେ ସର୍ଦାର ତାଙ୍କୁ ନିଜ ଘରକୁ ନେଇ ଯାଇଥିଲେ। ସେଠାରେ ସେ ଖୁସିରେ ସମୟ ବିତାଇଥିଲେ।  ହେଲେ ସର୍ଦାରଙ୍କ ମୃତ୍ୟୁ ପରେ ତାଙ୍କର ଦୁଇ ଝିଅ ତାଙ୍କୁ ନିର୍ଯାତନା ଦେଇଥିଲେ। ତେଣୁ ସେ ସେଠାରୁ ସେ ପଳାଇ ଆସିଥିଲେ। ଆଉ ସେଠାରୁ ପଳାଇ ଆସିବା ପରେ ତରୁଣ ପଞ୍ଚାବ ସୀମାନ୍ତରେ ନିୟୋଜିତ ସୁରକ୍ଷାବାହିନୀଙ୍କ ହାବୁଡ଼ରେ ପଡ଼ି ଯାଇଥିଲେ। ତରୁଣ ସୁରକ୍ଷାବାହିନୀଙ୍କ ନିକଟରେ ନିଜର ଦୁଃଖ  କଥା ଜଣାଇଥିଲେ। ଏହାପରେ ସୁରକ୍ଷାବାହିନୀ ତାଙ୍କୁ ପଞ୍ଜାବରୁ ଓଡ଼ିଶା ପଠାଇଥିଲେ।  

ବଡ଼ ପୁଅକୁ ପାଇ ରାଜଲକ୍ଷ୍ମୀ ବିଶୋୟୀ କହିଛନ୍ତି,“ ମୁଁ ଭଗବାନ ନିକଟରେ ସବୁବେଳେ ପ୍ରାର୍ଥନା କରେ ମୋ ପୁଅ କେମିତି ଘରକୁ ଫେରିଆସୁ। ଆଉ ସେ ଯୋଉଠି ଅଛି, ଯେମିତି ଅଛି ବିଞ୍ଚିକି ଥାଉ। ପୁଅ ଘର ଛାଡ଼ି ଯିବା ଦିନ ଠାରୁ ମୁଁ ମନ୍ଦିର ଯିବା ମଧ୍ୟ ବନ୍ଦ କରି ଦେଇଥିଲି। ଆଜି ମୋ ପୁଅ ଘରକୁ ଫେରିଛି ଏଥର ମୁଁ ମନ୍ଦିର ଯିବି।”