ଦିଲ୍ଲୀରେ ଚୋରି କରି ଗାଁକୁ ପଳାଇ ଆସିଥିଲା, ଧରିଲା ପୁଲିସ୍

ସୋର(ଶଶିକାନ୍ତ ବେହେରା): ଦିଲ୍ଲୀରେ ଜଣେ ବ୍ୟବସାୟୀଙ୍କ ଘରୁ ଚୋରି କରିଥିବା ଅଭିଯୋଗରେ ସୋରର ଜଣେ ଯୁବକଙ୍କୁ ଦିଲ୍ଲୀ ପୁଲିସ୍ ଗିରଫ କରିଛି। ଅଭିଯୁକ୍ତ ଯୁବକଙ୍କ ନାଁ  କରୁଣାକର ଦାଶ। ତାଙ୍କ ଘର ସୋର ଥାନା ଅଞ୍ଚଳର ରଘୁନାଥପୁର ଗାଁରେ।

ଗତ କିଛି ବର୍ଷ ହେବ ଦିଲ୍ଲୀ ସ୍ଥିତ ଆଦର୍ଶନଗର ଥାନା ଅଞ୍ଚଳରେ ରହୁଥିବା ରବୀନ୍ଦ୍ର କୁମାର ଖାରୀ ନାମକ ଜଣେ ବ୍ୟବସାୟୀଙ୍କ ଘରେ କରୁଣାକର କାମ କରୁଥିଲେ। ହେଲେ ଗତ ମାସ ୪ ତାରିଖରେ କରୁଣାକର ରବୀନ୍ଦ୍ରଙ୍କ ଘରୁ ହୀରା କାନଫୁଲ, ସୁନାର ମଙ୍ଗଳ ସୂତ୍ର,  ଚୁଡ଼ି ଓ ହାର ଲୁଟ୍ କରିଥିଲା, ଯାହାର ମୂଲ୍ୟ ପ୍ରାୟ ୧୦ ଲକ୍ଷ ଟଙ୍କା ହେବ। ଲୁଟ୍‌ କରିବା ପରେ ସେ ନିଜ ଗାଁକୁ ପଳାଇ ଆସିଥିଲା। ଏଥିସହ ସେ ଏହିସବୁ ଅଳଙ୍କାର କଟକରେ ବିକ୍ରି କରିଥିବା ଜଣାପଡ଼ିଛି।

ଏନେଇ ଆଦର୍ଶ ଥାନାରେ ରବୀନ୍ଦ୍ର  ଅଭିଯୋଗ କରିଥିଲେ। ଅଭିଯୋଗ ଆଧାରରେ ପୁଲିସ୍ କରୁଣାକରଙ୍କ ବିରୋଧରେ ଏକ ମାମଲା ରୁଜୁ କରିଥିଲା। ଏହାପରେ ଆଦର୍ଶ ଥାନାର ତିନି ଜଣ ପୁଲିସ୍‌ ଅଧିକାରୀ ସୋର ଅଞ୍ଚଳରେ ପହଞ୍ଚି ସ୍ଥାନୀୟ ପୁଲିସ୍‌ର ସହାୟତାରେ କରୁଣାକରଙ୍କୁ ଗିରଫ କରିଛି।