ସୌମ୍ୟଙ୍କ ମତକୁ ନେଇ ଝଡ଼, କହିଲେ-ଛାତ୍ର ରାଜନୀତିରେ ପୂର୍ଣ୍ଣଛେଦ ଟାଣୁଛନ୍ତି ମୁଖ୍ୟମନ୍ତ୍ରୀ

ଭୁବନେଶ୍ୱର(ଓଡ଼ିଶାରିପୋର୍ଟର): କିଛି ଦିନ ପୂର୍ବେ ବିଜେଡିର ପୂର୍ବତନ ବିଧାୟକ ସଞ୍ଜୟ ଦାସବର୍ମା  ବିଦେଶୀ ଶକ୍ତି ରାଜ୍ୟକୁ ଲୁଣ୍ଠନ କରିବାକୁ ମସୁଧା ଚଳାଇଥିବା କହି ଚର୍ଚ୍ଚାକୁ ଆସିଥିବା ବେଳେ ଏବେ ଚର୍ଚ୍ଚାକୁ ଆସିଛନ୍ତି ଖଣ୍ଡପଡ଼ା ବିଧାୟକ ସୌମ୍ୟରଞ୍ଜନ ପଟ୍ଟନାୟକ । ସୌମ୍ୟରଞ୍ଜନ ସିଧାସଳଖ ମୁଖ୍ୟମନ୍ତ୍ରୀ ତଥା ତାଙ୍କ ପରାମର୍ଶଦାତା ଗୋଷ୍ଠୀଙ୍କୁ ଟାର୍ଗେଟ କରିଛନ୍ତି। ଗତ କିଛି ବର୍ଷ ହେବ ରାଜ୍ୟରେ ଛାତ୍ର ସଂସଦ ନିର୍ବାଚନ ହେଉ ନ ଥିବାରୁ ଏହା ପଛରେ ସେମାନଙ୍କ କେଉଁ ଉଦ୍ଦେଶ୍ୟ ଲୁଚି ରହିଛି ବୋଲି ପଚାରିଛନ୍ତି ସୌମ୍ୟରଞ୍ଜନ ପଟ୍ଟନାୟକ।

ଭୁବନେଶ୍ୱର ଜୟଦେବ ଭବନରେ ଜନନେତା ହରିଶ୍ଟନ୍ଦ୍ର ବକ୍ସିପାତ୍ରଙ୍କ ୮୯ ତମ ଜନ୍ମ ଜୟନ୍ତୀ ଉତ୍ସବରେ ଯୋଗଥିଲେ ସୌମ୍ୟରଞ୍ଜନ ପଟ୍ଟନାୟକ । ଏହି ଅବସରରେ ସେ କହିଛନ୍ତି, ପ୍ରାୟ ୩,୪ ବର୍ଷ ହେବ ଆମ ରାଜ୍ୟର କୌଣସି କଲେଜରେ ଛାତ୍ର ନିର୍ବାଚନ ହେଉନି। କେଉଁ ବିଚାର ଆଧାରରେ ଏହି ନିଷ୍ପତ୍ତି ନିଆଯାଇଛି, ସେ ସମ୍ପର୍କରେ ମୁଁ ଅଗୋଚର । କିନ୍ତୁ ଏହାର ପରିଣାମ ଭୋଗିବାକୁ ଆମେ ସମସ୍ତେ ପ୍ରସ୍ତୁତ ହେବା ଦରକାର ।

ଏଥିସହ ସେ କହିଛନ୍ତି ଆଜି ଛାତ୍ର ନେତାଟିଏ ସିଧା ଛିଡ଼ା ହୋଇ ୨ ପଦ କହିବାକୁ ସମର୍ଥ ହୋଇପାରୁ ନାହିଁ। ତେଣୁ ଛାତ୍ର ଜୀବନରେ ଛାତ୍ର ରାଜନୀତି କଲେ ଗଣତାନ୍ତ୍ରିକ ବ୍ୟବସ୍ଥାରେ ନେତୃତ୍ୱ ତିଆରି ହେବାକୁ ଏକ ସୁଯୋଗ ସୃଷ୍ଟି ହୁଏ । ହେଲେ ମୁଖ୍ୟମନ୍ତ୍ରୀ ଓ ତାଙ୍କ ପରାମର୍ଶଦାତା ଗୋଷ୍ଠି କେଉଁ କାରଣରୁ ଛାତ୍ର ରାଜନୀତିରେ ଏପରି ପୂର୍ଣ୍ଣଛେଦ ଟାଣୁଛନ୍ତି ତାକୁ ପୁନଃବିଚାର କରିବା ଆବଶ୍ୟକ ।

କିଛି ଦିନ ପୂର୍ବେ ସଞ୍ଜୟ ଦାସବର୍ମାଙ୍କ ମନ୍ତବ୍ୟକୁ ନେଇ ରାଜ୍ୟ ରାଜନୀତିରେ ହଇଚଇ ସୃଷ୍ଟି ହୋଇଥିବା ବେଳେ ଏବେ ସୌମ୍ୟଙ୍କ ମନ୍ତବ୍ୟ  ସରକାରୀ ଦଳରେ କମ୍ପନ ସୃଷ୍ଟି କରିଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।