ବିଜେଡିରେ ମିଶିଲେ ସୌମ୍ୟରଞ୍ଜନ ପଟ୍ଟନାୟକ ଏବଂ ଅଚ୍ୟୁତ ସାମନ୍ତ

ଭୁବନେଶ୍ୱର( ଓଡ଼ିଶା ରିପୋର୍ଟର): ବିଜେଡିରେ ଯୋଗଦେଇଛନ୍ତି ଆମ ଓଡ଼ିଶା ପାର୍ଟି ଅଧ୍ୟକ୍ଷ ସୌମ୍ୟରଞ୍ଜନ ପଟ୍ଟନାୟକ ଓ ସମାଜସେବୀ ଅଚ୍ୟୁତ ସାମନ୍ତ। ଆଜି ଉଭୟ ନବୀନ ନିବାସ ଯାଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପସ୍ଥିତିରେ ବିଜେଡିରେ ସାମିଲ ହୋଇଥିଲେ। ବିଜେଡିରେ ଯୋଗଦେବା ପରେ ସୌମ୍ୟରଞ୍ଜନ କହିଛନ୍ତି,“ମୁଁ କୌଣସି ସର୍ତ୍ତ ରଖି ବିଜେଡିରେ ମିଶି ନାହିଁ।  ଆମ ଓଡ଼ିଶା ପାର୍ଟି ଏକ ପ୍ରକାର ବିଜେଡିରେ ବିଲୀନ ହେଲା। ଏନେଇ ବିଧିବଦ୍ଧ ଭାବେ ଘୋଷଣା କରାଯିବ।” ଏହାସହ ଚିଟଫଣ୍ଡ ଓ ଚାଷୀ ଆନ୍ଦୋଳନ ପୂର୍ବ ପରି ଜାରି ରହିବ ବୋଲି ସୌମ୍ୟରଞ୍ଜନ ପଟ୍ଟନାୟକ କହିଛନ୍ତି।

ପୂର୍ବତନ ମୁଖ୍ୟମନ୍ତ୍ରୀ ଜାନକୀ ବଲ୍ଲଭ ପଟ୍ଟନାୟକଙ୍କ ଜ୍ୱାଇଁ ସୌମ୍ୟରଞ୍ଜନ ପଟ୍ଟନାୟକ ବିଶିଷ୍ଟ ଗଣମାଧ୍ୟମ ବ୍ୟକ୍ତିତ୍ୱ ଭାବେ ରାଜ୍ୟରେ ଜଣାଶୁଣା। ଦୈନିକ ‘ସମ୍ବାଦର’ ସେ ସମ୍ପାଦକ। ପୂର୍ବରୁ ସେ ବିଜେପି ଓ କଂଗ୍ରେସ ଦଳ ସହିତ ଜଡିତ ଥିଲେ। ଏପରିକି ଏକାଦଶ ଲୋକସଭା ନିର୍ବାଚନରେ ସୌମ୍ୟରଞ୍ଜନ କଂଗ୍ରେସ ଟିକେଟରେ ଭୁବନେଶ୍ୱରରୁ ନିର୍ବାଚିତ ହୋଇଥିଲେ।୨୦୦୯ରେ ସେ କଂଗ୍ରେସ ଟିକେଟରେ ଖଣ୍ଡପଡ଼ା ବିଧାନସଭା ଆସନରୁ ନିର୍ବାଚନ ଲଢିଥିଲେ ହେଁ ପରାସ୍ତ ହୋଇଥିଲେ। ୨୦୧୩ରେ ଦଳ ବିରୋଧୀ କାର୍ଯ୍ୟକଳାପ ଅଭିଯୋଗରେ ତାଙ୍କୁ କଂଗ୍ରେସରୁ ବହିଷ୍କାର କରାଯାଇଥିଲା। ଏହାପରେ ଆମ ଓଡିଶା ପାର୍ଟି ଗଠନ କରିଥିଲେ। ୨୦୧୪ରେ ଆମ ଓଡ଼ିଶା ପାର୍ଟିର ପ୍ରାର୍ଥୀ ଭାବେ ଖଣ୍ଡପଡାରୁ ନିର୍ବାଚନ ଲଢି ପରାସ୍ତ ହୋଇଥିଲେ। ସୌମ୍ୟରଞ୍ଜନ ନବନିର୍ମାଣ କୃଷକ ସଂଗଠନ ଏବଂ ଚିଟଫଣ୍ଡ କ୍ଷତିଗ୍ରସ୍ତ ମିଳିତ ମଞ୍ଚର ଉପଦେଷ୍ଟା ରହିବା ସହ ଭାଷା ଆନ୍ଦୋଳନ ସହ ଜଡିତ ଅଛନ୍ତି।

ସେହିପରି ସମାଜସେବୀ ଅଚ୍ୟୁତ ସାମନ୍ତ ମଧ୍ୟ ଆଜି ବିଜେଡିରେ ଯୋଗଦେଇଛନ୍ତି। ସୌମ୍ୟରଞ୍ଜନ ପଟ୍ଟନାୟକ ଦଳରେ ମିଶିବାର କିଛି ସମୟ ପରେ ଅଚ୍ୟୁତ ସାମନ୍ତ ନବୀନ ନିବାସରେ ପହଞ୍ଚିଥିଲେ। ଆଉ ଏହାର କିଛି ସମୟ ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ଅଚ୍ୟୁତଙ୍କ ବିଜେଡିରେ ଯୋଗ ଦେବା ନେଇ ଘୋଷଣା କରିଥିଲେ। କିଟ୍ ଏବଂ କିସ୍ ଭଳି ଶିକ୍ଷାନୁଷ୍ଠାନର ପ୍ରତିଷ୍ଠାତା ହେଉଛନ୍ତି ଅଚ୍ୟୁତ ସାମନ୍ତ।