ବିଜେଡି ସ୍ଥିତିକୁ ନେଇ ଏମିତି କହିଲେ ବୈଜୟନ୍ତ

ଭୁବନେଶ୍ୱର(ଓଡିଶା ରିପୋର୍ଟର): ଜାତୀୟସ୍ତରର ପତ୍ରିକା ସ୍ୱରାଜ୍ୟକୁ ସାକ୍ଷତକାର ଦେଇ କେନ୍ଦ୍ରାପଡ଼ା ସାଂସଦ ବୈଜୟନ୍ତ ପଣ୍ଡା ନବୀନଙ୍କ ସମ୍ପର୍କରେ ପୁଣି କିଛି କହିଛନ୍ତି। ତାଙ୍କ ମତରେ ଏଯାଏଁ ନିଜ ଭାବମୂର୍ତ୍ତି ବଜାୟ ରଖିବାରେ ନବୀନ ସଫଳ ହୋଇଥିଲେ ମଧ୍ୟ ଦୁର୍ନୀତି ଓ ଗୁଣ୍ଡାଗର୍ଦ୍ଦି ଯୋଗୁଁ ତୃଣମୂଳସ୍ତରରେ କର୍ମୀ ଲୋକଙ୍କ ଆସ୍ଥା ହରାଉଛନ୍ତି ସେ। ୨୦୧୨ର ବହୁଚର୍ଚ୍ଚିତ ବିଜେଡି ବିଦ୍ରୋହ ପରେ ପ୍ୟାରୀଙ୍କ ପତ୍ତନ ଓ ପାଣ୍ଡିଆନଙ୍କ ପ୍ରଭାବ ବିସ୍ତାର ପରେ ଏଭଳି ସ୍ଥିତି ସୃଷ୍ଟି ହୋଇଥିବା କହିଛନ୍ତି ବୈଜୟନ୍ତ।

ବିଜେଡି ଛାଡ଼ିବା ପରେ କେନ୍ଦ୍ରାପଡ଼ା ସାଂସଦ ବୈଜୟନ୍ତ ପଣ୍ଡା ମୁହଁ ଖୋଲି ନ ଥିଲେ ମଧ୍ୟ ତାଙ୍କ ଆଭିମୁଖ୍ୟକୁ ନେଇ ଚର୍ଚ୍ଚା ଥମୁନି । ହେଲେ ଗତକାଲି ଜାତୀୟ ପତ୍ରିକା ସ୍ୱରାଜ୍ୟରେ ପ୍ରକାଶିତ ସାକ୍ଷାତକାରେ ରାଜ୍ୟ ରାଜନୀତିକୁ ନେଇ ଖୋଲା ମତବ୍ୟକ୍ତ କରିଛନ୍ତି ବୈଜୟନ୍ତ।  କ୍ଷମତାକୁ ଆସିବା ଲାଗି ବିଜେଡିର ସଂଘର୍ଷଠୁ ଆରମ୍ଭ କରି ପ୍ୟାରୀଙ୍କ ବିଦ୍ରୋହ, ପାଣ୍ଡିଆନଙ୍କ ଉତ୍ଥାନ, ନବୀନଙ୍କ ଭାବମୂର୍ତ୍ତୀ ଓ ଦଳର ଭବିଷ୍ୟତ ଉପରେ ସେ ଆଲୋକପାତ କରିଛନ୍ତି  ।

୨୦୧୨ର ବିବାଦୀୟ ମିଡ‌ନାଇଟ୍ ଅପରେସନ୍ କଥା ଉଠାଇ ବୈଜୟନ୍ତ କହିଛନ୍ତି “୧୪ ବର୍ଷ ଧରି ସବୁକିଛି ଠିକ୍ ଚାଲିଥିଲା । ନବୀନଙ୍କ ନେତୃତ୍ୱରେ ଦକ୍ଷତାର ସହ କାମ କରୁଥିଲା ସରକାର। ତେବେ ପ୍ୟାରୀଙ୍କ ବିଦ୍ରୋହ ଥିଲା ଟର୍ଣ୍ଣିଂ ପଏଣ୍ଟ । ଏହି ଘଟଣା ପରେ ବିଦ୍ରୋହରେ ସାମିଲନେତାଙ୍କୁ  ଓଲଟା ପୁରସ୍କୃତ କରାଗଲା।  ବିଶ୍ୱସ୍ତଙ୍କୁ ଦୂରେଇ ଦିଆଗଲା ।ଏହି ସମୟରେ ଜଣେ ଅଧସ୍ତନ ପ୍ରଶାସନିକ ଅଧିକାରୀ ପ୍ରଭାବ ବିସ୍ତାର କରିବାକୁ ଲାଗିଲେ । ୨୦୧୪ ସାଧାରଣ ନିର୍ବାଚନରେ ଟିକଟ ବଣ୍ଟନ ବୈଠକରେ ତାଙ୍କୁ  ମୁଖ୍ୟମନ୍ତ୍ରୀଙ୍କ ସହ ବସିଥିବା ଦେଖି ମୁଁ ଚକିତ ହୋଇଥିଲି।”

ଦଳର ବର୍ତ୍ତମାନର ସ୍ଥିତି ଉପରେ ଆଲୋକପାତ କରି ବୈଜୟନ୍ତ କହିଛନ୍ତି ଯେ, ବ୍ରାଣ୍ଡ ନବୀନ ଏବେ ବି ବିଜେଡିର ସବୁଠୁ ବଡ଼ ତାକତ୍ । ଦଶନ୍ଧି ଧରି ବହୁ ପରିଶ୍ରମ ପରେ ଦଳ ନିଜ ଛବି ତିଆରି କରିଥିଲା। ନବୀନଙ୍କ କେତେକ ନିର୍ଭିକ ନିଷ୍ପତ୍ତି ଏହାକୁ ଅଧିକ ମଜଭୁତ କରିଥିଲା। ମାତ୍ର ମାତ୍ରାଧିକ ଦୁର୍ନୀତି ଓ ଗୁଣ୍ଡାଗର୍ଦ୍ଦି ଯୋଗୁଁ  ବିଜେଡି ଭିତରେ ଭିତରେ ଘୁଣ ଖାଇ ଗଲାଣି ଓ ତୃଣମୂଳସ୍ତରର କର୍ମୀ ଲୋକଙ୍କ ଆସ୍ଥା ହରାଉଛନ୍ତି।

ବିଜେଡିର କ୍ଷୁଧା କମିନାହିଁ –

ବିଜେଡିର ଭବିଷ୍ୟତ ନେଇ ବୈଜୟନ୍ତ କହିଛନ୍ତି ଯେ, ୧୮ ବର୍ଷ ଶାସନରେ ରହିଥିଲେ ମଧ୍ୟ ବିଜେଡିର କ୍ଷୁଧା କମିନାହିଁ । କଳେବଳେ କୌଶଳେ ସଫଳତା ପାଇବାକୁ  ଦଳ ଭିତରେ ଏବେବି ଅଦମ୍ୟ ଇଛାଶକ୍ତି ଓ ଭୋକ ରହିଛି। ଏହାର ସମକକ୍ଷ ହେବା ଲାଗି କଂଗ୍ରେସ ଓ ବିଜେପି ସମର୍ଥ ନୁହନ୍ତି । ନିର୍ବାଚନ ପର୍ଯ୍ୟନ୍ତ  ବିଜେଡି, ବିଜେପି ଓ କଂଗ୍ରେସଠାରୁ ସମଦୂରତ୍ୱ ରଖିବ। ତେବେ ନିର୍ବାଚନ ପରେ ନିଜ ଫାଇଦାକୁ ଦେଖି ନିଷ୍ପତ୍ତି ନେବ ବୋଲି ସେ କହିଛନ୍ତି । ତେବେ ବିଜେଡିର ସୁଦୃଢ଼ ସ୍ଥିତିକୁ ନେଇ ବୈଜୟନ୍ତ କହିଛନ୍ତି, ବିଶ୍ୱସନୀୟ ବିକଳ୍ପ ସାମ୍ନାକୁ ଆସିଲେ ସ୍ଥିତି ବଦଳିପାରେ । ରାଜନୀତିରେ ସପ୍ତାହେ ଯଥେଷ୍ଟ, ନିର୍ବାନକୁ ତ ଅନେକ ମାସ ବାକି ଅଛି   ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।