ଛାତ୍ରୀମାନେ ଗାଧୋଇବା ବେଳେ ବାଥ୍‌ରୁମ୍‌ରେ ପଶି ଯାଉଥିଲେ ହେଡ୍‌ସାର୍‌

ବାରିପଦା(ଓଡ଼ିଶା ରିପୋର୍ଟର): “ମୁଁ ବି ପଢ଼ିବି”। ସମସ୍ତ ପିଲାଙ୍କୁ ଶିକ୍ଷିତ କରିବା ପାଇଁ ମୟୂରଭଞ୍ଜ ଜିଲ୍ଲାର ସବୁ ବ୍ଲକରେ ଏହି ଯୋଜନା କାର୍ଯ୍ୟକାରୀ କରାଯାଇଥିଲା। ପିଲାମାନଙ୍କୁ ଗ୍ୟାରେଜ ଓ ହୋଟେଲରେ ନିୟୋଜିତ କଲେ ହେଉଥିଲା କାର୍ଯ୍ୟାନୁଷ୍ଠାନ। ଏପରିକି ନିଜ ଅଞ୍ଚଳରେ ସ୍କୁଲ ଯାଉନଥିବା ପିଲାଙ୍କୁ ଆଣିବା ପାଇଁ ଶିକ୍ଷକମାନଙ୍କୁ ନିର୍ଦ୍ଦେଶ ଦିଆଯାଇଥିଲା। ଯେଉଁ ସମୟରେ ରାଜେଶ ପ୍ରଭାକର ପାଟିଲ୍‌ ମୟୂରଭଞ୍ଜ ଜିଲ୍ଲାପାଳ ଥିଲେ ସେହି ସମୟରେ ଏହି ନିୟମକୁ କଡ଼ାକଡ଼ି ଭାବେ ପାଳନ କରାଯାଉଥିଲା। ଏଥିପାଇଁ ଜାତୀୟ ଗଣମାଧ୍ୟମରେ ଏହି ଜିଲ୍ଲା ବେଶ୍‌ ପ୍ରଶଂସା ସାଉଁଣ୍ଟି ଥିଲା। ରାଜେଶ ପ୍ରଭାକର ପାଟିଲଙ୍କ ବଦଳି ପରେ ଏହି ଯୋଜନା ପଙ୍ଗୁ ହୋଇଯାଇଛି। ସ୍କୁଲରେ ଦିଆଯାଉଛି ଛାତ୍ରଛାତ୍ରୀଙ୍କୁ ମାନସିକ ନିର୍ଯାତନା। ସବୁ ସୀମା ଅତିକ୍ରମ କରିଛନ୍ତି ଜଣେ ପ୍ରଧାନଶିକ୍ଷକ। ଛାତ୍ରୀମାନେ ଶୌଚାଳୟରେ ଗାଧୋଇବା ବେଳେ ସେ ପଶି ଯାଉଥିବା ବାଲିଡିହା ଏସ୍‌ଏସ୍‌ଡି ସ୍କୁଲର ଛାତ୍ରଛାତ୍ରୀମାନେ ଆଜି ଜିଲ୍ଲାପାଳଙ୍କ ନିକଟରେ ଅଭିଯୋଗ କରିଛନ୍ତି। ଦୀର୍ଘ ୧୫ କିମି ପଥ ଚାଲି ଚାଲି ଅତିକ୍ରମ କରି ଛାତ୍ରଛାତ୍ରୀମାନେ ଜିଲ୍ଲାପାଳଙ୍କ ପାଖରେ ଅଭିଯୋଗ କରିଛନ୍ତି।

ଶ୍ୟାମାଖୁଣ୍ଟା ବ୍ଲକ ବାଲିଡିହା ଏସ୍‌ଏସ୍‌ଡି ସ୍କୁଲ ହଷ୍ଟେଲରେ ଆବଶ୍ୟକ ସଂଖ୍ୟକ ଶୌଚାଳୟ ନାହିଁ। ଛାତ୍ରମାନେ କ୍ୟାମ୍ପସ ବାହାରେ ଶୌଚ ପାଇଁ ଯାଉଛନ୍ତି। ଛାତ୍ରୀମାନେ ଶୌଚାଳୟରେ ଗାଧୋଇବା ବେଳେ ପ୍ରଧାନଶିକ୍ଷକ ବଳପୂର୍ବକ ଭିତରେ ପସି ଯାଉଥିବା ଅଭିଯୋଗ ହେଉଛି। ଠିକ୍‌ ଭାବେ ଖାଇବାକୁ ଦିଆ ଯାଉନାହିଁ। ଚାଉଳିଆ ଭାତ ଓ ପାଣିଆ ଡାଲି ଖାଇବାକୁ ଦିଆଯାଉଛି। ଯେଉଁ ଡାଲମା ଖାଇବାକୁ ଦିଆଯାଉଛି, ସେଥିରେ ପରିବା ସିଝୁନି। ଏହାର ପ୍ରତିବାଦ କଲେ ପ୍ରଧାନଶିକ୍ଷକ ଗାଳି ଦେଉଛନ୍ତି। ତେଣୁ ଯଥାଶୀଘ୍ର ତାଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ଛାତ୍ରଛାତ୍ରୀମାନେ ଦାବି କରିଛନ୍ତି। ଏହାଛଡ଼ା ବିନା କାରଣରେ ଶିକ୍ଷକ ଓ ଶିକ୍ଷୟିତ୍ରୀଙ୍କୁ ଅନ୍ୟତ୍ର ବଦଳି କରାଯାଇଛି। ତେଣୁ ଶିକ୍ଷା ଦାନରେ ବହୁ ଅସୁବିଧା ହେଉଛି। ବଦଳି ହୋଇଥିବା ଶିକ୍ଷକ ଓ ଶିକ୍ଷୟିତ୍ରୀଙ୍କୁ ଫୁଣି ଥରେ ସ୍କୁଲକୁ ଫେରାଇ ଆଣାଯାଉ। ପ୍ରଧାନଶିକ୍ଷକଙ୍କୁ ନିଲମ୍ୱିତ କରାଯାଇଥିବା ଜଣାପଡ଼ିଛି।

ସମାନ ଅଭିଯୋଗ କରଞ୍ଜିଆ ଉଚ୍ଚ ବାଳିକା ବିଦ୍ୟାଳୟରୁ ଆସିଛି। ୪୦୦ରୁ ଅଧିକ ଛାତ୍ରୀ ୧୦ କିମି ପଥ ଅତିକ୍ରମ କରି କରଞ୍ଜିଆ ଉପଜିଲ୍ଲାପାଳଙ୍କ ପାଖରେ ଅଭିଯୋଗ କରିଥିଲେ। ସେମାନେ ଅଭିଯୋଗ କରିଛନ୍ତି, ହଷ୍ଟେଲ୍‌ରେ ଠିକ୍‌ ଭାବେ ଖାଇବାକୁ ଦିଆଯାଉନାହିଁ। ଯେଉଁ ଖାଦ୍ୟ ଖାଇବାକୁ ଦିଆଯାଉଥି ତାହା ଖାଦ୍ୟପଯୋଗୀ ନୁହେଁ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।