ଭୁବନେଶ୍ୱର (ଓଡ଼ିଶା ରିପୋର୍ଟର): ମାଟ୍ରିକ୍ ରେଜଲ୍ଟକୁ ନେଇ ଆଜି ବି ରାଜ୍ୟର ବିଭିନ୍ନ ସ୍ଥାନରେ ଛାତ୍ରଛାତ୍ରୀମାନେ ପ୍ରତିବାଦ କରିଛନ୍ତି।
ତ୍ରୁଟିପୂର୍ଣ୍ଣ ମୂଲ୍ୟାୟନ ପ୍ରତିବାଦରେ ବାଲେଶ୍ୱର ଜିଲ୍ଲା ବାହାନଗା ନୋଡାଲ ସ୍କୁଲର ଛାତ୍ରଛାତ୍ରୀ ଜିଲ୍ଲାପାଳଙ୍କ ଦ୍ୱାରସ୍ଥ ହୋଇଛନ୍ତି। ସେମାନେ ସାଂଘାତିକ ଅଭିଯୋଗ ଆଣିଛନ୍ତି। ସ୍କୁଲ୍ କର୍ତ୍ତୃପକ୍ଷଙ୍କ ବିରୋଧରେ ସେମାନେ ପାତରଅନ୍ତର ଅଭିଯୋଗ ଆଣିଛନ୍ତି।
ସେମାନେ ଅଭିଯୋଗ କରିଛନ୍ତି ଯେ ସ୍କୁଲ୍ରେ ଘୋଟାଲା କରାଯାଇଛି। ପିଲାମାନେ ଗୋଟିଏ ନମ୍ବର ରଖିଥିବା ବେଳେ ବୋର୍ଡକୁ ଆଉ ଗୋଟେ ନମ୍ବର ପଠାଯାଇଛି। ପୁଣି ପିଲାଏ ପରୀକ୍ଷା ଦେଇଥିଲେ ବି କୁହାଯାଉଛି ସେମାନେ ପରୀକ୍ଷା ଦେଇ ନାହାନ୍ତି। ଟାଇପିଂ ମିସ୍ଟେକ୍ ହୋଇଛି କହି ସ୍କୁଲ୍ କର୍ତ୍ତୃପକ୍ଷ ସେମାନଙ୍କ ଭାଗ୍ୟ ସହିତ ଖେଳୁଛନ୍ତି ବୋଲି ଏହି ପିଲାମାନେ ଅଭିଯୋଗ କରିଛନ୍ତି।
ଅନ୍ୟପକ୍ଷରେ ସୁବର୍ଣ୍ଣପୁର ଜିଲ୍ଲା ବିନିକାର ଡୁଙ୍ଗୁରିପାଲି ସ୍ଥିତ ସରସ୍ୱତୀ ଶିଶୁ ମନ୍ଦିରରେ ମଧ୍ୟ ଛାତ୍ରଛାତ୍ରୀମାନେ ମୂଲ୍ୟାୟନକୁ ତ୍ରୁଟିପୂର୍ଣ୍ଣ ଦର୍ଶାଇ ପ୍ରତିବାଦ କରିଛନ୍ତି। ସେମାନେ ସ୍କୁଲ୍ ଫାଟକରେ ତାଲା ମଧ୍ୟ ପକାଇ ଦେଇଛନ୍ତି।
[caption id="attachment_654665" align="aligncenter" width="650"]
ଡୁଙ୍ଗୁରିପାଲି ସରସ୍ୱତୀ ଶିଶୁ ମନ୍ଦିରରେ ତାଲା ପକାଇ ଦେଲେ ଛାତ୍ରଛାତ୍ରୀ[/caption]
ଏହି ପ୍ରତିବାଦରେ ସାମିଲ ଜଣେ ଛାତ୍ରୀ କହିଛନ୍ତି ଯେ ସେ ୮୫% ରଖିବେ ବୋଲି ଆଶା ରଖିଥିଲେ। କିନ୍ତୁ ତାଙ୍କୁ ୬୬% ମିଳିଛି। ଏଥିରେ ସେ ଆଦୌ ସନ୍ତୁଷ୍ଟ ନାହାନ୍ତି। କମ୍ ନମ୍ବର ଥିବାରୁ ତାଙ୍କୁ ଭଲ କଲେଜରେ ସିଟ୍ ମଧ୍ୟ ମିଳିବ ନାହିଁ। ଏଣୁ ପୁନଃମୂଲ୍ୟାୟନ କରିବାକୁ ସେ ଦାବି କରିଛନ୍ତି।
ସେହିଭଳି ଜଣେ ଛାତ୍ର କହିଛନ୍ତି ଯେ ସେ ପ୍ରଥମରୁ ନବମ ଶ୍ରେଣୀ ପର୍ଯ୍ୟନ୍ତ ସବୁବେଳେ ୯୫-୯୬% ନମ୍ବର ରଖିଛନ୍ତି। କିନ୍ତୁ ଏଥର ବିନା ପରୀକ୍ଷାରେ ବୋର୍ଡ ତାଙ୍କୁ ୭୩% ନମ୍ବର ଦେଇଛି। ଏଥିରେ ସେ ଆଦୌ ସନ୍ତୁଷ୍ଟ ନାହିଁ। ନମ୍ବର ଶ୍ରେଣୀର ପରୀକ୍ଷା ଫଳ ଅନୁସାରେ ଆମକୁ ଯଦି ଆଭେରେଜ୍ ନମ୍ବର ଦିଆନଯିବ, ତା’ହେଲେ ଆମେ ସ୍କୁଲ୍ର ତାଲା ଖୋଲିବୁ ନାହିଁ।
ସୂଚନାଯୋଗ୍ୟ, ମାଟ୍ରିକ୍ ରେଜଲ୍ଟକୁ ନେଇ ଗତକାଲି କଟକ, ଭୁବନେଶ୍ୱର, ପୁରୀ ଓ ଭଦ୍ରକ ସମତେ ଆଉ କିଛି ସ୍ଥାନରେ ଛାତ୍ରଛାତ୍ରୀ ପ୍ରତିବାଦ କରିଥିଲେ। କଟକ ସ୍ଥିତ ବୋର୍ଡ ଅଫିସ୍ ସାମ୍ନାରେ ମଧ୍ୟ ଅଭିଭାବକମାନେ ପ୍ରତିବାଦ କରିଥିଲେ। ମୂଲ୍ୟାୟନରେ ତ୍ରୁଟି ଥିବା ଦର୍ଶାଇ ସେମାନେ ପ୍ରତିବାଦ କରିଥିଲେ। ଅନ୍ୟପକ୍ଷରେ ବୋର୍ଡ ପକ୍ଷରୁ କୁହାଯାଇଛି ଯେ ମୂଲ୍ୟାୟନରେ କିଛି ତ୍ରୁଟି ନାହିଁ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
