ରାଗିଗଲେ ସାର୍‌, ଗୋଡ଼େଇ ଗୋଡ଼େଇ ପିଟିଲେ

ଅନୁଗୋଳ (ବିରଜା ପ୍ରସାଦ ଦାଶ): ରାଗିଲେ ସାରେ। ଗୋଡ଼ାଇ ଗୋଡ଼ାଇ ପିଟିଲେ। ଜୀବନ ବିକଳରେ ଛାତ୍ରମାନେ ଦୌଡ଼ି ପଳାଇ ଯାଇଥିଲେ। ଆଜି ଏମିତି ସ୍ଥିତି ତାଳଚେର ଆଇଟିଆଇରେ ଦେଖିବାକୁ ମିଳିଛି।

ଅନ୍‌ଲାଇନ୍‌ ପରିବର୍ତ୍ତେ ଅପ୍‌ଲାଇନ୍‌ରେ ପରୀକ୍ଷା କରିବାକୁ ତାଳଚେର ସରକାରୀ ଆଇଟିଆଇ ଛାତ୍ରଛାତ୍ରୀମାନେ ଦୀର୍ଘ ଦିନରୁ ଦାବି କରିଆସୁଥିଲେ। ମାତ୍ର ଆଇଟିଆଇ କର୍ତ୍ତୃପକ୍ଷ ଏଥିପ୍ରତି ତିଳେ ମାତ୍ର ଧ୍ୟାନ ଦେଉନଥିଲେ। ଆଜି ସକାଳେ ଛାତ୍ରଛାତ୍ରୀମାନେ ଏ ସମ୍ପର୍କରେ ଆଇଟିଆଇ କ୍ୟାମ୍ପରେ ବସି ଆଲୋଚନା କରୁଥିଲେ। ଏହି ସମୟରେ ଜନୈକ ଶିକ୍ଷକ ସେଠାରେ ପହଞ୍ଚି କଣ କଥା ହେଉଛି ବୋଲି କହି ଗୋଟିଏ ଡାଙ୍ଗରେ ପିଲାମାନଙ୍କୁ ଗୋଡ଼ାଇ ଗୋଡ଼ାଇ ପିଟିଥିଲେ। ଫଳରେ ପିଲାମାନେ ଜୀବନ ବିକଳରେ ଦୌଡ଼ି ପଳାଇ ଯାଇଥିଲେ। କହିବାକୁ ଗଲେ କିଛି ସମୟ ପାଇଁ ଆଇଟିଆଇ ପରିସର ରଣକ୍ଷେତ୍ରରେ ପରିଣତ ହୋଇଯାଇଥିଲା। ପରେ ଛାତ୍ରମାନେ ଏନେଇ ଥାନାରେ ଲିଖିତ ଅଭିଯୋଗ କରିଥିଲେ। ମାଡ଼ ମାରିଥିବା ଶିକ୍ଷକଙ୍କ ଗିରଫ ଓ ଅନ୍‌ଲାଇନ୍‌ ପରିବର୍ତ୍ତେ ଅପ୍‌ଲାଇନ୍‌ ପରୀକ୍ଷା ଦାବିରେ ଛାତ୍ର ଆଇଟିଆଇ ଗେଟ୍‌ରେ ତାଲା ପକାଇ ଧାରଣାରେ ବସିଛନ୍ତି।