ସୁକ୍‌ମାରେ କେମିତି ହୋଇଥିଲା ମାଓ ଷଡ଼ଯନ୍ତ୍ର, କିଏ ଥିଲା ଟାର୍ଗେଟରେ ? ଦେଖନ୍ତୁ ଗ୍ରାଉଣ୍ଡ ଜିରୋ ରିପୋର୍ଟ

ଭୁବନେଶ୍ୱର🙁ଓଡ଼ିଶା ରିପୋର୍ଟର): ଛତିଶଗଡ଼ ସୁକ୍‌ମା ଜିଲ୍ଲାରେ ଲାଲବାହିନୀ ହିଂସା ପଛରେ ରହିଥିଲା ସାଂଘାତିକ ଷଡଯନ୍ତ୍ର।  କେବଳ ଯବାନ ନୁହଁନ୍ତି, ସୁକ୍‌ମା ଏସ୍ପି ମଧ୍ୟ ଥିଲେ ଟାର୍ଗେଟରେ। ନକ୍ସଲ ଅପରେସନରେ ସଂପୃକ୍ତ ଯବାନଙ୍କ ଶକ୍ତିଶାଳୀ ଅସ୍ତ୍ରଶସ୍ତ୍ର ଏବଂ ସୁରକ୍ଷା ବଳୟକୁ ଭେଦ କରି ବଡ଼ଧରଣର ହମଲା କରିବାକୁ ତିଆରି କରିଥିଲେ ଯୋଜନା । ସିଆରପିଏଫ କ୍ୟାମ୍ପରୁ ମାତ୍ର ୨ କିଲୋମିଟର ଦୂରରେ ବିଛାଇଥିଲେ ପ୍ରାଣଘାତୀ ଆଇଇଡ଼ି। ଅଥଚ କୌଣସି ସୁରାଗ୍ ପାଇନଥିଲେ ସୁରକ୍ଷାକର୍ମୀ।  ଆଉ ଶିକାର ହେଲେ ମାଓବାଦୀଙ୍କ ଆମ୍ବୁସର। ଲାଲ୍ ହିଂସାରେ ଛିନ୍‌ଛତ୍ର ହୋଇଯାଇଛି ଆଣ୍ଟି ଲ୍ୟାଣ୍ଡମାଇନ୍ ଭେଇକିଲ୍ । ବିସ୍ଫୋରଣ ସ୍ଥଳରୁ ଛିଟିକି ପଡ଼ିଛି ପ୍ରାୟ ୧୦୦ ମିଟର ଦୂରକୁ । ମାଓ ବର୍ବରତାର ନିଆଁରୁ ଏବେ ବି ବାହାରୁଛି ଧୂଆଁ।  ଗତକାଲି ସମୟ ଅପରାହ୍ନ ପ୍ରାୟ ଗୋଟାଏ । ଛତିଶଗଡ଼ ସୁକ୍‌ମା ଜିଲ୍ଲା କିସ୍ତାରାମରେ ମାଓ ଶିବିର ଥିବା ସୂଚନା ପାଇ ଏସ୍ପି ଅଭିଷେକ ମୀନାଙ୍କ ନେତୃତ୍ୱରେ ଅପରେସନ୍‌ରେ ବାହାରିଥିଲେ ସୁରକ୍ଷାକର୍ମୀ।  

 ପ୍ରଥମେ ବାଇକ୍‌ରେ କିଛି ସୁରକ୍ଷାକର୍ମୀଙ୍କ ସହ ଏସ୍ପି ଯାଇଥିଲେ।  ଏହି ରାସ୍ତା ଦେଇ ତାଙ୍କ ପଛରେ ଆସୁଥିଲା ଆଣ୍ଟି ଲ୍ୟାଣ୍ଡମାଇନ୍ ଭେଇକିଲ।  କିନ୍ତୁ ମାଓବାଦୀଙ୍କ ଦ୍ୱାରା କିସ୍ତାରାମ୍ ଜଙ୍ଗଲରେ ବିଛାଯାଇଥିଲା ଶକ୍ତିଶାଳୀ ଆଇଇଡ଼ି।  ଆଉ ସେହି ଆଇଇଡ଼ି ବିସ୍ଫୋରଣରେ ଉଡ଼ିଗଲା ମାଇନ୍ ପ୍ରୋଟେକ୍ଟେଡ୍ ଭେଇକିଲ୍ । ଫଳରେ ଭେଇକିଲରେ ଥିବା ଯବାନଙ୍କ ମଧ୍ୟରୁ ୯ ଜଣ ସହିଦ ହୋଇଯାଇଥିବାବେଳେ ଅଳ୍ପକେ ବର୍ତ୍ତିଯାଇଥିଲେ ସୁକ୍‌ମା ଏସ୍ପି ଅଭିଷେକ ମୀନା ।ମାଓବାଦୀମାନେ କେବଳଯେ, ଶକ୍ତିଶାଳୀ ଆଇଡି ବ୍ୟବହାର କଲେ ତାନୁହେଁ ସୁରକ୍ଷାକର୍ମୀଙ୍କ ଅତ୍ୟାଧୁନିକ ଅସ୍ତ୍ରଶସ୍ତ୍ରକୁ ମାତ୍ ଦେବା ପାଇଁ ସେମାନଙ୍କ ହାତରେ ବି ଥିଲା ଏହି ପ୍ରାଣଘାତୀ ଦେଶୀ ଅସ୍ତ୍ର ।

ତେବେ ଏହା କେଉଁ ଧରଣର ଅସ୍ତ୍ର, ତା’ର ଟେର୍ ବି ପାଇପାରୁନାହାଁନ୍ତି ସୁରକ୍ଷାକର୍ମୀ । ବିସ୍ଫୋରଣ ଘଟିଥିବା ସ୍ଥାନ ସୁରକ୍ଷାକର୍ମୀଙ୍କ ପାଇଁ କୌଣସି ଅଜଣା ନୁହେଁ । କାରଣ କିସ୍ତାରାମ୍ ସିଆରପିଏଫ କ୍ୟାମ୍ପରୁ ମାତ୍ର ୨ କିଲୋମିଟର ଦୂରରେ ଘଟିଛି ଏହି ଘଟଣା । ତେବେ ପ୍ରଶ୍ନ ଉଠୁଛି, କ୍ୟାମ୍ପରୁ ଅପରେସନ୍ ପାଇଁ ବାହାରିବା ସମୟରେ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର୍ ବା ଏସ୍ଓପି ପାଳନ କରାଯାଇ ନ ଥିଲା କି ? ଅପରେସନ୍‌କୁ ଯିବା ପୂର୍ବରୁ କାହିଁକି ରୋଡ୍ ଓପନିଂ ପାଟ୍ରୋଲିଂ କରାଗଲାନି ? ବିଭିନ୍ନ ଦଳରେ ବିଭକ୍ତ ନ ହୋଇ ଏକାଠି ଗୋଟିଏ ଗାଡ଼ିରେ କାହିଁକି ଗଲେ ଯବାନ। ପୂର୍ବରୁ ମଧ୍ୟ ମାଓବାଦୀମାନେ ଓଡ଼ିଶା ଭଳି ଅନେକ ରାଜ୍ୟରେ ଏଭଳି ଢ଼ଙ୍ଗରେ ଅନେକ ଆଣ୍ଟି ଲ୍ୟାଣ୍ଡମାଇନ୍ ଭେଇକିଲ୍କୁ ବିସ୍ଫୋରଣ କରି ଉଡ଼ାଇଦେଇଥିବା ନଜିର ଅଛି । ଏହାସତ୍ତ୍ୱେ କାହିଁକି ଏଭଳି ଆଣ୍ଟି ଲ୍ୟାଣ୍ଡମାଇନ୍ ଭେଇକିଲକୁ ବାରମ୍ବାର ବ୍ୟବହାର କରାଯାଉଛି ? ଗତକାଲିର ଏହି ହିଂସାପରେ ମାଓବାଦୀଙ୍କ ମନୋବଳ ବଢିଥିବାର ପ୍ରାଣ ମିଳିଛି । ଆଜି ବି   ଛତିଶଗଡ଼ ବିଜାପୁର ଜିଲ୍ଲାରେ ଠିକା ସଂସ୍ଥାର ୭ଟି ଗାଡ଼ିକୁ ପୋଡ଼ିଦେବା ସହ ଦନ୍ତେୱାଡ଼ା ଅରନୁର ଜଙ୍ଗଲରେ ନିଜର ଉପସ୍ଥିତି ଜାହିର କରିଛନ୍ତି ଲାଲ୍ ବାହିନୀ।  ନକ୍ସଲଙ୍କ ଗୁଳିରେ ୩ ଯବାନ ଆହତ ହୋଇଥିବା ସୂଚନା ମିଳିଛି ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।