ତାରାଙ୍କ ପ୍ରେମିକା ମହେଶ୍ୱର ! ପରସ୍ପରକୁ ଦେଖି ଗାଇଲେ ରୋମାଣ୍ଟିକ୍ ଗୀତ, ଦେଖନ୍ତୁ ଭିଡିଓ

<p>ଭୁବନେଶ୍ୱର (ଓଡ଼ିଶା ରିପୋର୍ଟର): ଶୀର୍ଷକଟି ପଢ଼ି ଆପଣ ଆଶ୍ଚର୍ଯ୍ୟ ହୋଇଯାଇଥିବେ। ଭାବୁଥିବେ, ବିଜେଡି ସରକାରର ରାଜସ୍ୱମନ୍ତ୍ରୀ ମହେଶ୍ୱର ମହାନ୍ତି, ବିରୋଧୀ ଦଳର ମୁଖ୍ୟ ସଚେତକ ତଥା କଂଗ୍ରେସ ନେତା ତାରାପ୍ରସାଦ ବାହିନୀପତିଙ୍କ ପ୍ରେମିକା କେମିତି ହେଲେ? ଓଡ଼ିଶା ରାଜନୀତିରେ ଦୁଇ ପରସ୍ପର ବିରୋଧୀ ନେତା, ତା ପୁଣି ଦୁଇଜଣ ପୁରୁଷ, ପରସ୍ପରର ପ୍ରେମିକ ପ୍ରେମିକା ହେଲେ କେମିତି? ଆପଣଙ୍କ ପ୍ରଶ୍ନ ଠିକ୍ ହୋଇଥାଇ ପାରେ କିନ୍ତୁ ପ୍ରେମକୁ ଛାଡ଼ି ଆପଣ ରାଜନୀତି କଥା ଚିନ୍ତା କଲେ ସବୁକିଛି ସମ୍ଭବ ଲାଗିବ। କାରଣ ରାଜନୈତିକ ସମ୍ପର୍କରେ କିଛି ବି ଘଟିପାରେ। ପ୍ରକୃତ କଥାଟି ହେଲା, ରାଜସ୍ୱମନ୍ତ୍ରୀ ମହେଶ୍ୱର ମହାନ୍ତି ଓ କଂଗ୍ରେସ ନେତା ତାରାପ୍ରସାଦଙ୍କ ଭିତରେ ଥିବା ବନ୍ଧୁତ୍ୱ କେତେ ନିବିଡ଼, ଗୋଟିଏ ଲେଖାଁ ପୁରୁଣା ରୋମାଣଟିକ ଓଡ଼ିଆ ଓ ହିନ୍ଦୀ ଗୀତ ମାଧ୍ୟମରେ ଉଭୟ ପ୍ରକାଶ କରିଛନ୍ତି।</p> <p>ଓଡ଼ିଶା ରାଜନୀତିରେ ଜଣେ ଭିନ୍ନ ଅନ୍ଦାଜର ନେତା ହେଉଛନ୍ତି ତାରା ପ୍ରସାଦ ବାହିନୀପତି। ବିଭିନ୍ନ ସମୟରେ ସେ ବିଧାନସଭାକୁ ଯେମିତି ଦୁଲକାନ୍ତି, ସେମିତିକା ଜୋଶ୍&zwnj; ଷ୍ଟେଜ୍&zwnj;ରେ ବି ଦେଖିବାକୁ ମିଳେ। ତେବେ ରାଜନୀତିରେ ଯେତେ ମତଭେଦ ଥାଉନା କାହିଁକି, ଏହା ବାହାରେ ଯେ ସମ୍ପର୍କ ସରଳ ଓ ନିବିଡ଼ି, ତାକୁ ସେ ଅନେକଥର ପ୍ରମାଣ କରିଛନ୍ତି। ବିଭିନ୍ନ ସମୟରେ ବିରୋଧୀ ନେତାଙ୍କ ସହ ହସଖୁସି କରିବାର ଦୃଶ୍ୟ ରାଜ୍ୟବାସୀ ଦେଖିଛନ୍ତି। ତେବେ ସେହିକ୍ରମରେ ଏବେ ଆଉ ଏକ ବିରଳ ଦୃଶ୍ୟକୁ ନେଇ ସବୁଠି ଚର୍ଚ୍ଚା।</p> <p>ଦୃଶ୍ୟଟି ହେଉଛି, ବିଜେଡିର ମନ୍ତ୍ରୀ ମହେଶ୍ୱର ମହାନ୍ତି ଓ ବାଙ୍କିର ବିଜେଡି ବିଧାୟକ ପ୍ରଭାତ ତ୍ରିପାଠୀଙ୍କ ଗହଣରେ, ତାରାପ୍ରସାଦ ଗୀତ ବୋଲିବା। ଗୀତଟି ବି ଏମିତି ସେମିତି ଅର୍ଡିନାରି ଗୀତ ନୁହେଁ। ମହାଶୟ ଖୁବ୍&zwnj; ରୋମାଣ୍ଟିକ୍&zwnj; ମୁଡରେ ଥିବା ପରି ଲାଗୁଛନ୍ତି। ନହେଲେ ଏମିତି ଗୀତ ମୁଖରୁ ବାହାରିବା ସମ୍ଭବ ନୁହେଁ। ମହେଶ୍ୱରଙ୍କୁ ଲକ୍ଷ୍ୟ କରି ତାରା ଗାଇଛନ୍ତି- &lsquo;ମୋ ପ୍ରିୟାଠାରୁ କିଏ ଅଧିକ ସୁନ୍ଦର।&rsquo; ୭୦ ଦଶକର ବିଶିଷ୍ଟ ସଙ୍ଗୀତଜ୍ଞ ପ୍ରଫୁଲ୍ଲ କରଙ୍କ ଏହି ପ୍ରେମଭରା ଗୀତ ଗାଇ, ମହେଶ୍ୱରଙ୍କ ପ୍ରତି ତାଙ୍କର ଥିବା ଭଲ ପାଇବାକୁ ପରିପ୍ରକାଶ କରିଥିଲେ ତାରା। ପ୍ରତିଉତ୍ତରରେ ମହେଶ୍ୱର ମଧ୍ୟ ବଲିଉଡର ଏକ ରୋମାଣ୍ଟିକ୍ ଗୀତ ଗାଇ ତାରାଙ୍କ ପ୍ରତି ଥିବା ନିଜର ଭଲ ପାଇବା ଦେଖାଇ ଦେଇଥିଲେ। ସେ ଗାଇଥିଲେ ରାଜ କପୁରଙ୍କ ପ୍ରସିଦ୍ଧ ଗୀତ- ଦୋସ୍ତ ଦୋସ୍ତ ନା ରହା, ପ୍ୟାର ପ୍ୟାର ନା ରହା।&rsquo; ଏହାକୁ ନେଇ ଜମି ଉଠିଥିଲା ପରିବେଶ।</p> <p>ତାରା-ପ୍ରଭାତ-ମହେଶ୍ୱରଙ୍କ ଏହି ମିଳନ ସୋମବାର ସକାଳେ ମହେଶ୍ୱରଙ୍କ କାର୍ଯ୍ୟାଳୟରେ ଦେଖିବାକୁ ମିଳିଥିଲା। ତେବେ ହଠାତ୍&zwnj; ଏମିତି ରାଜନୈତିକ ମିଳନକୁ ନେଇ ଭିନ୍ନ ଭିନ୍ନ ଚର୍ଚ୍ଚା ହେଉଛି। କଥା ହେଉଛି, ଦୀର୍ଘଦିନ ଧରି ରାଜ୍ୟ କଂଗ୍ରେସ ମୁଖିଆ ପ୍ରସାଦ ହରିଚନ୍ଦନଙ୍କ ସହ ତାରାଙ୍କର ସମ୍ପର୍କ ଟିକେ ବଙ୍କାତେଢ଼ା ହୋଇ ରହିଛି। ପ୍ରସାଦଙ୍କୁ ପିସିସି ସଭାପତି ପଦରୁ ହଟାଇବା ପାଇଁ ତାରା ପ୍ରାଣପ୍ରଣେ ଉଦ୍ୟମ କରିଥିଲେ ବୋଲି ଚର୍ଚ୍ଚା ହେଉଛି। ଏ ସବୁ ଭିତରେ କଂଗ୍ରେସ ନେତାଙ୍କ ଦଳଛାଡ଼ିବା ପର୍ବ ଜାରି ରହିଛି। କଂଗ୍ରେସର ଅଧା ନେତା ବିଜେଡିରେ ମିଶିଗଲେଣି। ତେଣୁ ବିଜେଡି ଶିବିରରେ ତାରାଙ୍କୁ ଦେଖି ସାମ୍ବାଦିକ ଓ ରାଜନିତିଆ ଲୋକେ ନାନା କଥା କହୁଛନ୍ତି। ସମସ୍ତେ ସମସ୍ତଙ୍କୁ ପଚାରୁଛନ୍ତି- ଆଗକୁ କିଛି ଘଟିବ ନାହିଁ ତ?</p>