ଉଚ୍ଚ ଶିକ୍ଷାମନ୍ତ୍ରୀଙ୍କୁ ଭଲ ଲାଗିଲାନି ‘ପାଣ୍ଡିଆନ୍‌ ହାଏ ହାଏ’ ନାରା

ଭୁବନେଶ୍ୱର(ଓଡ଼ିଶା ରିପୋର୍ଟର): ଆନ୍ଦୋଳନରତ ଶିକ୍ଷକଙ୍କ ଟାର୍ଗେଟ୍‌ରେ ଅଣଓ଼ଡ଼ିଆ ଅଫିସର। ଗତକାଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବ୍ୟକ୍ତିଗତ ସଚିବ ଭି.କେ ପାଣ୍ଡିଆନ୍‌ ହାଏ ହାଏ ନାରା ଦେଇଥିଲେ ଆନ୍ଦୋଳନରତ ଶିକ୍ଷକ ଓ କର୍ମଚାରୀ। ଶିକ୍ଷକଙ୍କ ଏପରି ନାରାବାଜିକୁ ସହଜରେ ଗ୍ରହଣ କରିପାରୁ ନାହାନ୍ତି ଉଚ୍ଚ ଶିକ୍ଷାମନ୍ତ୍ରୀ। ଶିକ୍ଷକମାନେ ଠିକ୍‌ ଭାବେ ପାଠ ପଢାଇଲେ ଆଜି ଏଭଳି ଅବସ୍ଥା ଦେଖିବାକୁ ମିଳିନଥାଆନ୍ତା ମନ୍ତ୍ରୀ ମହୋଦୟ କହିଛନ୍ତି। ଖାଲି ସେତିକି ନୁହେଁ ମନ୍ତ୍ରୀ, ଅଣଓଡିଆ ଅଫିସରଙ୍କ ସପକ୍ଷରେ ବି ବାହାରି ତାଙ୍କ କାମକୁ ପ୍ରଶଂସା ମଧ୍ୟ କରିଥିଲେ।

ଉଚ୍ଚ ଶିକ୍ଷାମନ୍ତ୍ରୀ ଅନନ୍ତ ଦାସ କହିଛନ୍ତି-“ଓଡ଼ିଶାରେ ଅଣଓଡ଼ିଆ ଅଫିସରମାନେ ଯଦି ଅଧିକ ଅଛନ୍ତି, ସେଥିପାଇଁ ଶିକ୍ଷକମାନେ ଦାୟୀ। ଶିକ୍ଷକମାନେ ଠିକ୍‌ ଭାବେ ପାଠ ପଢ଼ାଇଥିଲେ ଆଜି ଏହି ଅବସ୍ଥା ଦେଖିବାକୁ ମିଳିନଥାଆନ୍ତା। ଶାସନ ଚଳାଇବାକୁ ହେଲେ ଅଣଓଡ଼ିଆ ଅଫିସରମାନେ ଆସିବେ। ତେବେ ସବୁ ଅଣଓଡ଼ିଆ ଅଫିସର ଖରାପ କରୁଛନ୍ତି, ତାହା ଠିକ୍‌ ନୁହଁ। ସେମାନେ ମଧ୍ୟ ଭଲ କାମ କରୁଛନ୍ତି।”

ଆଜି ଦ୍ୱିତୀୟ ଦିନରେ ମଧ୍ୟ ଜାରି ରହିଛି ଓଡିଶା ସ୍କୁଲ୍ କଲେଜ ଶିକ୍ଷକ କର୍ମଚାରୀ ମିଳିତ ମଞ୍ଚର ଆନ୍ଦୋଳନ। ଆଜି ଯଦିଓ  ଆନ୍ଦୋଳନର ତରିକା ଟିକେ ନରମ ଥିଲା, କିନ୍ତୁ ଦାବି ହାସଲର ତାତି ସମାନ ରହିଥିବା ଦେଖିବାକୁ ମିଳିଥିଲା। ଏଭଳି ସମୟରେ ଶିକ୍ଷକଙ୍କ ଆନ୍ଦୋଳନର ନିଆଁରେ ଘିଅ ଢାଳିଛି ଉଚ୍ଚ ଶିକ୍ଷାମନ୍ତ୍ରୀଙ୍କ ଅଣଓଡ଼ିଆ ଆଇଏଏସଙ୍କୁ ସମର୍ଥନ। ଦାବି ପୂରଣ ନହେଲେ ଆସନ୍ତା ପରୀକ୍ଷା ଓ ବିଜେପୁର ଉପନିର୍ବାଚନରେ ଜବାବ ଦିଆଯିବ ବୋଲି ପୁଣି ଚେତାବନୀ ଦେଇଛି ଶିକ୍ଷକ ସଂଘ।