ବଲାଙ୍ଗିର (ସସ୍ମିତା ସାହୁ): ଦୀର୍ଘ ୩ ମାସ ଧରି ତତଲା ତାୱା ପରି ସିଝୁଥିଲା ବଲାଙ୍ଗିର ସହରର ଲୋକଙ୍କୁ କିଛି ଆସ୍ୱସ୍ତି ମିଳିଛି। କାଳ ବୈଶାଖୀ ହେଉ କି ପ୍ରାକ୍ ମୌସୁମୀର ପ୍ରଭାବରେ ବର୍ଷା, ବଲାଙ୍ଗିର ସହରର ତାପମାତ୍ରା କିଛି ପରିମାଣରେ ହ୍ରାସ ପାଇଛି। ଗତ ଦୁଇଦିନ ହେବ ଜିଲ୍ଲାର ବିଭିନ୍ନ ସ୍ଥାନରେ ଅଳ୍ପ ବହୁତ ବର୍ଷା ହୋଇଛି। ଫଳରେ ତାପମାତ୍ରା କମିଛି।
ସୂଚନାଯୋଗ୍ୟ, ଚଳିତବର୍ଷ ବଲାଙ୍ଗିରରେ ଅସହ୍ୟ ଗରମ ହେଉଥିଲା। ୩ ମାସ ହେବ ବଲାଙ୍ଗିର ତାପମାତ୍ର ପ୍ରାୟତଃ ୪୦ ଡିଗ୍ରୀ ସେଲସିୟସ ଉପରେ ରହୁଥିଲା। ଫଳରେ ଲୋକେ ନାହିଁ ନଥିବା ସମସ୍ୟାର ସମ୍ମୁଖୀନ ହେଇଥିଲେ। ଦିନ ୯ଟା ପରେ ଘରୁ ବାହାରିବା କଷ୍ଟକର ହୋଇଯାଉଥିଲା। ଅତ୍ୟନ୍ତ ଜରୁରୀ କାମ ନଥିଲେ, ଲୋକେ ଘରୁ ବାହାରକୁ ଯିବାକୁ ଲୋକେ ଉଚିତ ମଣୁ ନଥିଲେ। ଦିନ ୧୧ଟା ପରେ ରାସ୍ତାଘାଟ ଶୂନଶାନ ହୋଇଯିବା ସହ ଦୋକାନ ବଜାର ବନ୍ଦ ହୋଇଯାଉଥିଲା। ଏବେ ବର୍ଷା ଆରମ୍ଭ ହୋଇଯାଇଥିବାରୁ ଲୋକଙ୍କ ମଧ୍ୟରେ ଆନନ୍ଦ ପ୍ରକାଶ ପାଇଛି। ତାପମାତ୍ରା ଟିକେ କମିଥିବାରୁ ଜିଲ୍ଲାରେ ସ୍ୱାଭାବିକ ସ୍ଥିତି ଫେରୁଥିବା ଦେଖିବାକୁ ମିଳିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
