ପାରାଦୀପ(ରମାକାନ୍ତ ନାୟକ): ପାରାଦୀପରେ JSW କାରଖାନା ଓ ଉତ୍କଳ ଷ୍ଟିଲ୍ ପ୍ଲାଣ୍ଟ ପାଇଁ ଜନ ଶୁଣାଣି ବେଳେ ଉତ୍ତେଜନା ପ୍ରକାଶ ପାଇଛି। ଜନ ଶୁଣାଣିକୁ ସ୍ଥାନୀୟ ଲୋକଙ୍କ ପ୍ରବଳ ବିରୋଧ କରିଛନ୍ତି। ପ୍ରକଳ୍ପକୁ ବିରୋଧ କରୁଥିବା ଗ୍ରାମବାସୀ ଓ ପୁଲିସ ମଧ୍ୟରେ ଠେଲାପେଲା ହୋଇଛି।
JSW ଇଣ୍ଟିଗ୍ରେଟେଡ୍ ପ୍ଲାଣ୍ଟ ସ୍ଥାପନ ଲାଗି ଆବଶ୍ୟକ ପରିବେଶ ମଞ୍ଜୁରି ପାଇଁ ଜଗତସିଂହପୁର ଜିଲ୍ଲା ଗଡ଼କୁଜଙ୍ଗ ରଥଦାଣ୍ଡରେ ଜନଶୁଣାଣି ବେଳେ ଏହି ଉତ୍ତେଜନା ଦେଖାଦେଇଛି। JSW ସଂଗ୍ରାମ ସମିତି, ଢ଼ିଙ୍କିଆ ପଞ୍ଚାୟତବାସୀ, ନୂଆଗାଁ ର କେତେକ ଜଙ୍ଗଲ କମିଟି ଏବଂ ନୋଳିଆସାହି ବାସିନ୍ଦା ପ୍ରକଳ୍ପକୁ ବିରୋଧ କରି ଜନଶୁଣାଣୀକୁ ବର୍ଜନ କରିଛନ୍ତି।
ପସ୍କୋ କାରଖାନା ପ୍ରତିଷ୍ଠା ପାଇଁ ରାଜ୍ୟ ସରକାର ଚୁକ୍ତି କରିଥିଲେ। ଏଥିପାଇଁ ଜମି ଜବରଦଖଲ କରାଯାଇଛି। ମାତ୍ର ସ୍ଥାନୀୟ ଲୋକଙ୍କ ପ୍ରବଳ ବିରୋଧ ଯୋଗୁଁ କାରଖାନା ପ୍ରତିଷ୍ଠା ହୋଇପାରିଲା ନାହିଁ। ଫଳରେ ଫେରିଗଲା ପସ୍କୋ। ଏବେ ସେହି ଜାଗାରେ JSW କାରଖାନା ପ୍ରତିଷ୍ଠା କରିବ। ଏବେ JSW କୁ ମଧ୍ୟ ବିରୋଧ କରାଯାଉଛି। ଯେଉଁଥିପାଇଁ ଆଜି ଉତ୍ତେଜନା ପରିସ୍ଥିତି ସୃଷ୍ଟି ହୋଇଛି।