ଢେଙ୍କାନାଳ(ରାଜଶ୍ରୀ ଶତପଥୀ): ଜମା ଟଙ୍କା ଫେରସ୍ତକୁ ନେଇ ଢେଙ୍କାନାଳ ସାହାରା ଇଣ୍ଡିଆ ଅଫିସରେ ତୁମୁଳକାଣ୍ଡ ଘଟିଯାଇଛି। ନିଜ ପଲିସି ମାଚ୍ୟୁରିଟି ଟଙ୍କା ପାଇଁ ଆସିଥିବା ଜଣେ ଗ୍ରାହକଙ୍କୁ ଅଫିସ ଷ୍ଟାଫ ଭିତର ପଟୁ ତାଲା ପକାଇ ରଖିଥିଲେ। ଖବର ପାଇ ଗ୍ରାହକଙ୍କ ସ୍ତ୍ରୀ ୩ ଘଣ୍ଟା ଧରି ବାହାରପଟୁ ଗ୍ରୀଲ୍ରେ ଆଉ ତାଲା ପକାଇ ରଖିଲେ। ପରେ ଢେଙ୍କାନାଳ ଟାଉନଥାନା ପୁଲିସ୍ ପହଞ୍ଚି ମଧ୍ୟସ୍ଥତା କରିବାରୁ ଦୀର୍ଘ ୩ଘଣ୍ଟା ପରେ ବ୍ୟାଙ୍କ କର୍ମଚାରୀ ଓ ଗ୍ରାହକ ମୁକୁଳିଥିବା ଜଣାଯାଇଛି।
ସୂଚନା ଅନୁଯାୟୀ, ଢେଙ୍କାନାଳ ସହରର ଦେଉଳସାହିରେ ରହୁଥିବା ଯଶୋବନ୍ତ ପାଣିଗ୍ରାହୀ ନିଜ ସ୍ତ୍ରୀଙ୍କ ମ୍ୟାଚୁରିଟି ଟଙ୍କା ସମ୍ପର୍କରେ ବୁଝିବା ପାଇଁ ଗତକାଲି ସନ୍ଧ୍ୟା ୭ଟା ସମୟରେ ସାହାରା ଇଣ୍ଡିଆ ଅଫିସ ଯାଇଥିଲେ । ହେଲେ ମ୍ୟାନେଜର ତାଙ୍କ ସହିତ କଥା ନ ହୋଇ ଚା ପିଇବା ବାହାନାରେ ବାହାରକୁ ପଳାଇଥିଲେ । ପରେ ଅଫିସ୍ ଷ୍ଟାଫ ଯଶୋବନ୍ତଙ୍କୁ ଭିତରପଟୁ ତାଲା ପକାଇ ରଖିଥିଲେ।
ଯଶୋବନ୍ତଙ୍କ ସ୍ତ୍ରୀ ଘଟଣା ସମ୍ପର୍କରେ ଖବର ପାଇ ନିଜ ସ୍ୱାମୀଙ୍କ ସମେତ ସମସ୍ତ ଷ୍ଟାଫଙ୍କୁ ବାହାରପଟୁ ତାଲା ପକାଇ ଦେଇଥିଲେ। ଦୀର୍ଘ ୩ ଘଣ୍ଟା ପରେ ରାତି ସାଢେ ଦଶଟା ବେଳକୁ ଟାଉନ ଥାନା ପୁଲିସ୍ ଖବର ପାଇ ଘଟଣାସ୍ଥଳରେ ପହଞ୍ଚି ମଧ୍ୟସ୍ଥତା କରିବାରୁ ଘଟଣାର ସର୍ତ୍ତମୂଳକ ସମାଧାନ ହୋଇଥିଲା ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
