କୁମ୍ଭୀରକୁ ଚକମା ଦେଇ ଖସି ଆସିଲେ ଯୁବକ

ପଟ୍ଟାମୁଣ୍ଡାଇ(ପ୍ରବୀର କୁମାର ନାୟକ): ନଦୀକୁ ଯାଇଥିବା ବେଳେ ଟାଣିନେଲା କୁମ୍ଭୀର। ହେଲେ ଉପସ୍ଥିତ ବୁଦ୍ଧି ଖଟାଇ କୁମ୍ଭୀର ମୁହଁରୁ ବର୍ତ୍ତି ଆସିଲେ ଯୁବକଜଣକ। ଏପରି ଅଭାବନୀୟ ଘଟଣା ଆଜି ସକାଳୁ  କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇ ଥାନା ଅନ୍ତର୍ଗତ ନିମପୁର ଗାଁରେ ଘଟିଛି। କୁମ୍ଭୀର ମୁହଁରୁ ବର୍ତ୍ତି ଆସିଥିବା ଯୁବକଜଣକ ହେଲେ ନିମପୁର ଗାଁର ବୃନ୍ଦାବନ ଭୂୟାଁ ।

ସୂଚନା ଅନୁଯାୟୀ, ଆଜି ବଡି ଭୋରୁ ଶୌଚ ହେବା ପାଇଁ ବୃନ୍ଦାବନ ଗାଁ ନିକଟ ବ୍ରାହ୍ମଣୀ ନଦୀ କୂଳକୁ ଯାଇଥିଲେ । ସେଠାରେ ସେ ପାଣିକୁ ଯାଇଥିବା ବେଳେ ହଠାତ୍‌ ଏକ କୁମ୍ଭୀର ତାଙ୍କ ଉପରକୁ ଝାମ୍ପ ମାରିଲା। ମାତ୍ର କୁମ୍ଭୀର ସହ ଲଢ଼େଇ କରି କୌଶଳ କ୍ରମେ ବୃନ୍ଦାବନ ପାଣି ଉପରକୁ ଚାଲି ଆସିଲେ।

ଏହାପରେ ତାଙ୍କ ଚିତ୍କାର ଶୁଣି ସ୍ଥାନୀୟ ଲୋକେ ପହଞ୍ଚି ତାଙ୍କୁ ପ୍ରଥମେ ପଟ୍ଟାମୁଣ୍ଡାଇ ସ୍ୱାସ୍ଥ୍ୟ କେନ୍ଦ୍ରରେ  ଭର୍ତ୍ତି କରିଥିଲେ ଓ ପରେ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ l ତାଙ୍କ ଅବସ୍ଥା ସ୍ଥିର ଥିବା ଜଣା ପଡିଛି l

ସୂଚନାଯୋଗ୍ୟ, ବ୍ରାହ୍ମଣୀ ନଦୀରେ କୁମ୍ଭୀର ରହୁଥିବାରୁ ସ୍ଥାନୀୟ ଲୋକେ ବହୁ ସମୟରେ ସେମାନଙ୍କ ଆକ୍ରମଣରେ ପ୍ରାଣ ହରାଉଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।