ଚୂନମାଟି ଖୋଳିବାକୁ ଯାଇ ଅଭାବନୀୟ ଘଟଣା: ମାଟି ଅତଡ଼ା ଖସି ୩ ମୃତ, ୨ ଗୁରୁତର

କୋରାପୁଟ(ଓଡ଼ିଶା ରିପୋର୍ଟର):କୋରାପୁଟ ଜିଲ୍ଲାରେ ଅଭାବନୀୟ ଘଟଣା ଘଟିଛି। କରଞ୍ଜିଗୁଡ଼ା ପାହାଡ଼ରେ ଚୂନମାଟି ଅତଡ଼ା ଖସି ୩ ଜଣଙ୍କର ମୃତ୍ୟୁ ଘଟିଥିବା ବେଳେ ୨ ଜଣ ଗୁରୁତର ହୋଇଛନ୍ତି। ମୃତକଙ୍କ ମଧ୍ୟରେ ୨ ଜଣ ମହିଳା ଥିଲା ବେଳେ ଜଣେ ପୁରୁଷ ଅଛନ୍ତି।

ପଟ୍ଟାଙ୍ଗି ବ୍ଲକ ଅନ୍ତର୍ଗତ ଚନ୍ଦକା ପଞ୍ଚାୟତର ଦଳପତିଗୁଡା ଗାଁର ୧୦ ଜଣ ଚୂନ ମାଟି ଆଣିବା ପାଇଁ କରଂଜଗୁଡା ପାହାଡ଼କୁ ଯାଇଥିଲେ। ମାଟି ଖୋଳିବା ସମୟରେ ହଠାତ ମାଟିଅତଡା ଖସି ସେମାନଙ୍କ ଉପରେ ପଡ଼ିଥିଲା। ଫଳରେ ଚମ୍ପା ପେଲେସି (୧୮), ଜୟନ୍ତୀ ପେଡକାପୁ(୨୬) ଓ ମୁନା ନାୟକ(୨୭)ଙ୍କ ମୃତ୍ୟୁ ଘଟିଥିବା ବେଳେ ପାଲେସି ଦାନୟା(୩୫) ଓ ପାଲେସି ଧାନମୋତି(୧୭) ଗୁରୁତର ଆହତ ହୋଇଥିଲେ। ସେମାନଙ୍କୁ ଉଦ୍ଧାର କରାଇଯାଇ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ସେଠାରେ ସେମାନଙ୍କ ସ୍ୱାସ୍ଥ୍ୟ ଅବସ୍ଥା ଗୁରୁତର ହେବାରୁ ପଟ୍ଟାଙ୍ଗି ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିଲା। ତେବେ ଅନ୍ୟମାନେ ସୁରକ୍ଷିତ ଭାବେ ଉଦ୍ଧାର ହୋଇଥିଲେ।

ପୂର୍ବତନ ସାଂସଦ ଜୟରାମ ପାଙ୍ଗି ହସ୍ପିଟାଲରେ ପହଞ୍ଚି ଗୁରୁତର ଆହତଙ୍କୁ ଭେଟିଛନ୍ତି।