ରାତିରେ ଶୋଇଥିଲା ବେଳେ ଲାଗିଗଲା ନିଆଁ; ପୋଡ଼ି ଯାଇଛନ୍ତି ବାପା, ମା’ ଓ ଝିଅ

ପିପିଲି(ଓଡ଼ିଶା ରିପୋର୍ଟର): ପୁରୀ ଜିଲ୍ଲା ପିପିଲି ଦାନଗୋହିରି ଗାଁରେ ଏକ ଅଭାବନୀୟ ଘଟଣା ଘଟିଛି। ଗୋଟିଏ ପରିବାରର ବାପା, ମାଆ ଓ ଝିଅ ନିଆଁରେ ପୋଡ଼ି ହୋଇ ଗୁରୁତର ଆହତ ହୋଇଛନ୍ତି। ଗତକାଲି ରାତି ପ୍ରାୟ ଗୋଟାଏ ବେଳେ ମହମ୍ମଦ ଅବୁଲ(୬୫)ଙ୍କ ଆଜବେଷ୍ଟ ଘରେ ହଠାତ୍ ନିଆଁ ଲାଗି ଯାଇଥିଲା। ଏଥିରେ ଅବୁଲଙ୍କ ସମେତ ତାଙ୍କ ସ୍ତ୍ରୀ ରହିମା ବିବି ଓ ତାଙ୍କ ୧୨ ବର୍ଷୀୟା ଝିଅ ନାଜୋ ବେଗମ ଗୁରୁତର ଆହତ ହୋଇଛନ୍ତି। ସେମାନଙ୍କ ଶରୀରର ୯୦ ପ୍ରତିଶତ ପୋଡ଼ିଯାଇଛି। ଏହାସହ ଘରର ଆସବାବପତ୍ର ଓ ଦୁଇଟି ଗାଡ଼ି ମଧ୍ୟ ପୋଡ଼ି ଯାଇଛି।

ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ସେମାନଙ୍କୁ ଉଦ୍ଧାର କରିଥିଲେ। ଆହତଙ୍କୁ ପ୍ରଥମେ ପିପିଲି ପରେ ଭୁବନେଶ୍ୱର ସ୍ଥିତ କ୍ୟାପିଟାଲ ହସ୍ପିଟାଲ ଓ ଶେଷରେ କଟକ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି। ତିନି ଜଣଙ୍କ ଅବସ୍ଥା ସଙ୍କଟାପନ୍ନ ରହିଛି। ଅଗ୍ନିକାଣ୍ଡର କାରଣ ଜଣାପଡ଼ିନି। ପୋଲିସ ଘଟଣାର ତଦନ୍ତ କରୁଛି।