ଏମିତି ଆସିଲା ମଧ୍ୟପ୍ରଦେଶରୁ ଓଡ଼ିଶା, ଦେଖନ୍ତୁ ଭିଡିଓ

ଭୁବନେଶ୍ୱର(ଓଡିଶା ରିପୋର୍ଟର): କାହ୍ନା କୋଳରୁ ସାତକୋଶିଆ ଆସିଛି ମହାବଳ। ୨୪ ଘଣ୍ଟାରେ ଅତି ଯତ୍ନର ସହ ଯାତ୍ରାପଥ ଅତିକ୍ରମ କରିବା ପରେ ସେ ଆସିଛି ଓଡିଶା। ମଙ୍ଗଳବାର ଅପରାହ୍ନ ପ୍ରାୟ ୩ଟା ବେଳେ ହାତୀ ପିଠିରେ ବସି ବାଘକୁ ଟ୍ରାଙ୍କୁଲାଇଜ୍ କରିଥିଲେ ବିଶେଷଜ୍ଞ ଦଳ। ଏହା ପରେ ଅତି ସାବଧାନତାର ସହ ତାକୁ ସ୍ୱତନ୍ତ୍ର ଷ୍ଟ୍ରେଚରରେ ଆଣି ଯନ୍ତାରେ ରଖାଯାଇଥିଲା । ଏହି ଯନ୍ତାକୁ ସ୍ୱତନ୍ତ୍ର ଗାଡ଼ିରେ ଅଣାଯାଇଛି ଓଡ଼ିଶା । ୱାଇଲ୍ଡ ଲାଇଫ୍ ଇନ୍‌ଷ୍ଟିଚ୍ୟୁଟ୍‌ ଅଫ୍ ଇଣ୍ଡିଆର ବିଶେଷଜ୍ଞ, ମଧ୍ୟପ୍ରଦେଶ ଓ ଓଡ଼ିଶା ପ୍ରାଣୀ ବିଜ୍ଞାନୀଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏହି କାର୍ଯ୍ୟ କରାଯାଇଥିଲା। ଏହାପରେ ଆରମ୍ଭ ହୋଇଥିଲା ବାଘର ଐତିହାସିକ ଯାତ୍ରା । ଅଧା ରାସ୍ତା ଅତିକ୍ରମ କରି ରାୟପୁରରେ ରହିବା ପରେ ଆଜି ବାଘ ସାତକୋଶିଆରେ ପହଞ୍ଚିଥିଲା।

ପୂରାପରି ନିସ୍ତେଜ ଅବସ୍ଥାରେ ତାକୁ ରାଜ୍ୟପାର କରି ଏଠାରେ ଆଣି ପହଞ୍ଚାଇଛି ବନବିଭାଗ। ଯାହାକି ଥିଲା ଆମ ଦେଶରେ ପ୍ରଥମ ଆନ୍ତଃରାଜ୍ୟ ବ୍ୟାଘ୍ର ସ୍ଥାନାନ୍ତର ବ୍ୟବସ୍ଥା । ହ୍ରାସ ପାଉଥିବା ବ୍ୟାଘ୍ର ବଂଶର ପୁନରୁଦ୍ଧାର ଲାଗି ଏଭଳି ପଦକ୍ଷେପ ନିଆଯାଇଛି। ଆଗକୁ ଏଠାରେ ଅଧିକ ସଂଖ୍ୟକ ବାଘ ଛଡ଼ାଯିବା ସହ ପ୍ରଜନନ ଦ୍ୱାରା ସେମାନଙ୍କ ବଂଶବୃଦ୍ଧି ଲାଗି ଉଦ୍ୟମ କରାଯିବ। ସେପଟେ ଗଣନା ଅନୁସାରେ ରାଜ୍ୟରେ ୪୦ଟି ବାଘ ଥିବାବେଳେ ଏହି ମହାବାଳର ଆଗମନ ପରେ ସଂଖ୍ୟା ଏବେ ୪୧କୁ ବୃଦ୍ଧି ପାଇଛି ।

ନୂଆ ଅତିଥି ଲାଗି କେମିତି ହୋଇଛି ବ୍ୟବସ୍ଥା

ଏପଟେ ସାତକୋଶିଆରେ ବାଘ ପାଇଁ ତିଆରି ହୋଇଛି ସ୍ୱତନ୍ତ୍ର ଖୁଆଡ଼ା ବା ଏନ୍‌କ୍ଲୋଜର। କାହ୍ନାର ପରିବେଶ ସହ ସନ୍ତୁଳନ ରକ୍ଷା କରି ସାତକୋଶିଆର ଏକ ନିର୍ଦ୍ଦିଷ୍ଟ ଅଞ୍ଚଳରେ ଏହି ଖୁଆଡ଼ କରାଯାଇଛି । ବାଘ ପାଇଁ ଆବଶ୍ୟକ ଖାଦ୍ୟ ମଧ୍ୟ ପ୍ରସ୍ତୁତ ରହିଛି। କିଛିଦିନ ବାଘକୁ ଏନ୍‌କ୍ଲୋଜରରୁ ଜଙ୍ଗଲ ଭିତରକୁ ଛଡ଼ାଯିବା ଗତିବିଧି ଅନୁଧ୍ୟାନ ପାଇଁ ବାଘ ଦେହରେ ଜିପିଏସ୍  ଉପକରଣ ଲଗାଯିବ। ସାତକୋଶିଆରେ ଥିବା ଜଙ୍ଗଲୀ ହାତୀଙ୍କ ସହ ବାଘ କେମିତି ରହୁଛି ତା ଉପରେ ବନ୍ୟପ୍ରାଣୀ ବିଶେଷଜ୍ଞଙ୍କ ନଜର ରହିବ। ସେପଟେ ସାତକୋଶିଆରେ ବାଘ ଛଡାଯିବାକୁ ନେଇ ବନବିଭାଗ ଉତ୍ସାହିତ ଥିବା ବେଳେ ଅଭୟାରଣ୍ୟ ଅ଼ଞ୍ଚଳରେ ରହୁଥିବା ଲୋକେ କିନ୍ତୁ ଆତଙ୍କିତ ହୋଇପଡିଛନ୍ତି।