ଏକା ଏକା କୌଶଲ୍ୟା: ସୁଖ ଲୁଟିନେଲା ସଡ଼କ ଦୁର୍ଘଟଣା

<p>ସୁନ୍ଦରଗଡ଼,(ବିଜୟ ବରୁଆ): ଚାଲିବାକୁ ଶକ୍ତି ନାହିଁ କି ଉଠିବାକୁ ଅଣ୍ଟାରେ ବଳ ନାହିଁ। ଆଖି ଦୁଇଟା କୋରଡ଼ ଭିତରକୁ ପଶିଯାଇଛି। ଚମ ଧୁଡ଼ୁଧୁଡ଼ୁ ପଡ଼ିଯାଇଛି । ବୟସ ବି ସାଥ ଦେଉନି। &nbsp;ହେଲେ ଜୀବନର ଭାର ଯେତେ ଭାରି ହେଲେ ମଧ୍ୟ ସହିବାକୁ ପଡ଼ିବ। ଆଉ ପ୍ରାଣରେ ଆତ୍ମା ଥିବା ଯାଏ ଜୀବନ ଗାଡ଼ିକୁ ଆଗକୁ ବଢାବାକୁ ପଡ଼ିବ। ଏ କଥାକୁ ମର୍ମେ ମର୍ମେ ଅନୁଭବ କରିଛନ୍ତି &nbsp;କୌଶଲ୍ୟା। ବୟସର ସାୟାହ୍ନରେ ପାଦ ଥାପିଥିବା କୌଶଲ୍ୟା ଏବେ ନିଜ ଜୀବନ ନୌକାରେ ନିଜେ ନାଉରୀ। ଯେଉଁ ବୟସରେ ପରିବାରର ପୁଅ ନାତିଙ୍କୁ ଅଶାବାଡ଼ି କରି ଚାଲିବା କଥା ସେହି ବୟସରେ ସେ ଏକା ଏକା। କାରଣ ସଡ଼କ ଦୁର୍ଘଟଣା ହିଁ&nbsp; କୌଶଲ୍ୟାଙ୍କୁ &nbsp;ଏକା କରିଛି। ସୁଖ ଲୁଟିନେଇଯାଛି, ଦେଇଯାଇଛି ଅସରନ୍ତି ଦୁଃଖ। ସଚେତନତା ଅଭାବରୁ କେମିତି ଗୋଟିଏ ପରିବାରର &nbsp;ହସଖୁସି ସବୁ ଉଜୁଡ଼ି ଯାଇପାରେ ତା&rsquo;ର ଉଦାହରଣ ହେଉଛନ୍ତି କୌଶଲ୍ୟା। ଦୁର୍ଘଟଣା କିପରି ଗୋଟିଏ ପରିବାରକୁ ଛାରଖାର କରିଦିଏ ତାହା ସୁନ୍ଦରଗଡ଼ ଜିଲ୍ଲା ଗମ୍ଭେରଡିହି ଗ୍ରାମର କୌଶଲ୍ୟା ନାଏକଙ୍କୁ ଦେଖିଲେ ଜାଣି ହୁଏ।</p> <p>କୌଶଲ୍ୟା ନାଏକ। ବୟସ ପାଖାପାଖି ୯୦ ହେବ। ଏଇ ବୟସରେ ସେ ସମ୍ପୂର୍ଣ୍ଣ ଏକାକୀ ଓ ବେସାହାରା। ୨୦୧୭ ସେପଟେମ୍ୱର ୯ ତାରିଖରେ ମା&rsquo;ର ଶ୍ରାଦ୍ଧ ବାର୍ଷିକୀ ପାଇଁ ସଉଦା କିଣିବା ଲାଗି ସୁନ୍ଦରଗଡ଼ ଆସିଥିଲେ କୌଶଲ୍ୟାଙ୍କ ନାତି ସୂର୍ଯ୍ୟକାନ୍ତ। ହେଲେ ବାଟରେ ଯମ ଅପେକ୍ଷା କରିଥିଲେ। ସଡ଼କ ଦୁର୍ଘଟଣାରେ ଚାଲିଗଲା ନାତିର ଜୀବନ। ତାଙ୍କ ମୃତ୍ୟୁ ପରେ ନବବିବାହିତା ସ୍ତ୍ରୀ ଘର ଛାଡ଼ି ପଳାଇଲା। ଠିକ୍&zwnj; ୬ ମାସ ପରେ ବାପା ମଧ୍ୟ ଏ ସଂସାର ଛାଡ଼ି ଚାଲିଗଲେ। &nbsp;ବର୍ତ୍ତମାନ ପରିବାର କହିଲେ ଏକା ଆଇ ବୁଢ଼ି କୌଶଲ୍ୟା। କେବଳ ଏହି ପରିବାର ନୁହେଁ ସୁନ୍ଦରଗଡ଼ ସହରର ମୋହମ୍ମଦ ମୋଇନ ମଧ୍ୟ ସମାନ ସମସ୍ୟା&nbsp; ଭୋଗୁଛନ୍ତି। ଆଜି ବି ଭୁଲିପାରିନାହାନ୍ତି ସେଇ ଦିନକୁ। &nbsp;ଯେଉଁଦିନ ତାଙ୍କ ପୁଅ ମହମ୍ମଦ ୱାସିମଙ୍କର ଦୁର୍ଘଟଣାରେ ମୃତ୍ୟୁ ହୋଇଥିଲା।</p> <p>ପରିବାର ର ସାହାରା ସାଜିଥିବା ପୁଅ ଚାଲିଗଲା ପରେ କ&rsquo;ଣ ସ୍ଥିତି ହୁଏ ତାହା ମହମ୍ମଦ ମୋଇନଙ୍କ ଠାରୁ ଅଧିକ ଆଉ କିଏ ଜାଣିବ। ସବୁ ବେଳେ ହାତରେ ଫଟୋ ଧରି ପୁଅକୁ ଝୁରୁଛନ୍ତି ମୋଇନ। ଗତ ବର୍ଷକ ମଧ୍ୟରେ ସୁନ୍ଦରଗଡ଼ ଜିଲ୍ଲାରେ ୬ ଶହ ଦୁର୍ଘଟଣାରେ ୮ ଶହ ରୁ ଉର୍ଦ୍ଧ ଲୋକ ପ୍ରାଣ ହରାଇଛନ୍ତି। ଆଉ ଏଥିରେ ୮୦ ପ୍ରତିଶତ ହେଉଛି ବାଇକ୍&zwnj; ଦୁର୍ଘଟଣାଜନିତ। ମଦ୍ୟପାନ କରି ଦ୍ରୁତଗତିରେ ବାଇକ ଚଳାଇବା ସହି ହେଲମେଟ ନପିନ୍ଧିବା ଯୋଗୁଁ ଦୁର୍ଘଟଣା ରେ ବାଇକ ଚାଳକଙ୍କର ମୃତ୍ୟୁ ହୋଇଛି। ଏବେ ଚାଲିଛି &nbsp;ସଡ଼କ ସୁରକ୍ଷା ସପ୍ତାହ। ପୋଲିସ ଏବଂ ପରିବହନ ବିଭାଗ ପକ୍ଷରୁ ଲୋକଙ୍କୁ ସଚେତନ କରାଯାଉଛି। ହେଲେ ଯେତେ ଯାହା ତଥାପି ସଚେତନ ହୋଇପାରୁନାହାନ୍ତି ଲୋକେ। ପ୍ରତିଦିନ ଦୁର୍ଘଟଣା ଘଟୁଛି । ଆଉ ଯାଉଛି ଜୀବନ ।</p>