ଟ୍ରକ୍‌ ଧର୍ମଘଟ ପ୍ରତ୍ୟାହୃତ

ଭୁବନେଶ୍ୱର(ଓଡ଼ିଶା ରିପୋର୍ଟର): ସପ୍ତାହେ ଧରି ଚାଲିଥିବା ଟ୍ରକ୍ ଧର୍ମଘଟ ପ୍ରତ୍ୟାହୃତ ହୋଇଛି। ଗତକାଲି କେନ୍ଦ୍ର ସଡ଼କ ପରିବହନ ଓ ରାଜମାର୍ଗ ମନ୍ତ୍ରାଳୟ ଏବଂ ଅଲ୍‌ ଇଣ୍ଡିଆ ମୋଟର ଟ୍ରାନ୍ସପୋର୍ଟ କଂଗ୍ରେସ (ଏଆଇଏମ୍‌ଟିସି) ମଧ୍ୟରେ ଦୀର୍ଘ ସମୟ ଧରି ଆଲୋଚନା ହୋଇଥିଲା। ସଂଘର ବିଭିନ୍ନ ଦାବିକୁ ପୂରଣ କରାଯିବାକୁ ସରକାର ପ୍ରତିଶ୍ରୁତି ଦେବା ପରେ ଗତକାଲିଠୁ ଧର୍ମଘଟ ପ୍ରତ୍ୟାହୃତ ହୋଇଥିବା ଏଆଇଏମ୍‌ଟିସି ପକ୍ଷରୁ ସୂଚନା ଦିଆଯାଇଛି।

ଜାତୀୟ ରାଜପଥରୁ ଟୋଲ୍‌ ଉଚ୍ଛେଦ, ଥାର୍ଡ ପାର୍ଟି ଇନ୍‌ସ୍ୟୁରାନ୍ସ ପ୍ରିମିୟମ ହ୍ରାସ, ଟ୍ରକ୍ ଡ୍ରାଇଭର ଓ ହେଲପର୍‌ଙ୍କୁ ସାମାଜିକ ସୁରକ୍ଷା ଯୋଜନାରେ ଅନ୍ତର୍ଭୁକ୍ତ କରିବା ଭଳି ୮ ଦଫା ଦାବି ନେଇ ଗତ ୨୦ ତାରିଖରୁ ଏଆଇଏମ୍‌ଟିସି ଆନ୍ଦୋଳନ ଡାକରା ଦେଇଥିଲା। ଦେଶବ୍ୟାପୀ ଏହି ଆନ୍ଦୋଳନ ଯୋଗୁଁ ମାଲ୍ ପରିବହନ ଠପ୍ ହୋଇଯାଇଥିଲା। ଓଡ଼ିଶାର ବିଭିନ୍ନ ଟ୍ରକ୍ ମାଲିକ ସଂଘ ଆନ୍ଦୋଳନକୁ ସମର୍ଥନ କରି ଧର୍ମଘଟରେ ସାମିଲ ହୋଇଥିଲେ। ତେଣୁ ରାଜ୍ୟରେ ବି ମାଲ୍ ପରିବହନ ସେବା ଗୁରୁତର ଭାବେ ପ୍ରଭାବିତ ହୋଇଥିଲା।