ମିଛୁଆ ରାଧୁଆ ନହୋଇ ଓଡ଼ିଶାର ଲୋକଙ୍କ ସ୍ୱାସ୍ଥ୍ୟ ସେବାର ଦାୟିତ୍ୱ ନେବାକୁ ନବୀନଙ୍କୁ ପରାମର୍ଶ ଦେଲେ ଧର୍ମେନ୍ଦ୍ର

<p>ଭୁବନେଶ୍ୱର(ଓଡ଼ିଶା ରିପୋର୍ଟର): କେନ୍ଦ୍ର ସରକାରଙ୍କ &lsquo;ଆୟୁଷ୍ମାନ ଭାରତ&rsquo; ଯୋଜନାକୁ ନେଇ ଓଡ଼ିଶାରେ ଏବେ ବିତର୍କ ହେଉଛି। ରାଜ୍ୟ ସରକାର ଏହି ଯୋଜନାକୁ ଗ୍ରହଣ ନକରି ବିକଳ୍ପ ଭାବେ ନିଜସ୍ୱ &lsquo;ବିଜୁ ସ୍ୱାସ୍ଥ୍ୟ କଲ୍ୟାଣ&rsquo; ଯୋଜନା ଆରମ୍ଭ କଲେ। ଗତ ଅଗଷ୍ଟ ୧୫ ତାରିଖରୁ ଆରମ୍ଭ ହୋଇଥିବା ଏହି ଯୋଜନାରେ ୧ କୋଟିରୁ ଊର୍ଦ୍ଧ୍ୱ ଲୋକ ଚିକିତ୍ସା ପାଇସାରିଲେଣି ବୋଲି ବିଭିନ୍ନ ଗଣମାଧ୍ୟମରେ ପ୍ରଚାର ହେଉଛି। ଏହା &lsquo;ମିଛୁଆ ରାଧୁଆ ଉପାଖ୍ୟାନ&rsquo; ପରି ଲାଗୁଛି। ଲୋକଙ୍କୁ ବୋକା ବନାଇବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏପରି ପ୍ରଚାର କରୁଛନ୍ତି ବୋଲି ସୋଶାଲ୍&zwnj; ମିଡିଆରେ ଏକ ଭିଡିଓ ପୋଷ୍ଟ କରି କହିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ।</p><p>ଶ୍ରୀ ପ୍ରଧାନ କହିଛନ୍ତି-&ldquo;୧୭-୧୮ ଅର୍ଥନୈତିକ ସର୍ଭେ ରିପୋର୍ଟରେ ବର୍ଷସାରା ରାଜ୍ୟର ସରକାରୀ ଡାକ୍ତରଖାନାରେ ଚିକିତ୍ସା ପାଇଁ ୧ କୋଟି ଲୋକ ଆସିନଥିବା ବେଳେ ୨ ମାସରେ ୧ କୋଟି ୧୦ ଲକ୍ଷ ଲୋକ କେଉଁଠୁ ଆସିଲେ? ଯଦି ଜ୍ୱର ଓ କାଶ ଭଳି ସାମାନ୍ୟ ରୋଗକୁ ନେଇ ହିସାବ କରାଯିବ, ତାହାହେଲେ ମୁଁ ନାଚାର। ଏହି ମୌଳିକ ସେବାକୁ ରି-ପ୍ୟାକେଜିଂ କରି ଯଦି ସ୍ୱାସ୍ଥ୍ୟସେବା କଥା କହିବେ, ତାହାହେଲେ ମୁଖ୍ୟମନ୍ତ୍ରୀ ଓଡ଼ିଶାର ଲୋକଙ୍କୁ ଠକୁଛନ୍ତି ବୋଲି ଭାବିବା।&rdquo;</p><p>ଶ୍ରୀ ପ୍ରଧାନ ଆହୁରି କହିଛନ୍ତି-&ldquo;ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ରାଗରଖି ଓଡ଼ିଆଙ୍କୁ ଏହି ମୌଳିକ ସୁବିଧାରୁ ବଞ୍ଚିତ ରଖନ୍ତୁ ନାହିଁ। ରାଜନୀତିକୁ ତା&rsquo; ବାଟରେ ଛାଡ଼ି &lsquo;ମିଛୁଆ ରାଧୁଆ&rsquo; ନହୋଇ ଓଡ଼ିଆ ଲୋକଙ୍କ ସେବାପାଇଁ ଦାୟିତ୍ୱ ନିଅନ୍ତୁ ବୋଲି ମୁଖ୍ୟମନ୍ତ୍ରୀଙ୍କୁ ଅନୁରୋଧ କରୁଛି।&rdquo;</p><p>ସେ କହିଛନ୍ତି-&ldquo;ସର୍ଭେ ରିପୋର୍ଟ ଅନୁସାରେ ୨୦୦୯-୧୦ ମସିହାରେ ୧ ଲକ୍ଷ ଲୋକଙ୍କ ପାଇଁ ୧୧ ଜଣ ଡାକ୍ତର ଥିଲେ। ଯାହା ୨୦୧୪-୧୫ ସୁଦ୍ଧା ୯କୁ ଖସିଆସିଛି। ଏହା ସରକାରୀ ତଥ୍ୟ। ସେହିପରି ଓଡ଼ିଶାରେ ୨ଟି ବେଡରେ ୩ ଜଣ ରୋଗୀ ରହୁଛନ୍ତି। ଓଡ଼ିଶାର ୮୧୯୩ ଉପକେନ୍ଦ୍ରର ଆବଶ୍ୟକତା ଥିବାବେଳେ ଆଜିର ଦିନରେ ୬୬୮୮ଟି ଅଛି। ଯାହା ୧୫୦୫ଟି ଏବେବି କମ୍&zwnj; ରହିଛି। ରାଜ୍ୟର ୩୦ ଜିଲ୍ଲାର ମୁଖ୍ୟ ଚିକିତ୍ସାଳୟ ମଧ୍ୟରୁ ୧୨ଟିରେ ଆଇସିୟୁ ବ୍ୟବସ୍ଥା ଅଛି। ୧୧୨ଟି ସ୍ୱାସ୍ଥ୍ୟକେନ୍ଦ୍ରରେ ବିଜୁଳି ସଂଯୋଗ ନାହିଁ।&rdquo;</p><p>ଶ୍ରୀ ପ୍ରଧାନ ଆହୁରି କହିଛନ୍ତି-&ldquo;ପ୍ରଥମ ମାସରେ ନବଜାତକଙ୍କ ମୃତ୍ୟୁ କ୍ଷେତ୍ରରେ ଓଡ଼ିଶା ଦେଶରେ ୧ ନମ୍ୱର। ସେହିପରି ୫ ବର୍ଷରୁ କମ୍&zwnj; ଶିଶୁ ମୃତ୍ୟୁହାରରେ ଓଡ଼ିଶା ୩ ନମ୍ୱର। ଓଡ଼ିଶାର ୨୫ଟି ଜିଲ୍ଲାରେ ୧୫ ପ୍ରତିଶତ କମ୍&zwnj; ଓଜନ ଓ କମ୍&zwnj; ଉଚ୍ଚତା (କୁପୋଷଣ)ର ଶିଶୁ ଜନ୍ମ ହେଉଛନ୍ତି। ଏହା ଓଡ଼ିଶା ସରକାରଙ୍କ ସ୍ୱାସ୍ଥ୍ୟସେବାର ମାପକାଠି ଓ ନମୁନା। &lsquo;ଆୟୁଷ୍ମାନ&rsquo; ଯୋଜନା ଲାଗୁକଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିଶ୍ୱସନୀୟତା ଅଧିକ ବଢ଼ିବ ବୋଲି ମୁଖ୍ୟମନ୍ତ୍ରୀଙ୍କ ମନରେ ଭୟ ଅଛି। ସେଥିପାଇଁ ଏହି ଯୋଜନାକୁ ଗ୍ରହଣ କରୁନାହାନ୍ତି।&rdquo;</p><p>ସେ ଆହୁରି କହିଛନ୍ତି-&ldquo;କେନ୍ଦ୍ର ସରକାର ୫ ଲକ୍ଷ ଟଙ୍କା ବ୍ୟବସ୍ଥାରେ ହେଲ୍&zwnj;ଥ ଆସ୍ୟୁରାନ୍ସ ସର୍ବଭାରତୀୟ ଯୋଜନା ଆରମ୍ଭ କରିଛନ୍ତି। ଯିଏ ଯେଉଁଠି ଥାଉ ୫ ଲକ୍ଷ ଟଙ୍କାର ସ୍ୱାସ୍ଥ୍ୟସେବା ପାଇପାରିବ। ସେପ୍ଟେମ୍ୱରରୁ ଏହା ଲାଗୁ ହୋଇଥିବା ବେଳେ ବିଭିନ୍ନ ରାଜ୍ୟ ସରକାରଙ୍କ ସହାୟତାରେ ଆଜି ସଫଳତାର ସହ କାମ କରିଆସୁଛି। ସ୍ୱାଧୀନତା ପରେ ସାଧାରଣ ଲୋକ ଜଟିଳ ରୋଗର ଚିକିତ୍ସା କରିନପାରି ମୃତ୍ୟୁବରଣ କରୁଛନ୍ତି। ତା&rsquo;ର ସମାଧାନ ପାଇଁ &lsquo;ଆୟୁଷ୍ମାନ ଯୋଜନା&rsquo; ଆରମ୍ଭ କରାଯାଇଛି।&rdquo;</p>

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।