ନନ୍ଦନକାନନ ନଆସି ଭର୍ଚୁଆଲ୍‌ରେ ମଜା ନେଉଛନ୍ତି ଦର୍ଶକ

ଭୁବନେଶ୍ୱର (ଓଡ଼ିଶା ରିପୋର୍ଟର): ଭର୍ଚୁଆଲ୍‌ରେ ନନ୍ଦନକାନନ ପରିଭ୍ରମଣ। କଥାଟି ଅଡ୍‌ ଲାଗୁଥିଲେ ମଧ୍ୟ ସତ। କରୋନା ମହାମାରୀ ବେଳେ ନନ୍ଦନକାନନ ନଆସି ଜୀବଯନ୍ତୁଙ୍କ ମଜାଦାର ଭିଡିଓ ଦେଖିପାରୁଛନ୍ତି ଦର୍ଶକ। ନନ୍ଦନକାନନ ପ୍ରାଣୀ ଉଦ୍ୟନ କର୍ତ୍ତୃପକ୍ଷ ଏପରି ଉଦ୍ୟମ କରିବାରେ ସଫଳ ହୋଇଛନ୍ତି। ନନ୍ଦନକାନନ ୱେବସାଇଟ୍‌ ଓ ସୋଶାଲ୍‌ ମିଡ଼ିଆ ଟ୍ୱିଟ୍‌ରରେ ଜୀବଯନ୍ତୁଙ୍କ ମଜାଦାର ଭିଡ଼ିଓ ଦେଖିବାକୁ ମିଳିଛି। ଲୋକମାନେ ଘରେ ବସି ନନ୍ଦନକାନନର ପରିଭ୍ରମଣର ମଜା ନେଇପାରିବେ।

ଗରମରୁ ତ୍ରାହି ପାଇବା ପାଇଁ ପାଣି ଟବ୍‌ରେ ଭାଲୁ ଛୁଆ ଖେଳୁଛନ୍ତି। କିଏ ପାଣିରେ ବୁଡ଼ି ମଜା ନେଉଛି ତ ଆଉ କିଏ ଗଛ ଡ଼ାଳରେ ଝୁଲି ମସ୍ତି କରୁଛି। ସେପଟେ ଗଛ ମୂଳରେ ଶୋଇଛି ଧଳାବାଘର। ତା’ ପାଖରେ ବାଘଛୁଆମାନେ ଖେଳୁଛନ୍ତି।

ଖାଲି ସେତିକି ନୁହେଁ, ହରିଣପଲଙ୍କ ଧାଁ ଦୌଡ଼ ହେଉ ବା ଘଡ଼ିଆଳ କୁମ୍ଭୀରଙ୍କ ଗୋଷ୍ଠୀ ହେଉ ଅବା ବିଭିନ୍ନ ପ୍ରକାର ଚଢ଼େଇ, ସମସ୍ତଙ୍କୁ ଭର୍ଚୁଆଲ୍‌ରେ ଦେଖିପାରିବେ ଦର୍ଶକ।

ଏଥିପାଇଁ ନନ୍ଦନକାନନ କର୍ତ୍ତୃପକ୍ଷ ବ୍ୟବସ୍ଥା କରିଛନ୍ତି। ପଶୁପକ୍ଷୀଙ୍କର ଛୋଟ ଛୋଟ ମଜାଳିଆ ଭିଡ଼ିଓକୁ ସୋଶାଲ ମିଡ଼ିଆରେ ଛାଡ଼ି ଚିଡ଼ିଆଖାନା ବୁଲା ମଉଜକୁ ଘରେ ଅନୁଭବର କରାଯାଉଛି।

କେବଳ ନନ୍ଦନକାନନ ନୁହେଁ, ଆଗାମୀ ଦିନରେ ରାଜ୍ୟର ଅନ୍ୟ ଚିଡ଼ିଆଖାନା ତଥା ପ୍ରାଣୀଉଦ୍ୟାନ ଓ ଅଭୟାରଣ୍ୟର ଭଲ ଭିଡ଼ିଓ ଉତ୍ତୋଳନ କରି ପର୍ଯ୍ୟଟକମାନଙ୍କ ପାଇଁ ୱେବସାଇଟ୍‌ରେ ଅପ୍‌ଲୋଡ୍‌ କରାଯିବ। ଏହାଛଡ଼ା ବିଭିନ୍ନ ସୋଶାଲ୍‌ ମିଡ଼ିଆ ପ୍ଲାଟଫର୍ମରେ ଛାଡ଼ିବାର ଉଦ୍ୟମ କରାଯିବ। ଏହାଦ୍ୱାରା ଚିଡ଼ିଆଖାନାକୁ ଆସିପାରୁ ନ ଥିବା ବ୍ୟକ୍ତି ଘରେ ବସି ଜୀବଜନ୍ତୁଙ୍କୁ ଦେଖିବାର ମଜା ନେଇ ପାରିବେ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।