ଓଡ଼ିଶା ରାସ୍ତା ଉପରେ ପଶ୍ଚିମବଙ୍ଗର ଦାଦାଗିରି

ବାଲେଶ୍ୱର (ଓଡ଼ିଶା ରିପୋର୍ଟର): ଓଡ଼ିଶା ସୀମାରେ ପଶ୍ଚିମବଙ୍ଗ ସରକାରଙ୍କ ଦାଦାଗିରି କିଛି ନୂଆ କଥା ନୁହେଁ। ଏପରି ଅଭିଯୋଗ ବହୁ ସମୟରେ ଆସିଥାଏ। ଖାସ୍‌କରି ସୀମାନ୍ତ ବାଲେଶ୍ୱରର ବିଭିନ୍ନ ଅଞ୍ଚଳରେ ପଶ୍ଚିମବଙ୍ଗ ସରକାରଙ୍କ ହସ୍ତକ୍ଷେପ ଦେଖିବାକୁ ମିଳିଥାଏ। ଏମିତି ଏକ ଅଭିଯୋଗ ପୁଣି ଆସିଛି ଭୋଗରାଇ ବ୍ଲକ୍‌ ଅଞ୍ଚଳରୁ। ଏଠାରେ ପଶ୍ଚିମବଙ୍ଗ ସରକାର ଫାଟକ ତିଆରି କରିଛନ୍ତି। ଯାହାକୁ ନେଇ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି।

ସୂଚନାଯୋଗ୍ୟ, ଭୋଗରାଇ ବ୍ଲକ୍‌ର ସାହାବାଜିପୁର ସୀମାରୁ ଉଦୟପୁର ବେଳାଭୂମି ପର୍ଯ୍ୟନ୍ତ ରାସ୍ତା ନିର୍ମାଣ କରାଯାଇଛି। ଉକ୍ତ ରାସ୍ତାରେ ପଶ୍ଚିମବଙ୍ଗ ସରକାର ଏକ ଫାଟକ ତିଆରି କରିଛନ୍ତି। ଏଥିରେ ‘ଦୀଘା ସି-ବିଚ୍’ ଲେଖା ଫଳକ ଲଗାଯାଇଛି। ଉକ୍ତ ଫାଟକ ଓଡ଼ିଶାର ରାସ୍ତା ଉପରକୁ ୧୦ ଫୁଟ୍ ମଡ଼ାଯାଇ କରାଯାଇଛି।

୭ ଦିନ ମଧ୍ୟରେ ସମସ୍ୟାର ସମାଧାନ ନହେଲେ ଫଳକ ଭାଙ୍ଗି ଦିଆଯିବ ବୋଲି ସ୍ଥାନୀୟ ସରପଞ୍ଚ ତପନ ପଣ୍ଡା କହିଛନ୍ତି।

ଅତିରିକ୍ତ ଜିଲ୍ଲାପାଳ ମାନସ ପାଢ଼ୀ କହିଛନ୍ତି- “ଏନେଇ ପଶ୍ଚିମବଙ୍ଗ ସରକାର ଓ ସ୍ଥାନୀୟ ମାଜିଷ୍ଟ୍ରେଟ୍‌ଙ୍କୁ ଚିଠି ଲେଖି ଜଣାଇବା ସହ ବିହିତ ପଦକ୍ଷେପ ଗ୍ରହଣ କରିବୁ।”

ସ୍ଥାନୀୟ ବିଧାୟକ ଅନନ୍ତ ଦାସ କହିଛନ୍ତି, “ଏହା ଜାଣିବା ପରେ ଗୃହ ସଚିବ, ଜିଲ୍ଲାପାଳ, ଏସ୍‌ପି ଏବଂ ଡିଆଇଜିଙ୍କୁ ଜଣାଇଥିଲି। ଅତିରିକ୍ତ ଜିଲ୍ଲାପାଳ ଏବଂ ଏସ୍‌ଡିପିଓ ଘଟଣା ସ୍ଥଳକୁ ଯାଇ ଯାଞ୍ଚ କରିଛନ୍ତି। ଫଳକ ଲଗାଯାଇଥିବା ସ୍ଥାନ ଓଡ଼ିଶାର। ଏହାକୁ ବରଦାସ୍ତ କରାଯିବ ନାହିଁ।”

This website uses cookies to improve your experience. We'll assume you're ok with this, but you can opt-out if you wish. AcceptRead More