ବିଜେଡିକୁ ବାଧିଲା କାହିଁକି? କିଏ କ’ଣ କହିଲେ ଶୁଣନ୍ତୁ

<p>ଭୁବନେଶ୍ୱର (ଓଡ଼ିଶା ରିପୋର୍ଟର): ଓଡ଼ିଶାର ନମ୍ବର-୧ ନ୍ୟୁଜ୍ ଚ୍ୟାନେଲ୍&zwnj; ଓଟିଭିର କାର୍ଯ୍ୟଧାରା ଉପରେ ପ୍ରଶ୍ନ ଉଠାଇଛି ଶାସକ ବିଜୁ ଜନତା ଦଳ। ଏହାକୁ ନେଇ ବିଭିନ୍ନ ମହଲରେ ଭୀଷଣ ପ୍ରତିକ୍ରିୟା ସୃଷ୍ଟି ହୋଇଛି। ବିଶେଷକରି ରାଜ୍ୟର ବରିଷ୍ଠ ସାମ୍ବାଦିକମାନେ ଏହାକୁ ବିରୋଧ କରିବା ସହ, ବିଜେଡିର ଅସହିଷ୍ଣୁତା ସଂପର୍କରେ ପ୍ରଶ୍ନ ଉଠାଇଛନ୍ତି। ଏ ସଂପର୍କରେ ଓଟିଭି କର୍ତୃପକ୍ଷ ପ୍ରତିକ୍ରିୟାରେ କହିଛନ୍ତି ଯେ, ୧୯୯୭ ମସିହାରୁ ଏ ପର୍ଯ୍ୟନ୍ତ, ଗତ ଦୁଇ ଦଶନ୍ଧି ଧରି ଓଟିଭି ନିରପେକ୍ଷ ଭାବେ ଖବର ପରିବେଷଣ କରିଆସୁଛି। ଏକ ଲିଖିତ ଚାର୍ଟର ଦ୍ୱାରା ଏହା ପରିଚାଳିତ। ଏଠି ସବୁ ପକ୍ଷକୁ ନିଜ ପ୍ରତିକ୍ରିୟା ଦେବାର ସୁଯୋଗ ଦିଆଯାଏ। ଗତ ୨୦ ବର୍ଷ ଭିତରେ କଂଗ୍ରେସ, ବିଜେପି ଓ ବିଜେଡି ପରି ରାଜନୈତିକ ଦଳ ସମ୍ପର୍କରେ ଏହି ନ୍ୟୁଜ୍ ଚ୍ୟାନେଲ୍ ଟିକିନିକି ଖବର, ନିରପେକ୍ଷ ଭାବେ ଦର୍ଶକଙ୍କ ନିକଟରେ ପହଞ୍ଚାଇବାକୁ ପ୍ରୟାସ କରିଆସିଛି। ତେଣୁ ହଠାତ୍ ଏବେ ବିଜେଡିକୁ କାହିଁକି ବାଧିଲା ବୋଲି ଓଟିଭି କର୍ତୃପକ୍ଷ ପ୍ରଶ୍ନ କରିଛନ୍ତି।</p><p>ଗତ କିଛିଦିନର ଘଟଣାକ୍ରମ ଓ ଖବର ପ୍ରସାରଣକୁ ଦେଖିଲେ ବିଜେଡି କାହିଁକି ଏବେ ରକ୍ତମୁଖା ହୋଇପଡ଼ିଛି ତାହା ସ୍ପଷ୍ଟ ହୋଇଯିବ। ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଭି.କେ. ପାଣ୍ଡିଆନଙ୍କ ସଂପର୍କରେ ଗତ ମାସକ ଭିତରେ ଓଟିଭି କେତେକ ତଥ୍ୟ ଭିତ୍ତିକ ଖବର ପରିବେଷଣ କରିଥିଲା। ପାଣ୍ଡିଆନଙ୍କ ବିରୋଧରେ ଦଳର ଯେଉଁ ନେତା ଯେତେବେଳେ ଯାହା ମତ ଓ ମନ୍ତବ୍ୟ ଦେଲେ ତାକୁ ସାମ୍ନାକୁ ଆଣିଥିଲା ଓଟିଭି। ଶନିବାର ପାଣ୍ଡିଆନଙ୍କ ଘର ଉପରେ ବିଜେପି କର୍ମୀଙ୍କ ଗୋବର ମାଡ ଘଟଣାକୁ ମଧ୍ୟ ଆବଶ୍ୟକ ଗୁରୁତ୍ୱ ଦେଇ ପ୍ରସାରିତ କରିଥିଲା ଓଟିଭି। ସେହିପରି କୁନ୍ଦୁଲି ପ୍ରସଙ୍ଗରେ ଓଟିଭିରେ ପ୍ରସାର କରିଥିବା କିଛି ତଥ୍ୟଭିତ୍ତିକ ଖବର ରାଜ୍ୟ ସରକାରଙ୍କୁ ଅଡୁଆରେ ପକାଇଥିଲା। ସିଏ ଫୋରେନ୍&zwnj;ସିକ ଲ୍ୟାବ୍ ରିପୋର୍ଟ ହେଉ ବା ପୀଡିତା ଦେଇଥିବା ବୟାନ। କୁନ୍ଦୁଲି ପ୍ରସଙ୍ଗରେ ଓଟିଭିର ଖବର, ଶାସକ ଦଳକୁ ଅଡୁଆରେ ପକାଇଥିବା ଚର୍ଚ୍ଚା ହେଉଛି। ସେଥିପାଇଁ ବିଜେପୁର ଖବର ସହ ଯୋଡି ଓଟିଭି ନାଁରେ ଏମିତି ଅଭିଯୋଗ ଆଣି ଏକ ପ୍ରତିଷ୍ଠିତ ଗଣମାଧ୍ୟମର ସ୍ୱର ଦବାଇଦେବାକୁ ବିଜେଡି ଉଦ୍ୟମ କରିଛି ବୋଲି ବରିଷ୍ଠ ସାମ୍ବାଦିକମାନେ ମତ ଦେଇଛନ୍ତି। ବିଜେଡିର ଏହି ହୀନ ପ୍ରୟାସ ସଂପର୍କରେ କିଏ କଣ କହିଛନ୍ତି ପଢ଼ନ୍ତୁ।</p><p>ବରିଷ୍ଠ ବିଜେଡି ନେତା ଡାକ୍ତର ଦାମୋଦର ରାଉତ କହିଛନ୍ତି- &ldquo;ଗଣମାଧ୍ୟମର କଣ୍ଠରୋଧ କରିବା ସପକ୍ଷରେ ମୁଁ ନାହିଁ। କାରଣ ଗଣମାଧ୍ୟମକୁ ଛାଡ଼ିଦେଲେ ଗଣତନ୍ତ୍ରକୁ ଠିକଣା ବାଟରେ ରଖିବା ସମ୍ଭବ ହେବନାହିଁ। ସେଥିପାଇଁ ଗଣମାଧ୍ୟମକୁ ଗଣତନ୍ତ୍ରର ଚତୁର୍ଥ ସ୍ତମ୍ଭ କୁହାଯାଏ। ଏହି ଚତୁର୍ଥ ସ୍ତମ୍ଭକୁ ଅନ୍ୟଥା ବିଚାର କରିବା ଠିକ୍&zwnj; ନୁହେଁ।&rdquo;</p><p>ରାଜନୈତିକ ବିଶ୍ଳେଷକ ତଥା ବରିଷ୍ଠ ସାମ୍ବାଦିକ ପ୍ରସନ୍ନ ମହାନ୍ତି କହିଛନ୍ତି- &ldquo;କୁନ୍ଦୁଲି ଘଟଣାରେ ଅନେକ ଅନାଲୋଚିତ ତଥ୍ୟ ପଦାକୁ ଆଣିଛି ଓଟିଭି। ଯାହାକୁ ନେଇ ରାଜ୍ୟ ସରକାର ଅଡ଼ୁଆରେ ପଡ଼ିଛି। ଏଥିରେ ପ୍ରତିକ୍ରିୟାଶୀଳ ହୋଇ ବିଜେଡି ଏପରି ଅଭିଯୋଗ ଆଣିଛି। ଏପରି କୁତ୍ସିତ ପରମ୍ପରାକୁ ପ୍ରଶ୍ରୟ ଦିଆନଯାଉ ଏବଂ ଗଣମାଧ୍ୟମକୁ ପକ୍ଷଭୁକ୍ତ କରାନଯାଉ।&rdquo;</p><p>ବରିଷ୍ଠ ସାମ୍ବାଦିକ ସନ୍ଦୀପ ସାହୁ କହିଛନ୍ତି- &ldquo;ଏହା ଏକ ହାସ୍ୟାସ୍ପଦ ଅଭିଯୋଗ। ରାଜ୍ୟରେ ଏକ ପରିପକ୍ୱ ଦଳ ହିସାବରେ ବିଜେଡି ଯେପରି ବ୍ୟବହାର ରଖିବା କଥା, ତାହା ଦେଖିବାକୁ ମିଳିଲାନି। ଏଥିରୁ ଜଣାପଡ଼ୁଛି କେଉଁଠି ନା କେଉଁଠି ସେମାନଙ୍କ ଭିତରେ ଏକ ଆଶଙ୍କା ହୋଇଛି- ପାଦ ତଳୁ ମାଟି ଖସିଯାଉଛି।&rdquo;</p><p>ରାଜନୈତିକ ବିଶ୍ଳେଷକ ରବି ଦାସ କହିଛନ୍ତି- &ldquo;ଦିନେ ଶାସକ ଦଳ କହୁଥିଲେ, ଓଟିଭିରେ ଯାହା ବାହାରିଛି ଦେଖ, ସେଇଟା ହିଁ ଠିକ୍। ବର୍ତ୍ତମାନ କେମିତି ବଦଳି ଗଲେ? ମୁଁ ଭାବୁଛି ଏହା ଏକ ସୁସ୍ଥ ରାଜନୈତିକ ବାତାବରଣ ସୃଷ୍ଟି କରୁନି। କିନ୍ତୁ ଲୋକେ ସତ୍ୟ ଖବର ଦେଖନ୍ତି।&rdquo;</p><p>ସେହିପରି ବରିଷ୍ଠ ସାମ୍ବାଦିକ ରାଜାରାମ ଶତପଥୀ କହିଛନ୍ତି- &ldquo;ବିଜେଡି ଓଷଦ ବିକଳରେ ତାଟିଆ କାମୁଡ଼ିଲା ପରି ଲାଗୁଛି। ସାଂସଦଙ୍କୁ ଦଳରୁ ବାହାର କରିବା ପରେ ବିଜେଡି ମୁଖ୍ୟ ନିର୍ବାଚନ ଅଧିକାରୀଙ୍କ ପାଖରେ ଫେରାଦ ହେବା ଉଦ୍ଦେଶ୍ୟ ପ୍ରଣୋଦିତ ପରି ଲାଗୁଛି।&rdquo;</p><p>ବିରୋଧୀ ଦଳ ମୁଖ୍ୟ ସଚେତକ ତାରା ବାହିନୀପତି କହିଲେ-&ldquo;ଗଣତନ୍ତ୍ରରେ ପ୍ରେସ ଏକ ସ୍ତମ୍ଭ। ତାର ନିଜର ସ୍ୱାଧୀନତା ରହିଛି। ସୂର୍ଯ୍ୟ ପାତ୍ର ଓ ପ୍ରତାପ ଦେବ ଯାହା କହିଲେ, ମନରୁ କହିନାହାନ୍ତି। ତାଙ୍କର ଏତେ ସ୍ୱାଧୀନତା ନାହିଁ। ୩ୟ ମହଲା ମୁଖ୍ୟମନ୍ତ୍ରୀଙ୍କ ଅଫିସରୁ କହିବାକୁ ନିର୍ଦ୍ଦେଶ ଆସିଥିବ।&rdquo;</p><p>ବିଜେଡି ସାଂସଦ ପ୍ରସନ୍ନ ପାଟଣାଣୀ କହିଛନ୍ତି-&ldquo;ସେମାନେ ଓଟିଭିକୁ କାହିଁକି ଆକ୍ଷେପ କଲେ? ଏହା ସେମାନଙ୍କର ବ୍ୟକ୍ତଗତ ମନ୍ତବ୍ୟ ହୋଇଥିବ। ମିଡ଼ିଆ ତାର କର୍ତ୍ତବ୍ୟ କରିବ। ଆମେ ଆମର କର୍ତ୍ତବ୍ୟ କରିବା। ଲୋକମାନେ ଯାହାକୁ ଚାହିଁବେ ଜିତେଇବେ।&rdquo;</p>

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।