ଚନ୍ଦକାରେ ପ୍ରତିଷ୍ଠା ହେବ ବିଶ୍ୱସ୍ତରୀୟ ୱାଇଲ୍ଡ ଲାଇଫ୍ ହସ୍ପିଟାଲ

ଭୁବନେଶ୍ୱର(ଓଡ଼ିଶା ରିପୋର୍ଟର): ବନ୍ୟଜନ୍ତୁଙ୍କ ସୁରକ୍ଷାକୁ ଦୃଷ୍ଟିରେ ରଖି ଚନ୍ଦକା ଜଙ୍ଗଲ ଭିତରେ ଏକ ବିଶ୍ୱସ୍ତରୀୟ ୱାଇଲ୍ଡ ଲାଇଫ ହସ୍ପିଟାଲ (ବନ୍ୟପ୍ରାଣୀ ଚିକିତ୍ସାଳୟ) ସ୍ଥାପନ କରିବାକୁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି। ମୁଖ୍ୟ ସଚିବ ଅସିତ୍ କୁମାର ତ୍ରିପାଠୀଙ୍କ ଅଧ୍ୟକ୍ଷତାରେ ଆଜି ଅନୁଷ୍ଠିତ ହାତୀ ସଂରକ୍ଷଣ ସମ୍ବନ୍ଧିତ ରାଜ୍ୟସ୍ତରୀୟ କମିଟି ବୈଠକରେ   ରାଜ୍ୟରେ ହାତୀ ରିଜର୍ଭ ଜଙ୍ଗଲ ଓ ହାତୀଙ୍କ ସଂଖ୍ୟା ବିଷୟ ସମୀକ୍ଷା କରି ବିଶ୍ୱସ୍ତରୀୟ ହସ୍ପିଟାଲ ପ୍ରତିଷ୍ଠା ପାଇଁ ନିର୍ଦ୍ଦେଶ ଦେଇଥିଲେ।
ହାତୀ ବାସ କରୁଥିବା ସ୍ଥାନ ଓ ହାତୀ କରିଡୋର ଆଦିରେ ଲକ୍ଷ୍ୟଭେଦୀ କାର୍ଯ୍ୟଯୋଜନା ମାଧ୍ୟମରେ ଅଧିକରୁ ଅଧିକ ମଜୁରୀ-ଭିତ୍ତିକ ନିଯୁକ୍ତି ସୃଷ୍ଟି କରିବାକୁ ମୁଖ୍ୟ ସଚିବ ଶ୍ରୀ ତ୍ରିପାଠୀ ନିର୍ଦ୍ଦେଶ ଦେବା ସହ ଚନ୍ଦକା ଜଙ୍ଗଲରେ ଏକ ବିଶ୍ୱସ୍ତରୀୟ ବନ୍ୟଜନ୍ତୁ ହସ୍ପିଟାଲ ସହ ‘ସେଣ୍ଟର ଅଫ ଏକ୍ସଲେନ୍ସ’ ପ୍ରତିଷ୍ଠା, ମହାନଦୀ ଓ ସମ୍ବଲପୁର ହାତୀ ରିଜର୍ଭ ଜଙ୍ଗଲ ସଘନ ବିକାଶ, ସିମିଳିପାଳ-ହଦଗଡ଼ ଓ ବରୁଣାଇ-ନୂଆଗାଁ ହାତୀ କରିଡୋର ଆଦିର ବିକାଶ ପାଇଁ ବୈଠକରେ ନିଷ୍ପତ୍ତି ହୋଇଥିଲା।
ବନ୍ୟଜନ୍ତୁ ମୁଖ୍ୟ ବନ ସଂରକ୍ଷକ ହରିଶଙ୍କର ଉପାଧ୍ୟାୟ କହିଥିଲେ ଯେ, ବେଙ୍ଗାଲୁରୁ ଭାରତୀୟ ବିଜ୍ଞାନ ପ୍ରତିଷ୍ଠାନ ଅଧ୍ୟୟନ ଅନୁସାରେ, ଓଡ଼ିଶାର ବିସ୍ତୃତ ଜଙ୍ଗଲରେ ୧୭୦୦ରୁ ୧୮୦୦ ପର୍ଯ୍ୟନ୍ତ ହାତୀଙ୍କୁ ସଠିକ୍ ଭାବେ ପରିଚାଳନା କରିହେବ। ଗତ ୭ବର୍ଷ ଭିତରେ ଓଡ଼ିଶା ହାତୀ ସଂଖ୍ୟା କ୍ରମାଗତ ଭାବେ ବୃଦ୍ଧି ପାଇଛି। ୧୯୯୯ ମସିହାରେ ରାଜ୍ୟର ହାତୀ ସଂଖ୍ୟା ୧୮୨୭ ଥିଲା, ୨୦୧୦ ମସିହାବେଳକୁ ଏହା ବୃଦ୍ଧି ପାଇ ୧୮୮୬ରେ ପହଂଚିଛି। ୨୦୧୨ରେ ହାତ ସଂଖ୍ୟା ୧୯୩୦ ଓ ୨୦୧୭ ମସିହାରେ ୧୯୭୬କୁ ବୃଦ୍ଧି ପାଇଥିଲା ବୋଲି ବୈଠକରୁ ଜଣାପଡ଼ିଛି।