ଟିଟିଲାଗଡ଼ (ମାନସ ରଞ୍ଜନ ମହାନ୍ତି): ଶୂନ୍ଶାନ୍ ଜଙ୍ଗଲର ଏକ ଗଛରେ ଝୁଲିଛି ମହିଳାଙ୍କ ମରଶରୀର। ଦେହରେ ଖଣ୍ଡିଏ ବି କପଡ଼ା ନାହିଁ। ପାରିପାର୍ଶ୍ୱିକ ପରିସ୍ଥିତିରୁ ଦୁଷ୍କର୍ମ ପରେ ଏହା ଏକ ଯୋଜନାବଦ୍ଧ ହତ୍ୟା ବୋଲି ସନ୍ଦେହ କରାଯାଉଛି। ତେବେ ମୃତ ମହିଳାଙ୍କ ପରିଚୟ ଜଣାପଡ଼ିନାହିଁ।
ବଲାଙ୍ଗିର ଜିଲ୍ଲା ଟିଟିଲାଗଡ଼ ଥାନା ଗୁଲ୍ମ ଗାଁ ଲୋକେ ଆଜି ଜଙ୍ଗଲକୁ କରଡି ସଂଗ୍ରହ କରିବାକୁ ଯାଇଥିଲେ। ଏହି ସମୟରେ ଟିଟିଲାଗଡ଼-ମୁରିବାହାଲ ରାସ୍ତାର ଜଙ୍ଗଲ ଭିତରେ ଜଣେ ମହିଳାଙ୍କ ଝୁଲନ୍ତା ମୃତଦେହ ଦେଖି ପୁଲିସକୁ ଖବର ଦେଇଥିଲେ। ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ଘଟଣାର ତଦନ୍ତ ଆରମ୍ଭ କରିଛି।
ମୃତ ମହିଳାଙ୍କ ବୟସ ପାଖାପାଖି ୨୫ରୁ ୩୦ ହେବ। ବେକକୁ ଓଢ଼ଣୀରେ ବାନ୍ଧି ଗଛରେ ଝୁଲାଇ ଦିଆଯାଇଛି। ପାଖରେ ଚପଲ ଓ କଳା ମାଳିଥିବା ଏକ ହାର ପଡ଼ିଛି। ମହିଳାଙ୍କ ନାକରୁ ରକ୍ତ ବାହାରିଥିବା ବେଳେ ସମ୍ୱେଦନଶୀଳ ଅଙ୍ଗରେ କ୍ଷତ ଚିହ୍ନ ରହିଛି। ଏଥିରୁ ସନ୍ଦେହ ହେଉଛି, ମହିଳାଙ୍କୁ ପ୍ରଥମେ ଦୁଷ୍କର୍ମ ଏବଂ ପରେ ହତ୍ୟା କରାଯାଇ ଜଙ୍ଗଲ ଭିତରେ ଝୁଲାଇ ଦିଆଯାଇଛି। ତେବେ ଦୁଷ୍କର୍ମ ଓ ହତ୍ୟା କେଉଁଠି ହୋଇଛି, ତାହା ସ୍ପଷ୍ଟ ହୋଇନାହିଁ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
