ଭୁବନେଶ୍ୱର(ଓଡ଼ିଶା ରିପୋର୍ଟର): ଦେଶ ସ୍ୱାଧୀନତାର ଦୀର୍ଘ ୭୪ବର୍ଷ ପରେ ଓଡ଼ିଶାରେ ଜାତିଆଣ ରାଜନୀତିର ମୂଳଦୁଆ ପକାଇବାକୁ ଶାସକ ବିଜେଡି ରଣନୀତି ପ୍ରସ୍ତୁତ କରିଛି। ଜାତିଭିତ୍ତିକ ରାଜନୀତିଠୁ ଢ଼େର ଦୂରରେ ରହୁଥିବା ଓଡ଼ିଶାବାସୀଙ୍କ ମନରେ ଜାତିଆଣ ଭେଦଭାବର ବୀଜରୋପଣ କରି ବିଜେଡି ଆଗାମୀ ପଂଚାୟତ ଓ ପୌର ନିର୍ବାଚନ ଜିଣିବାକୁ ଲକ୍ଷ୍ୟ ରଖିଛି। ବିଜେଡି ସମସ୍ତ ନିର୍ବାଚନରେ ‘ନବୀନ ପଟ୍ଟନାୟକଙ୍କ ଭାବମୂର୍ତ୍ତି’ ଓ ‘ନିଜ ସରକାରର କଲ୍ୟାଣମୂଳକ ଯୋଜନା ଓ କାର୍ଯ୍ୟକ୍ରମ’କୁ ଆଧାର କରି କ୍ରମାଗତ ସଫଳତା ପାଉଥିବାବେଳେ ଆଗାମୀ ନିର୍ବାଚନରେ ‘ଜାତିଆଣ କାର୍ଡ’କୁ ଅସ୍ତ୍ର କରିବାକୁ ଯାଉଛି। ଯଦିଓ ବିଜେଡି ଜନ୍ମ ହେବାର ୨୪ବର୍ଷ ପରେ ବି ଦଳ ଏପର୍ଯ୍ୟନ୍ତ ସ୍ୱତନ୍ତ୍ର ଭାବେ ନିଜର ‘ପଛୁଆ ବର୍ଗ ସେଲ୍’ଟିଏ ଖୋଲିବାରେ ସକ୍ଷମ ହୋଇନି। ରାଜ୍ୟରେ ପ୍ରାୟ ୫୪ପ୍ରତିଶତ ଓବିସି ବର୍ଗର ଥିବାବେଳେ ସେମାନଙ୍କୁ ୨୭ ପ୍ରତିଶତ ଟିକେଟ୍ ଦେଇ ବିଜେଡି କେବଳ ଧର୍ମକୁ ଆଖିଠାର ମାରିବା ସଦୃଶ ହୋଇଛି। ୨୧ବର୍ଷ ଧରି କ୍ଷମତାରେ ଥାଇ ମଧ୍ୟ ଓବିସି ବର୍ଗଙ୍କୁ ଶିକ୍ଷାନୁଷ୍ଠାନ ଓ ନିଯୁକ୍ତିରେ ୨୭ ପ୍ରତିଶତ ସଂରକ୍ଷଣ ଦେବାରେ ବିଫଳ ଥିବା ବିଜେଡି ସରକାର ନିଜର ବିଫଳତାକୁ ଲୁଚାଇବା ପାଇଁ ପଂଚାୟତ ନିର୍ବାଚନ ପୂର୍ବରୁ ଏହି ଜାତିଆଣ କାର୍ଡ ଖେଳିଛି, ଯାହାକୁ ନେଇ ରାଜନୀତିକ ମହଲରେ ଜୋରଦାର ଚର୍ଚ୍ଚା।
ସୂଚନା ଅନୁସାରେ, ଆସନ୍ତା ପଂଚାୟତ ଓ ପୌର ନିର୍ବାଚନକୁ ଦୃଷ୍ଟିରେ ରଖି ବିଜେଡି ଏବେ ‘ଓବିସି କାର୍ଡ’କୁ ଜୋରଦାର କରିଛି। ରାଜ୍ୟରେ ଓବିସି ଗଣନା ପାଇଁ ପ୍ରସ୍ତୁତି କରି ତାକୁ ଶୀତଳ ଭଣ୍ଡାରରେ ରଖିଥିବା ବିଜେଡି ସରକାର ଦୀର୍ଘବର୍ଷ ଧରି ପଛୁଆ ବର୍ଗଙ୍କୁ ଶିକ୍ଷା ଓ ନିଯୁକ୍ତିରେ ଆବଶ୍ୟକ ସଂରକ୍ଷଣ ଦେବାରେ ସକ୍ଷମ ହୋଇନାହାନ୍ତି। ମାତ୍ର ଏବେ ଉତ୍ତରପ୍ରଦେଶ, ବିହାର ଓ କର୍ଣ୍ଣାଟକ ଭଳି ଏଠାରେ ଜାତିଆଣ କାର୍ଡ ଖେଳି ନିର୍ବାଚନୀ ବୈତରଣୀ ପାର ହେବାକୁ ରଣନୀତି ପ୍ରସ୍ତୁତ କରିଛନ୍ତି। ଯଦିଓ ଓଡ଼ିଶାର ଲୋକେ ଏପର୍ଯ୍ୟନ୍ତ ଜାତିଭିତ୍ତିକ ରାଜନୀତିକୁ ନାପସନ୍ଦ ଓ ପ୍ରତ୍ୟାଖ୍ୟାନ କରିଆସିଛନ୍ତି। ଜାତିଆଣ ରାଜନୀତି ସପକ୍ଷରେ ଯୁକ୍ତି ବାଢ଼ୁଥିବା ଅନେକ ହେଭିୱେଟ ନେତାମାନେ ବି ଏବେ ନିଜର ଅସ୍ତିତ୍ୱ ପାଇଁ ସଂଘର୍ଷ କରୁଛନ୍ତି। ଏସବୁ ଜାଣିବା ସତ୍ତ୍ୱେ ବି ବିଜେଡି ‘ଓବିସି ବର୍ଗର’ ଭୋଟ୍ ହାତଛଡ଼ା ହେବା ଭୟରେ ଏବେ ଓବିସିଙ୍କୁ ୨୭ ପ୍ରତିଶତ ଟିକେଟ୍ ଦେବାକୁ ଘୋଷଣା କରିଛି।
ତେବେ ଅନୁସନ୍ଧାନରୁ ଜଣାପଡ଼ିଛି ଯେ, ୨୦୦୯, ୨୦୧୪ ଓ ୨୦୧୯ ବିଧାନସଭା ନିର୍ବାଚନରେ ବିଜେଡି କେବଳ ଏହି ଓବିସି ବର୍ଗକୁ ପ୍ରାୟ ୩୫ରୁ ୪୫ ପ୍ରତିଶତ ଟିକେଟ୍ ଦେଇଛି । ୨୦୧୭ ପଂଚାୟତ ନିର୍ବାଚନରେ ନିର୍ବାଚିତ ଜିଲ୍ଲା ପରିଷଦ ସଦସ୍ୟଙ୍କ ମଧ୍ୟରେ ପ୍ରାୟ ୫୨ରୁ ୫୫ ପ୍ରତିଶତ ହେଉଛନ୍ତି ଓବିସି ବର୍ଗର। ବିଜେଡି ନିଜ ଅଜାଣତରେ ହେଉ ବା ଜାଣତରେ ହେଉ ଯଦି ଏତେ ସଂଖ୍ୟକ ଓବିସି ବର୍ଗକୁ ଟିକେଟ୍ ଦେଇପାରିଛି ଓ ସେମାନେ ନିର୍ବାଚିତ ପ୍ରତିନିଧି ହୋଇପାରିଛନ୍ତି ତା’ହେଲେ ବିଜେଡି ଆଗାମୀ ନିର୍ବାଚନରେ ୨୭ ପ୍ରତିଶତ ଟିକେଟ୍ ଏହି ବର୍ଗର ଲୋକଙ୍କୁ ଦେବ କହି ସେମାନଙ୍କୁ ସନ୍ତୁଷ୍ଟ ନା ଅସନ୍ତୁଷ୍ଟ କରିବାକୁ ଚାହୁଁଛି ତାହା ବୁଝାପଡ଼ୁନି। ରାଜ୍ୟରେ ୨୦୯ଟି ଜାତି ଓ ଉପଜାତି ଏବେ ଏସଇବିସି ବା ଓବିସି ବର୍ଗର ହୋଇଥିବାବେଳେ ବିଜେଡି ଆଗାମୀ ନିର୍ବାଚନରେ ୨୭ ପ୍ରତିଶତ ଟିକେଟ୍ ଦେବ ବୋଲି ଉଲ୍ଲେଖ କରିବା ହାସ୍ୟାସ୍ପଦ ସଦୃଶ ।ତା’ଛଡ଼ା ରାଜ୍ୟରେ ପ୍ରାୟ ୨୪ ପ୍ରତିଶତ ଅନୁସୂଚିତ ଜନଜାତି ଓ ୧୭ ପ୍ରତିଶତ ଅନୁସୂଚିତ ଜାତି ବର୍ଗର ଲୋକ ଥିଲେ ମଧ୍ୟ ନିର୍ବାଚନରେ ସେଭଳି ଗୁରୁତ୍ୱର ସହ ଜାତିଭିତ୍ତିକ ପ୍ରଚାର କେବେ ଓଡ଼ିଶାରେ ହୋଇନାହିଁ । ଜାତି,ଧର୍ମ ଓ ବର୍ଣ୍ଣ ନିର୍ବିର୍ଶେଷରେ ରାଜ୍ୟବାସୀ ନିଜର ପ୍ରତିନିଧିଙ୍କୁ ଭୋଟ୍ ଦେଇଥାନ୍ତି । ମାତ୍ର ପ୍ରଥମଥର ପାଇଁ ବିଜେଡି ଓଡ଼ିଶା ଭଳି ରାଜ୍ୟରେ ଓବିସି କାର୍ଡ ଖେଳି ଜାତିଭିତ୍ତିକ ପ୍ରଚାର ଓ ସମାଜରେ ଭେଦଭାବ ବୃଦ୍ଧି କରିବାର ଆଶଙ୍କାକୁ ବଢ଼ାଇଛି ।
ରାଜନୀତିକ ବିଶ୍ଲେଷକଙ୍କ ମତରେ, ଯଦି ବିଜେଡି ବାସ୍ତବରେ ‘ଓବିସି ବର୍ଗ’ଙ୍କ ପାଇଁ ଏତେ ଦରଦ ଦେଖାଉଛି ତା’ହେଲେ ୨୪ବର୍ଷ ମଧ୍ୟରେ ଦଳରେ ଗୋଟିଏ ସେଲ୍ ଖୋଲିପାରିଲା ନାହିଁ । ନିଯୁକ୍ତି କିମ୍ବା ଶିକ୍ଷାନୁଷ୍ଠାନରେ ଏହି ବର୍ଗର ଲୋକଙ୍କୁ ଆବଶ୍ୟକ ସଂରକ୍ଷଣ ବି ଦେଲା ନାହିଁ । ଓବିସିଙ୍କୁ ୨୭ ପ୍ରତିଶତ ସଂରକ୍ଷଣକୁ ବିରୋଧ କରି ସୁପ୍ରିମକୋର୍ଟରେ ୧୯୯୧ ମସିହାରେ ଦାଖଲ ହୋଇଥିବା ପିଟିସନକୁ ଏପର୍ଯ୍ୟନ୍ତ ପ୍ରତ୍ୟାହାର ପାଇଁ ମଧ୍ୟ ଉଦ୍ୟମ କରିନି । ଯଦିଓ ନିର୍ବାଚନ ଆସିଲେ କୃଷକ ୱିଙ୍ଗ, ଆଇନ ସାମ୍ମୁଖ୍ୟ, ସାଂସ୍କୃତିକ ୱିଙ୍ଗ, ଅନୁସୂଚିତ ଜାତି ଓ ଜନଜାତି ୱିଙ୍ଗ, ଶ୍ରମିକ ୱିଙ୍ଗ ଭଳି ନୂଆ ନୂଆ ସେଲ୍ ଗଠନ କରି ଭୋଟବ୍ୟାଙ୍କ ସୃଷ୍ଟି କରିବାକୁ ବିଜେଡି ରଣନୀତି ପ୍ରସ୍ତୁତ କରିଥାଏ । ଏବେ ଠିକ୍ ସେହି ଢଙ୍ଗରେ ପଂଚାୟତ ଓ ପୌର ନିର୍ବାଚନ ପୂର୍ବରୁ ଓବିସି ବର୍ଗଙ୍କୁ ୨୭ ପ୍ରତିଶତ ସଂରକ୍ଷଣ ଦେବାକୁ ଘୋଷଣା କରିଛି। ୨୦୧୯ ସାଧାରଣ ନିର୍ବାଚନ ପୂର୍ବରୁ ‘ମହିଳା କାର୍ଡ’କୁ ଜୋରସୋର ଖେଳି ଲୋକସଭା ଓ ବିଧାନସଭା ନିର୍ବାଚନରେ ୩୩ ପ୍ରତିଶତ ମହିଳାଙ୍କୁ ପ୍ରାର୍ଥୀ କରିବ ବୋଲି ଘୋଷଣା କଲା। ମାତ୍ର ବିଧାନସଭାରେ ୧୫ ପ୍ରତିଶତ ମହିଳା ପ୍ରାର୍ଥୀ(୨୦ଜଣଙ୍କୁ ପ୍ରାର୍ଥୀ କରିଥିଲା ବିଜେଡି)ଙ୍କୁ ଓହ୍ଲାଇବାକୁ ସାହାସ ଜୁଟାଇ ପାରିଲା ନାହିଁ ।
ଅନୁସନ୍ଧାନରୁ ଜଣାପଡ଼ିଛି ଯେ, ୨୦୧୭ ପଂଚାୟତ ନିର୍ବାଚନବେଳେ ବିଜେପି ରାଜ୍ୟରେ ପାଇକ ବା ଖଣ୍ଡାୟତ ଭୋଟ ବ୍ୟାଙ୍କକୁ ହାତେଇବା ପାଇଁ ଉଦ୍ୟମ କରି ପାଇକ ବିଦ୍ରୋହକୁ ମାନ୍ୟତା ଦେବାକୁ ଦିଲ୍ଲୀ ଦରବାର ପର୍ଯ୍ୟନ୍ତ ଯାଇଥିଲା । ରାଜ୍ୟରେ ପ୍ରାୟ ୨୨ ପ୍ରତିଶତ ଖଣ୍ଡାୟତ ସମୁଦାୟର ଲୋକେ ଏବେ ରାଜ୍ୟର ଏସଇବିସି ବର୍ଗରେ ଥିବାବେଳେ ସେମାନେ କେନ୍ଦ୍ର ସରକାରଙ୍କ ଓବିସି ବର୍ଗର ତାଲିକାରେ ସାମିଲ ହୋଇପାରି ନାହାନ୍ତି । ଏହି ବର୍ଗର ଲୋକଙ୍କୁ ନିଜର ଭୋଟବ୍ୟାଙ୍କ କରିବା ପାଇଁ ନବୀନ ଏବେ ‘ଓବିସି କାର୍ଡ’ ଖେଳିବା ସହ ଦୀର୍ଘ ୨୧ବର୍ଷର ସରକାରର ବିଫଳତା ଓ ଉତ୍ତରଦାୟିତ୍ୱରୁ ନଜର ହଟାଇବାକୁ ପ୍ରୟାସ ଆରମ୍ଭ କରିଥିବା ଜଣାପଡ଼ିଛି ।