ତାଲିକା କେଁ; ଆପତ୍ତି ଉଠାଇଲେ ବିଜେପି ଓ କଂଗ୍ରେସ

ଭୁବନେଶ୍ୱର (ଓଡ଼ିଶା ରିପୋର୍ଟର): ପଞ୍ଚାୟତ ନିର୍ବାଚନ ପାଇଁ ପ୍ରକାଶ ପାଇଛି ଆସନ ସଂରକ୍ଷଣର ଚିଠା ତାଲିକା। ଏଥିରେ ପାତର ଅନ୍ତର କରାଯାଇଥିବା ଅଭିଯୋଗ ହୋଇଛି। ଯାହାକୁ ନେଇ ଆରମ୍ଭ ହୋଇଛି ଆରୋପ ପ୍ରତ୍ୟାରୋପ। ଆଉ ରାଜ୍ୟ ସରକାରଙ୍କ ଏ ଆସନ ସଂରକ୍ଷଣ ଚିଠା ତାଲିକାକୁ ବିରୋଧ କରୁଛନ୍ତି ରାଜ୍ୟର ପ୍ରମୁଖ୍ୟ ରାଜନୈତିକ ଦଳ ବିଜେପି ଓ କଂଗ୍ରେସ। ଆଉ ଅଭିଯୋଗ କରିଛନ୍ତି, ବିଜେଡି ନେତାଙ୍କ ପ୍ରଭାବରେ ଏଭଳି ତାଲିକା ପ୍ରକାଶ କରାଯାଇଛି। ଆଉ ଏହାର ଜବାବ ରଖିଛି ବିଜେଡି।

ପଶ୍ଚିମ ଓଡ଼ିଶାର ଝାରସୁଗୁଡ଼ା, ନୂଆପଡ଼ା, ସମ୍ବଲପୁର ଓ କଳାହାଣ୍ଡିରେ ଜିଲ୍ଲା ପରିଷଦ ସଦସ୍ୟ ବର୍ଗରେ ପଛୁଆ ବର୍ଗଙ୍କ ଲାଗି ଆଦୌ ସଂରକ୍ଷଣ ନାହିଁ। ବରଗଡ଼ ଓ ବଲାଙ୍ଗିର ଜିଲ୍ଲାରେ ୩ଟି ଲେଖାଏଁ, ସୁନ୍ଦରଗଡ଼ ଏବଂ ସୁବର୍ଣ୍ଣପୁରରେ ୨ଟି ଲେଖାଏଁ ଓ ବୌଦ୍ଧରେ ପଛୁଆ ବର୍ଗ ଲାଗି ଗୋଟିଏ ସିଟ ସଂରକ୍ଷଣ ରହିଛି। କଳାହାଣ୍ଡି ଜିଲ୍ଲାରେ ଅନୁସୂଚିତ ଜାତି ଓ ଜନଜାତିଙ୍କ ପାଇଁ ୧୮ଟି ଆସନ ସଂରକ୍ଷଣ ଥିବା ବେଳେ ଅଣସଂରକ୍ଷିତ ବର୍ଗ ପାଇଁ ଅନ୍ୟ ୧୮ଟି ଆସନ ରହିଛି। ତେବେ ପଛୁଆ ବର୍ଗ ପାଇଁ ଗୋଟିଏ ମଧ୍ୟ ଆସନ ସଂରକ୍ଷିତ ନଥିବାରୁ ସେମାନଙ୍କୁ ଅବହେଳା କରାଯାଇଥିବା ଅଭିଯୋଗ ହୋଇଛି।

ବରଗଡ଼ ଜିଲ୍ଲାର ଗୁଡେଶିରା ପଂଚାୟତରେ ଅନୁସୂଚିତ ଜାତିଙ୍କ ସଂଖ୍ୟା ଅଧିକ ରହିଥିବା ବେଳେ ସରପଞ୍ଚ ଆସନ କିନ୍ତୁ ଅଣସଂରକ୍ଷିତ ମହିଳା ପାଇଁ ଉଦ୍ଦିଷ୍ଟ ରହିଛି। ଜିଲ୍ଲାରେ ଅନ୍ୟ ସ୍ଥାନରେ ମଧ୍ୟ ଆସନ ସଂରକ୍ଷଣ ଠିକ୍‌ରେ କରାଯାଇନଥିବା ଅଭିଯୋଗ ହେଉଛି। କେବଳ ବରଗଡ଼ ଜିଲ୍ଲା ନୁହେଁ, ରାଜ୍ୟରେ ଥିବା ୯୨ ହଜାର ଓ୍ୱାର୍ଡ, ୬୮୦୦ ପଞ୍ଚାୟତ ଓ ୮୫୩ ଜିଲ୍ଲା ପରିଷଦ ଆସନ ମଧ୍ୟରୁ ଅଧିକାଂଶ ସ୍ଥାନରେ ଗଡ଼ବଡ ହୋଇଥିବା ଅଭିଯୋଗ ହୋଇଛି।

ସଂରକ୍ଷଣ ଚିଠା ତାଲିକା ପ୍ରକାଶ ପାଇବା ପରେ ବିଜେପି ଓ କଂଗ୍ରେସ ରାଜ୍ୟ ସରକାରଙ୍କୁ ଟାର୍ଗେଟ କରିଛନ୍ତି। ନିର୍ଦ୍ଧାରିତ ତାରିଖ ଅର୍ଥାତ ଅକ୍ଟୋବର ୮ ତାରିଖରେ ୧୦ଟି ଜିଲ୍ଲାରେ ସଂରକ୍ଷଣ ତାଲିକା ଜିଲ୍ଲାପାଳମାନେ ପ୍ରକାଶ କରନଥିବା ଅଭିଯୋଗ କରିଛି ବିଜେପି। ଏହାଦ୍ୱାରା ସାମ୍ବିଧାନିକ ବିଧି ବ୍ୟବସ୍ଥାର ଉଲ୍ଲଂଘନ ହୋଇଥିବା ଦଳ ପକ୍ଷରୁ ଏକ ସାମ୍ବାଦିକ ସମ୍ମିଳନୀରେ ଅଭିଯୋଗ କରାଯାଇଛି। ସେହିପରି ଚିଠା ତାଲିକା ସଂପୂର୍ଣ୍ଣ ତ୍ରୁଟିପୂର୍ଣ୍ଣ ବୋଲି ଅଭିଯୋଗ କରିବା ସହିତ ରାଜ୍ୟ ନିର୍ବାଚନ ଆୟୋଗରେ ଅଭିଯୋଗ ଦାଖଲ କରାଯିବ ବୋଲି ଦଳ କହିଛି। କଂଗ୍ରେସ ଅଭିଯୋଗ କରିଛି, ବିଜେଡି ନେତାଙ୍କ ପ୍ରଭାବରେ ଏଭଳି ତାଲିକା ପ୍ରକାଶ କରାଯାଇଛି। ଏହା ତ୍ରୁଟିପୂର୍ଣ୍ଣ ଥିବାରୁ ବାତିଲ କରିବାକୁ ଦାବି କରିଛି ଦଳ। ବିଜେଡି କହିଛି, ଯାହାର କିଛି ଆପତ୍ତି ରହିଛି ସେମାନେ ଅଭିଯୋଗ କରିପାରିବେ।

କଂଗ୍ରେସ ବିଧାୟକ ତାରାପ୍ରାସାଦ ବାହିନୀପତି କହିଛନ୍ତି-“କେଉଁଟା ଏସି, କେଉଁଟା ଏସ୍‌ଟି, କେଉଁଟା ଓବିସି ହେବ ତାହା ପୂର୍ବରୁ ନିର୍ଦ୍ଧାରଣ କରାଯାଇଛି। ପ୍ରକାଶ ପାଇଥିବା ତାଲିକା ସମ୍ପୂର୍ଣ୍ଣ ତ୍ରୁଟିପୂର୍ଣ୍ଣ ରହିଛି। ରାଜନୈତିକ ଅଭିସନ୍ଧୀ ରଖି ଏପରି ତାଲିକା ପ୍ରକାଶ କରାଯାଇଛି। ଏଭଳି ତାଲିକାକୁ ବାତିଲ କରାଯାଉଛ।”

ବିଜେପି ସାଧାରଣ ସଂପାଦିକା ଲେଖାଶ୍ରୀ ସାମନ୍ତସିଂହାର କହିଛନ୍ତି-“ଏପ୍ରକ୍ରିୟା ସମ୍ପୂର୍ଣ୍ଣ ଭାବେ ତ୍ରୁଟିପୂର୍ଣ୍ଣ। ରାଜ୍ୟ ସରକାର ତାଙ୍କର ଦାୟୀତ୍ୱ ଠିକ୍‌ ଭାବେ ସମ୍ପାଦନ କରିନାହାନ୍ତି।”

ବିଜେଡି ବିଧାୟକ ପ୍ରଶାନ୍ତ ମୁଦୁଲି କହିଛନ୍ତି-“ବିଜ୍ଞପ୍ତି ପ୍ରକାଶ ପାଇବା ପରେ ବିଭିନ୍ନ ପଞ୍ଚାୟତରେ ଥିବା ଆଶାୟୀ ପ୍ରାର୍ଥୀମାନେ ସେମାନଙ୍କୁ ସୁହାଇଲା ଭଳି ବ୍ୟବସ୍ଥା ହୋଇନଥିଲେ ଅଭିଯୋଗ କରିପାରିବେ। ଆଉ ଅଭିଯୋଗର ସତ୍ୟତା ଥିଲେ ପରିବର୍ତ୍ତନ କରାଯାଇପାରିବ।”

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।