ପିପିଲି ପାଇଁ ସଜବାଜ: ନବୀନଙ୍କ ମେଗା କାର୍ଯ୍ୟକ୍ରମରେ ନଥିଲେ ମହାରଥୀଙ୍କ ପରିବାର !

ଭୁବନେଶ୍ୱର(ଓଡ଼ିଶା ରିପୋର୍ଟର):ପିପିଲି ଉପନିର୍ବାଚନ ପୂର୍ବରୁ ବଢ଼ିଚାଲିଥିବା ପଲିଟିକାଲ୍ ପାରା ଭିତରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ୟାକେଜ ଘୋଷଣା କରିଛନ୍ତି। ରାସ୍ତାଘାଟରୁ ଆରମ୍ଭ କରି ଜଳସେଚନ, ଷ୍ଟାଡ଼ିୟମଠୁ ଆରମ୍ଭ କରି ବସ୍‌ଷ୍ଟାଣ୍ଡ । ପିପିଲି-ଡେଲାଙ୍ଗ ନିର୍ବାଚନମଣ୍ଡଳୀରେ ସବୁ ପ୍ରକାର ଭିତ୍ତିଭୂମିର ବିକାଶମୂଳକ କାର୍ଯ୍ୟକ୍ରମ ପାଇଁ ଆଜି ଭର୍ଚୁଆଲ୍ ମାଧ୍ୟମରେ ୬୮ କୋଟିର ପ୍ୟାକେଜ୍ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ। ତାହାରି ଭିତରେ ପ୍ରଗତି ପଥେ ପିପିଲି କାର୍ଯ୍ୟକ୍ରମ ଜରିଆରେ ପିପିଲି ବ୍ଲକ୍ ଓ ପିପିଲି ପୌରାଞ୍ଚଳ ପାଇଁ ୪୧ କୋଟି ୨୬ ଲକ୍ଷ ଟଙ୍କାର ଉନ୍ନୟନ ପ୍ରକଳ୍ପର ଶୁଭାରମ୍ଭ କରିଛନ୍ତି । ଏହି ଅବସରରେ ସ୍ୱର୍ଗତ ପ୍ରଦୀପ ମହାରଥୀଙ୍କୁ ମୁଖ୍ୟମନ୍ତ୍ରୀ ଶ୍ରଦ୍ଧାଞ୍ଜଳି ଜଣାଇବା ସହ ୩୦ ବର୍ଷ ଧରି ଜନତାଙ୍କ ପ୍ରତି ମହାରଥୀଙ୍କ ଉତ୍ସର୍ଗୀକୃତ ସେବାକୁ ମନେପକାଇଥିଲେ । ତେବେ ଦିବଂଗତ ପ୍ରଦୀପ ମହାରଥୀଙ୍କ ପରିବାରର ଉତ୍ତରାଧିକାରୀ କୁହାଯାଉଥିବା ପୁଅ କିମ୍ବା ପତ୍ନୀଙ୍କୁ ଏହି ମେଗା କାଯର୍ୟକ୍ରମରେ ଦେଖିବାକୁ ମିଳିନଥିଲା।

ସଭାରେ ଜନତା ଗହଳି

ଉପନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀଙ୍କ ଏହି ମେଗା କାର୍ଯ୍ୟକ୍ରମକୁ ନେଇ ଆରମ୍ଭ ହୋଇଛି ରାଜନୈତିକ ବୟାନବାଜି। ବିରୋଧୀ କଂଗ୍ରେସ ପୂର୍ବ ଉପନିର୍ବାଚନ ଯଥା ବିଜେପୁର, ପାଟକୁରା, ତିର୍ତ୍ତୋଲ ଓ ବାଲେଶ୍ୱରରେ ପୂର୍ବରୁ ମୁଖ୍ୟମନ୍ତ୍ରୀ ଯେଉଁ ପ୍ରତିଶ୍ରୁତି ଦେଇଥିଲେ ତାହା କୁଆଡ଼େ ଗଲା ବୋଲି ପ୍ରଶ୍ନ କରିଛନ୍ତିା ଏବେ ପିପିଲି ଉପନିର୍ବାଚନକୁ ଦେଖି ମୁଖ୍ୟମନ୍ତ୍ରୀ ବହୁ କୋଟି ଟଙ୍କାର ପ୍ରକଳ୍ପ ଘୋଷଣା, ପିପିଲି ନିର୍ବାଚନମଣ୍ଡଳୀ ବାସୀଙ୍କ ପାଇଁ ଲଲିପପ୍ ବୋଲି କହିଛି ବିଜେପି ।

ପିପିଲି ଉପନିର୍ବାଚନ ପାଇଁ କୌଣସି ମୁହୂର୍ତ୍ତରେ ବିଗୁଲ ବଜାଇପାରନ୍ତି ନିର୍ବାଚନ କମିଶନ୍ । କିନ୍ତୁ ଏଯାଏଁ ସ୍ପଷ୍ଟ ହୋଇନି କୌଣସି ଦଳର ପ୍ରାର୍ଥୀଙ୍କ ନାଁ। ସବୁ ଦଳରେ ଚାଲିଛି ଅଙ୍କକଷା। ବିଜେଡି କାହାକୁ କରିବ ମହାରଥୀଙ୍କ ଉତ୍ତରାଧିକାରୀ? ମହାରଥୀଙ୍କ ପତ୍ନୀ ପ୍ରତିଭା ନା ପୁଅ ରୁଦ୍ରପ୍ରତାପ ? ଚର୍ଚ୍ଚା ହେଉଛି ଦଳୀୟ ସୁପ୍ରିମୋ କିଛି ସରପ୍ରାଇଜ୍ କାର୍ଡ ବି ଖେଳିପାରନ୍ତି । ସେପଟେ କଂଗେ୍ରସରେ ଅଜିତ ମଙ୍ଗରାଜ ଏବଂ ନିଶିକାନ୍ତ ମିଶ୍ର ଦୌଡ଼ରେ ଆଗରେ ଥିବାବେଳେ ବିଜେପି ପୁଣି ଥରେ ଆଶ୍ରିତ ପଟ୍ଟନାୟକଙ୍କୁ ପ୍ରାର୍ଥୀ କରିପାରେ ବୋଲି ଚର୍ଚ୍ଚା ହେଉଛି ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।