ବିଜେଡି ଶାସନକାଳରେ ରାଜ୍ୟରେ ଅବସରପ୍ରାପ୍ତ ସରକାରୀ କର୍ମଚାରୀଙ୍କୁ ବେଧଡ଼କ ପୁନଃନିଯୁକ୍ତି ବା ଥଇଥାନ ଉପରେ ଅଙ୍କୁଶ ଲଗାଇଥିଲେ ମୋହନ ମାଝୀଙ୍କ ସରକାର । ଏଭଳି ଥଇଥାନ ହୋଇଥିବା ସବୁ କର୍ମଚାରୀମାନଙ୍କୁ ବିଦା କରିବା ସହ କର୍ମଚାରୀଙ୍କ ପୁନଃନିଯୁକ୍ତି କେବଳ ବିରଳ କ୍ଷେତ୍ରରେ ବିଚାର କରାଯିବ ବୋଲି ସରକାରୀ ନିର୍ଦ୍ଦେଶନାମା ଜାରି କରିଥିଲେ । ଅତି ଜରୁରୀ ଥିଲେ ସରକାରଙ୍କ ଅନୁମତି ନେଇ ଚାକିରିରୁ ଅବସରପରେ ଜଣେ କର୍ମଚାରୀଙ୍କୁ ସର୍ବାଧିକ ୩ବର୍ଷ ପର୍ଯ୍ୟନ୍ତ ଓ ତାଙ୍କୁ ୬୫ବର୍ଷ ବୟସ ହେବା ପର୍ଯ୍ୟନ୍ତ ପୁନଃନିଯୁକ୍ତିରେ ରଖାଯାଇପାରିବ ବୋଲି ରୋକଠୋକ୍ ଜଣାଇଥିଲେ। ମାତ୍ର କିଛିଦିନର ବିରାମ ପରେ ସରକାରଙ୍କ ସେହି ନିୟମକୁ ଫୁ’କରି ୭୦ବର୍ଷ ବୟସର କର୍ମଚାରୀଙ୍କୁ ବି ପୁନଃଥଇଥାନ କରାଯାଇଥିବା ଜଣାପଡ଼ିଛି । ରାଜ୍ୟ ସରକାରଙ୍କ ଦ୍ୱାରା ଧାର୍ଯ୍ୟ କୌଣସି ପ୍ରକାରର ନୀତିନିୟମକୁ ପାଳନ ନକରି କିଭଳି ଓ କେଉଁ ଅଦୃଶ୍ୟ କାରଣରୁ ଜଣେ ୭୦ବର୍ଷୀୟ ଅବସରପ୍ରାପ୍ତ କର୍ମଚାରୀଙ୍କୁ ଓରେରା କନସଲଟାଣ୍ଟ ଭାବେ ଥଇଥାନ କରାଯାଇଛି ତାହା ଏବେ ସାଧାରଣରେ ଚର୍ଚ୍ଚାର ବିଷୟ ପାଲଟିଛି । କେବଳ ସେତିକି ନୁହେଁ ଓରେରାର ସଚିବ ପଦରେ ଜଣେ ବରିଷ୍ଠ ଓଏଏସ୍ ଅଫିସର ଥାଇ ମଧ୍ୟ ତାଙ୍କୁ ଅଣଦେଖା କରି ଓଡ଼ିଶା ଅର୍ଥ ସେବାର ଜଣେ ଜୁନିୟର ଅଫିସରଙ୍କୁ ସମସ୍ତ ପ୍ରକାରର ଆର୍ଥିକ ଦାୟିତ୍ୱ ନ୍ୟସ୍ତ କରାଯାଇଛି । ‘ଅଫିସ୍ ଅର୍ଡର’ ଆଦି ଜାରି ପାଇଁ ପ୍ରଶାସନିକ ଅଧିକାରୀମାନେ ଥାଉଥାଉ ଗୋଟିଏ ଦିନରେ ‘ଇନଚାର୍ଜ ଅଧ୍ୟକ୍ଷ’ଙ୍କ ଦସ୍ତଖତରେ କାହିଁକି ଏଭଳି ‘ଅଫିସ୍ ଅର୍ଡର’ ମାନ ଜାରି ହୋଇଛି ତାହା ଏବେ ଓରେରା କାର୍ଯ୍ୟାଳୟର ସ୍ୱଚ୍ଛତା ଓ ପାରଦର୍ଶିତା ଉପରେ ପ୍ରଶ୍ନବାଚୀ ସୃଷ୍ଟି କରିଛି ।
୭୦ବର୍ଷ ବୟସରେ ବି ଥଇଥାନ
ସବୁ ନିୟମକୁ ଫୁ’ କରି ରାତାରାତି ଜଣେ ଷ୍ଟେନୋ ପାହ୍ୟା(ବ୍ୟକ୍ତିଗତ ସହାୟକ/ବ୍ୟକ୍ତିଗତ ସଚିବ)ର ୭୦ବର୍ଷ ବୟସ୍କ ଅବସରପ୍ରାପ୍ତ କର୍ମଚାରୀ କୈଳାସ ଚନ୍ଦ୍ର ଚୌଧୁରୀଙ୍କୁ ଗତ ମାର୍ଚ୍ଚ ୨୯ତାରିଖରେ ଓଡ଼ିଶା ରିଏଲ ଇଷ୍ଟେଟ୍ ନିୟନ୍ତ୍ରକ ପ୍ରାଧିକରଣ(ଓରେରା)ରେ କନସଲଟାଣ୍ଟ ଭାବେ ଥଇଥାନ କରାଯାଇଛି । ଏହି ନିଯୁକ୍ତି ପାଇଁ ରାଜ୍ୟ ସରକାରଙ୍କ ଦ୍ୱାରା ନିର୍ଦ୍ଧାରିତ କୌଣସି ଗୋଟିଏ ବି ନିୟମକୁ ପାଳନ କରାଯାଇ ନଥିବା ଜଣାପଡ଼ିଛି । ଓରେରାରେ ନିୟମିତ ଅଧ୍ୟକ୍ଷ ନିଯୁକ୍ତି ନହେବା ପର୍ଯ୍ୟନ୍ତ ଅଧ୍ୟକ୍ଷ ଦାୟିତ୍ୱ ତୁଲାଇବା ପାଇଁ ମାର୍ଚ୍ଚ ୨୮ତାରିଖରେ ଓରେରା ସଦସ୍ୟ ଗୋପାଳ ଚନ୍ଦ୍ର ପଟ୍ଟନାୟକଙ୍କୁ ରାଜ୍ୟ ସରକାର ନିଯୁକ୍ତି ଦେଲେ । ଆଉ ୨୯ତାରିଖରେ ଅଧ୍ୟକ୍ଷ ଦାୟିତ୍ୱ ଗ୍ରହଣ କରୁକରୁ ଶ୍ରୀ ପଟ୍ଟନାୟକ ନିଜ ଦସ୍ତଖତରେ ଏକ ଅଫିସ ଅର୍ଡର ଜାରି କରି ୭୦ବର୍ଷ ବୟସ୍କ କୈଳାସ ଚନ୍ଦ୍ର ଚୌଧୁରୀଙ୍କୁ ଓରେରା କନସଲଟାଣ୍ଟ(ପିଏସ/ପିଏ) ଭାବେ ନିଯୁକ୍ତି ଦେଇଛନ୍ତି । ଶ୍ରୀ ଚୌଧୁରୀ ଦାୟିତ୍ୱ ନେବାର ୬ମାସ ପର୍ଯ୍ୟନ୍ତ ଏହି କାର୍ଯ୍ୟ ତୁଲାଇବେ ଓ ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ସେ ଓରେରା ପ୍ରଶାସନିକ ସଦସ୍ୟ(ପ୍ରଦୀପ କୁମାର ବିଶ୍ୱାଳ)ଙ୍କ ପାଖରେ କାର୍ଯ୍ୟ କରିବେ ବୋଲି ନିର୍ଦ୍ଦେଶନାମାରେ ଉଲ୍ଲେଖ ରହିଛି । ତେବେ ଓରେରା ସଚିବ ଭାବେ ବରିଷ୍ଠ ଓଏଏସ ଶ୍ରାବଣୀ ପଟ୍ଟନାୟକ ଓ ତାଙ୍କ ଟିମ୍ କାର୍ଯ୍ୟ କରୁଥିଲେ ମଧ୍ୟ ଏସବୁ ପ୍ରଶାସନିକ ନିର୍ଦ୍ଦେଶନାମା ଓରେରା ଅଧ୍ୟକ୍ଷ ଶ୍ରୀ ପଟ୍ଟନାୟକଙ୍କ ଦସ୍ତଖତରେ କାହିଁକି ଜାରି ହେଲା ତଥା ନିର୍ଦ୍ଦେଶନାମା ଜାରି ପାଇଁ ଆବଶ୍ୟକ ପ୍ରକ୍ରିୟାକୁ କାହିଁକି ପାଳନ କରାଗଲାନି ତାହା ଏବେ ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି ।
ସବୁଠୁ ଗୁରୁତ୍ୱପୂର୍ଣ୍ଣ କଥା ହେଲା, ଅବସରପ୍ରାପ୍ତ କର୍ମଚାରୀଙ୍କ ନିଯୁକ୍ତି ଉପରେ ରାଜ୍ୟ ସରକାର ଅଙ୍କୁଶ ଜାରି କରିବା ପରେ ଶ୍ରୀ ଚୌଧୁରୀଙ୍କୁ ୨୦୨୪ ଡିସେମ୍ବର ମାସରେ ଓରେରାର ତତକାଳୀନ ଅଧ୍ୟକ୍ଷ ସିଦ୍ଧାନ୍ତ ଦାସ କାର୍ଯ୍ୟରୁ ଅନ୍ତର କରିଥିଲେ । ଶ୍ରୀ ଚୌଧୁରୀ ୨୦୧୪ ମାର୍ଚ୍ଚ ୩୧ତାରିଖରେ ସରକାରୀ ଚାକିରିରୁ ଅବସର ନେବା ପରେ ତତକାଳୀନ ସରକାର ତାଙ୍କୁ ଅର୍ଥ ବିଭାଗର ଓଏସଡି ଭାବେ ୪ବର୍ଷ ଥଇଥାନ କରିଥିଲେ । ସେଠାରେ ୪ବର୍ଷ କାର୍ଯ୍ୟ କରିବା ପରେ ତାଙ୍କୁ କାର୍ଯ୍ୟରୁ ଅନ୍ତର କରାଯାଇଥିଲା । ମାତ୍ର ଓରେରା ପ୍ରଶାସନିକ ସଦସ୍ୟ ଭାବେ ପ୍ରଦୀପ କୁମାର ବିଶ୍ୱାଳ ଯୋଗ ଦେବା ପରେ ଶ୍ରୀ ଚୌଧୁରୀଙ୍କୁ ଓରେରାରେ ତାଙ୍କ ଅଫିସରେ ୨୦୧୮ ସେପ୍ଟେମ୍ବର ୧୮ତାରିଖରେ ପୁନଃ ଥଇଥାନ କରାଯାଇଥିଲା । ମୋହନ ମାଝୀ ସରକାରଙ୍କ ନିର୍ଦ୍ଦେଶନାମା ଓ ଶ୍ରୀ ଚୌଧୁରୀଙ୍କ ବୟସକୁ ଦେଖି ତତକାଳୀନ ଓରେରା ଅଧ୍ୟକ୍ଷ ସିଦ୍ଧାନ୍ତ ଦାସ ତାଙ୍କୁ କାର୍ଯ୍ୟରୁ ହଟାଇ ଦେଇଥିଲେ । ମାତ୍ର ୩ମାସର ବ୍ୟବଧାନରେ ପୁଣିଥରେ ଶ୍ରୀ ଚୌଧୁରୀଙ୍କୁ ଓରେରା କନସଲଟାଣ୍ଟ ଭାବେ ଥଇଥାନ କରାଯାଇଛି । ୭୦ବର୍ଷ ବୟସ୍କ ଜଣେ ଷ୍ଟେନୋ ପାହ୍ୟାର କର୍ମଚାରୀଙ୍କ ପାଖରେ କ’ଣ ଏଭଳି ବିଶେଷତ୍ୱ ରହିଛି ଯେ ତାଙ୍କ ବିନା ଓରେରା ଅଫିସ୍ କାର୍ଯ୍ୟ କରିପାରୁନି ଓ ତାଙ୍କୁ ଚାକିରିରୁ ଅବସର ନେବାର ୧୦ବର୍ଷ ପରେ ମଧ୍ୟ ପୁନଃଥଇଥାନ କରାଯାଉଛି ତାହା ଏବେ ଚର୍ଚ୍ଚାର ବିଷୟ ପାଲଟିଛି ।
ପ୍ରଶାସନିକ ଅସଙ୍ଗତି ଓ କ୍ଷମତା ହ୍ରାସ
ଓରେରା ସଚିବ ଭାବେ ବରିଷ୍ଠ ଓଏଏସ୍(ଏସଏଜି) ଶ୍ରାବଣୀ ପଟ୍ଟନାୟକ କାର୍ଯ୍ୟ କରୁଛନ୍ତି । ଓରେରା ସଦସ୍ୟମାନଙ୍କ ପ୍ରଶାସନିକ ନିଷ୍ପତ୍ତିକୁ କାର୍ଯ୍ୟକାରୀ କରିବା ଦାୟିତ୍ୱ ଶ୍ରୀମତୀ ପଟ୍ଟନାୟଙ୍କର । ଓରେରା ଅଧ୍ୟକ୍ଷ ଓ ସଦସ୍ୟଙ୍କ ନିଷ୍ପତ୍ତିକୁ କାର୍ଯ୍ୟକାରୀ କରିବା ଓ ସରକାରଙ୍କ ସହ ସମନ୍ୱୟ ରକ୍ଷା କରିବା ଦାୟିତ୍ୱ ବି ହେଉଛି ଓରେରା ସଚିବଙ୍କର । କିନ୍ତୁ ମାର୍ଚ୍ଚ ୨୯ରେ ଓରେରା ଇନଚାର୍ଜ ଅଧ୍ୟକ୍ଷ ଦାୟିତ୍ୱ ଗ୍ରହଣ କରିବା ପରେ ଗୋପାଳ ଚନ୍ଦ୍ର ପଟ୍ଟନାୟକ ଅନ୍ୟ ଏକ ଅଫିସ୍ ଅର୍ଡର ଜାରି କରିଛନ୍ତି । ଯେଉଁଥିରେ ଓରେରା ସଚିବ ଶ୍ରୀମତୀ ପଟ୍ଟନାୟକଙ୍କଠୁ ସମସ୍ତ ପ୍ରକାରର ଆର୍ଥିକ ଦାୟିତ୍ୱ କାଢ଼ି ନେଇଛନ୍ତି । ଶ୍ରୀମତୀ ପଟ୍ଟନାୟକଙ୍କୁ କେବଳ ରେଜିଷ୍ଟ୍ରେସନ ବ୍ରାଂଚ ଓ ଆଇଇସି ବ୍ରାଂଚ ସହ ଆରଟିଆଇ ଆକ୍ଟରେ ପ୍ରଥମ ଆପିଲେଟ୍ ଅଥରିଟି ଭାବେ କାର୍ଯ୍ୟ କରିବାକୁ କୁହାଯାଇଛି । ଆଉ ତାଙ୍କଠୁ ଜୁନିୟର ଜଣେ ଅର୍ଥସେବା ଅଧିକାରୀ(ଓଏଫଏସ) ଦୀପକ କୁମାର ବେଶ୍ରାଙ୍କୁ ସମସ୍ତ ପ୍ରକାରର ଆର୍ଥିକ ଦାୟିତ୍ୱ ନ୍ୟସ୍ତ କରାଯାଇଛି । ଅର୍ଥାତ୍ ଖୋଲାଖୋଲି ଭାବେ ଓରେରାରେ ଯେକୌଣସି ଆର୍ଥିକ କାରବାର ହେବ ତା’ର ମଞ୍ଜୁରୀ ଓ ଯାଂଚଠୁ ଆରମ୍ଭ କରି ସବୁକିଛି ନିଷ୍ପତ୍ତି କେବଳ ଶ୍ରୀ ବେଶ୍ରା ହିଁ ନେବେ ।
ଓରେରା ସଚିବଙ୍କ ପ୍ରଶାସନିକ କ୍ଷମତାକୁ ହ୍ରାସ କରି ଶ୍ରୀ ବେଶ୍ରାଙ୍କୁ ଏସବୁ କ୍ଷମତା ନ୍ୟସ୍ତ କରିବା ପଛରେ କେଉଁ ଅଦୃଶ୍ୟ କାରଣ ରହିଛି ତାହା ଜଣାପଡ଼ିନି। ସରକାରଙ୍କ ଜାଣତରେ ଏସବୁ ହୋଇଛି ନା ନାହିଁ ତାହା ମଧ୍ୟ ସନ୍ଦେହଘେରରେ । ତେବେ ଓରେରା ଇନଚାର୍ଜ ଅଧ୍ୟକ୍ଷ ଶ୍ରୀ ପଟ୍ଟନାୟକଙ୍କ ଦସ୍ତଖତରେ ଓଏଫଏସ୍ (ଯୁଗ୍ମ ସଚିବ ପାହ୍ୟାର ଅଫିସର) ଶ୍ରୀ ବେଶ୍ରାଙ୍କୁ ଓରେରାରେ ଦରମା ଓ ପାରିଶ୍ରମିକ ପ୍ରଦାନ, ଟିଏ ବିଲ୍, ଟେଲିଫୋନ ଓ ଇଲେକ୍ଟ୍ରିସିଟି ବିଲ୍ ସହ ସମସ୍ତ ବୈଧାନିକ ବକେୟା ପ୍ରଦାନ, ଇଏମଡି ଓ ସିକ୍ୟୁରିଟି ଆଦି ଫେରସ୍ତ, ଛୋଟଛୋଟ ଖର୍ଚ୍ଚ ପାଇଁ ୫୦ହଜାର ଟଙ୍କା ପର୍ଯ୍ୟନ୍ତ ପାଣ୍ଠିର ଅନୁମୋଦନ,ଭଡ଼ା ଗାଡ଼ିର ପ୍ରାପ୍ୟ ପ୍ରଦାନ ଆଦିର ଦାୟିତ୍ୱ ନ୍ୟସ୍ତ ହୋଇଛି ।
ତେବେ ଓଡ଼ିଶା ରିଏଲ ଇଷ୍ଟେଟ ନିୟନ୍ତ୍ରକ ପ୍ରାଧିକରଣ(ଓରେରା)ରେ ଏଭଳି ବେଆଇନ ଭାବେ କନସଲଟାଣ୍ଟନିଯୁକ୍ତି, ଓରେରାର ପ୍ରଶାସନିକ ମୁଖ୍ୟ(ଓରେରା ସଚିବ)ଙ୍କ କ୍ଷମତା ହ୍ରାସ ଓ ଚୋର ହାତରେ ଚାବିକାଠି ସଦୃଶ୍ୟ ସବୁକିଛି ଦାୟିତ୍ୱ ଜଣେ ଜୁନିୟର ଅଫିସର ଉପରେ ନ୍ୟସ୍ତ କରାଯିବା ପଛରେ କେଉଁଠ ଅଦୃଶ୍ୟ କାରଣ ଓ ବାଧ୍ୟବାଧକତା ରହିଛି ତାକୁ ନେଇ ଏବେ ସାଧାରଣରେ ପ୍ରଶ୍ନ ଉଠିଛି ।