ଫାଙ୍କିଦେଲେ ମନ୍ତ୍ରୀ, କହିଲେ ‘ମୋ ସାଇକେଲ’ ସ୍କିମ୍ ସଫଳ

ଭୁବନେଶ୍ୱର(ଓଡ଼ିଶା ରିପୋର୍ଟର): ରାଜଧାନୀ ଭୁବନେଶ୍ୱରରେ ‘ମୋ ସାଇକେଲ’ ଯୋଜନାରେ ଉଦ୍ଦିଷ୍ଟ ସାଇକେଲଗୁଡ଼ିକର ରକ୍ଷଣାବେକ୍ଷଣ ଅଭାବ ଓ ଅନ୍ୟାନ୍ୟ କାରଣରୁ ସାଧାରଣ ଲୋକେ ଏହାକୁ କବାଡ଼ିଆଙ୍କୁ ବିକ୍ରି ପାଇଁ ନେଉଥିବାର ଦୃଶ୍ୟ ଗଣମାଧ୍ୟମରେ ପ୍ରସାରିତ ହୋଇଥିଲେ ମଧ୍ୟ ରାଜ୍ୟ ସରକାର ଏହାକୁ ଫାଙ୍କି ଦେଇଛନ୍ତି। ଏହି ‘ମୋ ସାଇକେଲ’ ଯୋଜନା ଲୋକଙ୍କ ଦ୍ୱାରା ଆଦୃତ ହୋଇଛି ଓ ବିଫଳ ହୋଇନି ବୋଲି ବିଧାନସଭାରେ ଆଜି ନଗର ଉନ୍ନୟନ ମନ୍ତ୍ରୀ ପ୍ରତାପ ଜେନା କହିଛନ୍ତି। ମନ୍ତ୍ରୀଙ୍କ ବିଧାନସଭାରେ ଏଭଳି ଉତ୍ତର ପରେ ‘ମୋ ସାଇକେଲ’ ଯୋଜନାର ବାସ୍ତବତା ଓ ମନ୍ତ୍ରୀଙ୍କ ବୟାନକୁ ନେଇ ଦ୍ୱନ୍ଦ୍ୱାତ୍ମକ ସ୍ଥିତି ଦେଖାଦେଇଛି।

ଆଜି ବିଧାୟକ ସୁରେଶ କୁମାର ରାଉତରାୟ ଓ ଗଣେଶ ରାମ ସିଂ ଖୁଣ୍ଟିଆଙ୍କ ପ୍ରଶ୍ନର ଲିଖିତ ଉତ୍ତର ଦେଇ ମନ୍ତ୍ରୀ ଶ୍ରୀ ଜେନା କହିଛନ୍ତି ଯେ, ଭୁବନେଶ୍ୱର ସ୍ମାର୍ଟସିଟି ମିଶନ ଏସପିଭି ଦ୍ୱାରା ୨୦୧୮ ମସିହାରେ କ୍ୟାପିଟାଲ ରିଜନ୍ ଅର୍ବାନ ଟ୍ରାନ୍ସପୋର୍ଟ(କ୍ରୁଟ) ମାଧ୍ୟମରେ ୩ଟି ସଂସ୍ଥାଠୁ ୨୫ହଜାର ଟଙ୍କା ଲେଖାଁଏ ଦରରେ ୨ହଜାରଟି ସାଇକେଲ କିଣା ଯାଇଥିଲା । ଏଥିପାଇଁ ୫କୋଟି ଟଙ୍କା ବ୍ୟୟ ହୋଇଥିଲା । ସେଥିରୁ ଏବେ ଏକହଜାର ସାଇକେଲ କାର୍ଯ୍ୟକ୍ଷମ ଥିବାବେଳେ ଅବଶିଷ୍ଟ ଏକ ହଜାର ସାଇକେଲର ରକ୍ଷଣାବେକ୍ଷଣ ତଥା ମରାମତି କାର୍ଯ୍ୟ ଚାଲିଛି । ପ୍ରକଳ୍ପଟି ଜନସାଧାରଣଙ୍କ ଦ୍ୱାରା ଆଦୃତ ହୋଇଥିବାରୁ ବିଫଳ ହେବାର ପ୍ରଶ୍ନ ଉଠୁନାହିଁ । ସାଇକେଲ ରକ୍ଷଣାବେକ୍ଷଣ ବାବଦରେ ଦୁଇଟି ସଂସ୍ଥା ମେସର୍ସ ଧରଣୀ ଏଣ୍ଟରପ୍ରାଇଜେସ୍‌(ୟାନା ସାଇକେଲ)କୁ ୨୯.୫୦ ଲକ୍ଷ ଟଙ୍କା ଏବଂ ମେସର୍ସ ୟୁଲୁ ବାଇକସ୍ ପ୍ରାଃ ଲିମିଟେଡ(ୟୁଲୁ ସାଇକେଲ)କୁ ୨୯.୫୦ଲକ୍ଷ ଟଙ୍କା ଏପର୍ଯ୍ୟନ୍ତ ପ୍ରଦାନ କରାଯାଇ ନାହିଁ। କୌଣସି ଗୋଟିଏ ବି ସାଇକେଲ ଚୋରି ହୋଇନାହିଁ। ଏପରିକି କବାଡ଼ିଆଙ୍କୁ ବିକ୍ରି କରାଯିବାର କୌଣସି ତଥ୍ୟ ମଧ୍ୟ ସରକାରଙ୍କ ହସ୍ତଗତ ହୋଇନାହିଁ ବୋଲି ମନ୍ତ୍ରୀ ଶ୍ରୀ ଜେନା କହିଛନ୍ତ ।

ସେହିପରି ୧୨୧ଟି ବସକୁ କବାଡ଼ିଆ ବାଲାଙ୍କୁ ବିକ୍ରି କରାଯିବାକୁ ନେଇ ଗଣମାଧ୍ୟମରେ ହୋଇଥିବା ଚର୍ଚ୍ଚା ହେଉଥିବାବେଳେ ମନ୍ତ୍ରୀ ମଧ୍ୟ ବିଧାୟକ ଶ୍ରୀ ଖୁଣ୍ଟିଆଙ୍କ ପ୍ରଶ୍ନର ଉତ୍ତର ଦେବାକୁ ଯାଇ ଏହାର ସ୍ପଷ୍ଟୀକରଣ ଦେଇଛନ୍ତି। ୨୦୧୦ ମସିହାରେ ଜେଏନୟୁଆରଏମ୍ ଯୋଜନାରେ ମୋଟ ୧୨୫ଖଣ୍ଡ ବସ୍ ମୋଟ ୧୬୯୯.୫୦ଲକ୍ଷ ଟଙ୍କା ବ୍ୟୟରେ କିଣାଯାଇ ସାର୍ବଜନୀନ ବ୍ୟକ୍ତିଗତ ସହଭାଗିତାରେ ଡ୍ରିମ ଟିମ୍ ସାହାରା ସଂସ୍ଥା ଦ୍ୱାରା ଚଳାଚଳ କରୁଥିଲା। ସେଥି ମଧ୍ୟରୁ ପ୍ରଯୁଜ୍ୟ ସର୍ତ୍ତାବଳୀ ଅନୁସାରେ ୧୨୧ଟି ବସର ଉଦ୍ଦିଷ୍ଟ ସମୟ ସମାପ୍ତ ହେବାପରେ ଏହାକୁ ଅନୁପଯୋଗୀ ଘୋଷଣା କରାଯାଇ ନିୟମ ଅନୁସାରେ ନିଲାମ ପ୍ରକ୍ରିୟାରେ ବିକ୍ରି କରାଯାଇଛି। ଆଉ ୪ଖଣ୍ଡ ବସକୁ ଏବେ ଟଏଲେଟ୍ ଅନ୍ ହ୍ୱିଲ୍ ଉଦ୍ଦେଶ୍ୟରେ ବ୍ୟବହାର କରାଯାଉଛି ବୋଲି ମନ୍ତ୍ରୀ ଶ୍ରୀ ଜେନା କହିଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।