ନୂଆଦିଲ୍ଲୀ: ବଲିଉଡ୍ ସୁପରଷ୍ଟାର ସଲମାନ୍ ଖାଁଙ୍କୁ ରିଓ ଅଲିମ୍ପିକ୍ ପାଇଁ ଭାରତର ସଦ୍ଭାବନା ଦୂତ କରି ସମାଲୋଚନାର ଶିକାର ହୋଇଥିବା ଭାରତୀୟ ଅଲିମ୍ପିକ୍ ସଂଘ ସଂଗୀତ ନିର୍ଦ୍ଦେଶକ ଏ.ଆର ରହମାନଙ୍କୁ ତା’ର ଚତୁର୍ଥ ସଦ୍ଭାବନା ଦୂତ କରିବାକୁ ନିଷ୍ପତ୍ତି ନେଇଛି।
ପୂର୍ବରୁ ଏହି ଲିଷ୍ଟରେ ମାଷ୍ଟରବ୍ଲାଷ୍ଟର ସଚୀନ ତେନ୍ଦୁଲକର, ବଲିଉଡ୍ ଅଭିନେତା ସଲମାନ୍ ଖାନ୍ ଓ ଅଲିମ୍ପିକ୍ରେ ସ୍ୱର୍ଣ୍ଣ ବିଜେତା ଅଭିନବ ବିନ୍ଦ୍ରା ରହିଛନ୍ତି।
ସଦ୍ଭାବନା ଦୂତ ପାଇଁ ରହମାନଙ୍କୁ ସ୍ୱାଗତ କରିବାକୁ ଯାଇ ଆଇଓଏର ସାଧାରଣ ସମ୍ପାଦକ ରାଜୀବ୍ ମେହେତା କହିଛନ୍ତି,“ରିଓ ଅଲିମ୍ପିକ୍ରେ ଭାରତ ପକ୍ଷରୁ ଏଆର ରହମାନଙ୍କୁ ସଦ୍ଭାବନା ଦୂତ ଭାବେ ମନୋନୀତ କରାଯାଇଛି। ମୁଁ ତାଙ୍କୁ ହୃଦୟର ଗଭୀର ପ୍ରଦେଶରୁ ସ୍ୱାଗତ କରୁଛି। ସେ ତାଙ୍କ ସୁମଧୁର ସ୍ୱରରେ ଅଲିମ୍ପିକ୍ ନେଇ ସଚେତନତା ସୃଷ୍ଟି କରିବେ।”
ସୂଚନାଯୋଗ୍ୟ, ଅଲିମ୍ପିକ୍ ପାଇଁ ଭାରତର ସଦ୍ଭାବନା ଦୂତ ଭାବେ ସଲମାନଙ୍କ ଖାଁଙ୍କୁ ଚୟନ କରିବା ନେଇ ଯୋଗେଶ୍ୱର ଦତ୍ତ ଓ ଉଡନ୍ତା ଶିଖ୍ ମିଲଖା ସିଂହ ଭାରତୀୟ ଅଲିମ୍ପିକ୍ ଉପରେ ଅସନ୍ତୋଷ ପ୍ରକାଶ କରିଥିଲେ।