ଏସିଆ କପ୍ ସ୍ଥଗିତ

ନୂଆଦିଲ୍ଲୀ: କରୋନା ମହାମାରୀକୁ ନଜରରେ ରଖି ଏସିଆ କପ କ୍ରିକେଟ ଟୁର୍ଣ୍ଣାମେଣ୍ଟକୁ ସ୍ଥଗିତ ରଖାଯାଇଛି। ଟୁର୍ଣ୍ଣାମେଣ୍ଟ ହେବା ନେଇ ଅନେକ କଳ୍ପନା ଜଳ୍ପନା ଚାଲିଥିବା ବେଳେ ଶେଷରେ ବିସିସିଆଇ ସଭାପତି ସୌରଭ ଗାଙ୍ଗୁଲି ଏଥିରେ ପୂର୍ଣ୍ଣଛେଦ ଟାଣିଛନ୍ତି।

କ୍ରିକେଟ ଓ୍ୱେବସାଇଟ୍ କ୍ରିକ ବଜର ସୂଚନା ଅନୁଯାୟୀ, ଗାଙ୍ଗୁଲି ଇନଷ୍ଟାଗ୍ରାମରେ ଚାଟିଂ କରିବା ବେଳେ ଏହି ସୂଚନା ଦେଇଛନ୍ତି। ସେପ୍ଟେମ୍ୱରରେ ଏସିଆ କପ୍ ହେବାର ଥିଲା। ତେବେ ଏହି ମତ ଏସିଆ କ୍ରିକେଟ କାଉନସିଲର ନିଷ୍ପତ୍ତି ନା ଆୟୋଜକ ଦେଶ ପାକିସ୍ତାନ ଏହି ନିଷ୍ପତ୍ତି ନେଇଛି ସେ ନେଇ ଅଧିକ କିଛି ସୂଚନା ଗାଙ୍ଗୁଲି ଦେଇନଥିବା ଜଣାପଡ଼ିଛି।

ସେହିପରି କ୍ରୀଡା ସାମ୍ୱାଦିକ ବିକ୍ରାନ୍ତ ଗୁପ୍ତାଙ୍କ ସହ କଥା ହେବା ବେଳେ ଦାଦା କହିଛନ୍ତି, କେବେ ଅନ୍ତର୍ଜାତୀୟ ମ୍ୟାଚ ଭାରତ ଖେଳିବ ତାହା ଏବେ କହି ହେବନି। ସ୍ଥିତି ଦେଖି ନିଷ୍ପତ୍ତି ନିଆଯିବ। ତରବରିଆ ଭାବରେ ନିଷ୍ପତ୍ତି ନେବାର କୌଣସି ଉଦ୍ଦେଶ୍ୟ ନାହିଁ ବୋଲି ଗାଙ୍ଗୁଲି କହିଛନ୍ତି।

ସେହିପରି ଆଗାମୀ ଦିନରେ ଟି-20 ବିଶ୍ୱକପ ମ୍ୟାଚ ହେବାର ଅଛି। ଅଷ୍ଟ୍ରେଲିଆରେ ଏହି ମ୍ୟାଚ ହେବ ବୋଲି ସ୍ଥିର ହୋଇଛି। ହେଲେ କରୋନା ଭୂତାଣୁ ପାଇଁ ମେଲବର୍ଣ୍ଣ ମଧ୍ୟ ଲକଡାଉନ୍ ରହିଛି। ତେଣୁ ଅକ୍ଟୋବର-ନଭେମ୍ୱରରେ ହେବାକୁ ଥିବା ଏହି ବିଶ୍ୱକପ ଆୟୋଜନ ନେଇ ଆଶଙ୍କା ସୃଷ୍ଟି ହୋଇଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।