ନୂଆଦିଲ୍ଲୀ: ମୁମ୍ବାଇରେ ଚଳିତ ମାସ ୨୨ ତାରିଖରେ ବସିବ ବିସିସିଆଇର ସ୍ୱତନ୍ତ୍ର ସାଧାରଣ ବୈଠକ(ଏସ୍ଜିଏମ୍)। ଏହି ବୈଠକରେ ବିସିସିଆଇର ନୂଆ ସଭାପତି ନିର୍ବାଚନ ନେଇ ନିଷ୍ପତ୍ତି ହେବ। ସଭାପତି ପଦବୀରୁ ଶଶାଙ୍କ ମନୋହର ଇସ୍ତଫା ଦେବା ପରେ ଏହି ପଦବୀ ଖାଲି ପଡିଛି।
ଗୋଆ କ୍ରିକେଟ ଆସୋସିଏସନର ସାଧାରଣ ସମ୍ପାଦକ ବିନୋଦ ଫାଡ୍କେ କହିଛନ୍ତି,“ମୁମ୍ବାଇରେ ଚଳିତ ମାସ ୨୨ ତାରିଖରେ ଏସ୍ଜିଏମ୍ ବୈଠକ ଅନୁଷ୍ଠିତ ହେବ। ଏଥିରେ ବିସିସିଆଇ ସଭାପତି ନିର୍ବାଚନ ମୁଖ୍ୟ ଏଜେଣ୍ଡା ରହିବ।”
ମେ’୧୦ ତାରିଖରେ ବିଶ୍ୱର ସବୁଠାରୁ ଧନୀ କ୍ରିକେଟ ବୋର୍ଡ କୁହାଯାଉଥିବା ବିସିସିଆଇର ସଭାପତି ପଦବୀରୁ ଇସ୍ତଫା ଦେଇଥିଲେ ଶଶାଙ୍କ ମନୋହର। ଏହାର ଦୁଇ ଦୁଇଦିନ ପରେ ଅର୍ଥାତ୍ ମେ’୧୨ ତାରିଖରେ ସେ ଆଇସିସିର ଅଧ୍ୟକ୍ଷ ଭାବେ ନିଯୁକ୍ତି ପାଇଥିଲେ।
ବିସିସିଆଇର ନିୟମ ଅନୁସାରେ ସଭାପତି ପଦବୀ ଖାଲି ପଡିବାର ୧୫ ଦିନ ମଧ୍ୟରେ ଏସ୍ଜିଏମ୍ ବସିବ। ଏଥିରେ ସଭାପତି ଚୟନ ନେଇ ଅଲୋଚନା ହେବ।
ମିଳିଥିବା ସୂଚନା ମୁତାବକ ଏହି ପଦବୀ ଦୌଡରେ ବିସିସିଆଇ ସଚିବ ଅନୁରାଗ ଠାକୁର, ଆଇପିଏଲ୍ ଅଧ୍ୟକ୍ଷ ରାଜୀବ ଶୁକ୍ଳା ଓ ମହାରାଷ୍ଟ୍ର କ୍ରିକେଟ ଆସୋସିଏସନ୍ର ସଭାପତି ତଥା ବିଜ୍ନେସ୍ ଟାଇକୁନ୍ ଅଜୟ ଶୀରକେ ରହିଛନ୍ତି।