ମୁମ୍ବାଇ: ପୂର୍ବତନ କ୍ରିକେଟର ସବା କରିମ୍ ବିସିସିଆଇର ଜେନେରାଲ ମ୍ୟାନେଜର (କ୍ରିକେଟ୍ ଅପରେସନ୍) ପଦବୀରୁ ଇସ୍ତଫା ଦେଇଥିବା ଜଣାପଡ଼ିଛି। ଖୁବ୍ଶୀଘ୍ର ଏନେଇ ଆନୁଷ୍ଠାନିକ ଘୋଷଣା ହୋଇପାରେ।
୨୦୧୭ ଡିସେମ୍ବରରେ ସବା କରିମ୍ ବିସିସିଆଇରେ ଯୋଗ ଦେଇଥିଲେ। ସେତେବେଳେ ରାହୁଲ ଜୋହରି ସିଇଓ ଥିଲେ। ସପ୍ତାହେ ତଳେ ବିସିସିଆଇ ଜୋହରିଙ୍କ ଇସ୍ତଫାପତ୍ର ଗ୍ରହଣ କରିବା ପରେ କରିମ୍ ଇସ୍ତଫା ଦେଇଥିବା ଖବର ଆସିଛି। ତେବେ ସବା କରିମ୍ଙ୍କ ସ୍ଥାନରେ କାହାକୁ ନିଯୁକ୍ତି ମିଳିବ, ସେ ନେଇ କିଛି ସୂଚନା ଆସିନାହିଁ।
ସୂଚନାଯୋଗ୍ୟ, ସବା କରିମ୍ ଭାରତ ପକ୍ଷରୁ ଗୋଟିଏ ଟେଷ୍ଟ୍ ମ୍ୟାଚ୍ ଖେଳିଥିବା ବେଳେ ୩୪ଟି ଦିନିକିଆ ଖେଳିଛନ୍ତି।