ମୁମ୍ବାଇ: ୱେଷ୍ଟଇଣ୍ଡିଜ ବିପକ୍ଷ ଟି-୨୦ ସିରିଜ୍ର ତୃତୀୟ ତଥା ଶେଷ ମ୍ୟାଚ୍ରେ ଖେଳିବେନି ବିରାଟ କୋହଲି ଓ ଋଷଭ ପନ୍ତ। ଶୁକ୍ରବାର ଦ୍ୱିତୀୟ ଟି-୨୦ ପରେ ଉଭୟଙ୍କୁ ବିସିସିଆଇ ବାୟୋବବଲ୍ସରୁ ଛୁଟି ଦେଇଛି। ସେମାନେ ଆଜି ସକାଳୁ ବବଲ୍ସରୁ ବାହାରି ନିଜ ନିଜ ଘରକୁ ଚାଲି ଯାଇଛନ୍ତି।
ପନ୍ତ ଓ କୋହଲିଙ୍କୁ ବିସିସିଆଇ ୧୦ ଦିନିକିଆ ଛୁଟିରେ ପଠାଇ ଥିବାରୁ ଉଭୟ ଶ୍ରୀଲଙ୍କା ବିପକ୍ଷ ଟି-୨୦ ସିରିଜ୍ ମଧ୍ୟ ଖେଳିବେ ନାହିଁ। ମାର୍ଚ୍ଚ ମାସରୁ ଆରମ୍ଭ ହେବାଥିବା ଶ୍ରୀଲଙ୍କା ବିପକ୍ଷ ଟେଷ୍ଟ ସିରିଜ୍ ବେଳେ ହିଁ ଉଭୟ ଟିମ୍କୁ କମବ୍ୟାକ୍ କରିବେ।
ଶୁକ୍ରବାର ଟି-୨୦ ମ୍ୟାଚ୍ରେ ବିରାଟ ଓ ପନ୍ତ ଅର୍ଦ୍ଧଶତକ ହାସଲ କରିଥିଲେ। ଏହି ମ୍ୟାଚ୍ରେ ଭାରତ ୧୮୬ ରନ୍ କରିଥିବା ବେଳେ ଇଣ୍ଡିଜ୍ ଟିମ୍ ୧୭୮ରେ ଅଟକି ଯାଇଥିଲା। ମ୍ୟାଚ୍ ସହ ରୋହିତ ଶର୍ମାଙ୍କ ଟିମ ଇଣ୍ଡିଆ ଟି-୨୦ ସିରିଜକୁ ଆଗୁଆ ୨-୦ରେ ଜିତି ନେଇଛି। ଆସନ୍ତାକାଲି ତୃତୀୟ ଟି-୨୦ ମ୍ୟାଚ୍ ଖେଳାଯିବ। ଭାରତ ସିରିଜ୍ ଜିତି ସାରିଥିବାରୁ ବିସିସିଆଇ ୱାର୍କଲୋଡ ହ୍ରାସ କରିବା ପାଇଁ ପନ୍ତ ଓ କୋହଲିଙ୍କୁ ଛୁଟିରେ ପଠାଇଛି।
ବିସିସିଆଇର ଜଣେ ଅଧିକାରୀ ନିଜ ନାଁ ଗୋପନ ରଖି କହିଛନ୍ତି, “ଭାରତ ସିରିଜ୍ ଜିତି ସାରିଥିବାରୁ ବିରାଟ ଓ ପନ୍ତଙ୍କୁ ଛୁଟି ମିଳିଛି। ଉଭୟ ଆଜି ସକାଳୁ ବବଲ୍ସ ଛାଡ଼ି ଘରକୁ ଯାଇଛନ୍ତି। ୱାର୍କଲୋଡ ମ୍ୟାନେଜମେଣ୍ଟ ଓ ମାନସିକ ସ୍ଥିତିରେ ସନ୍ତୁଳନ ଆଣିବାକୁ ବିସିସିଆଇ ସବୁ ଫର୍ମାଟରେ ଖେଳୁଥିବା କ୍ରିକେଟରଙ୍କୁ ନିୟମିତ ଛୁଟିରେ ଛାଡ଼ିବାକୁ ନିଷ୍ପତ୍ତି ନେଇଛି। ଏହି ନିଷ୍ପତ୍ତି ଅନୁଯାୟୀ ପନ୍ତ ଓ ବିରାଟ ଛୁଟି ପାଇଛନ୍ତି।”
ଫେବୃଆରୀ ୨୪ରୁ ଭାରତ ଓ ଶ୍ରୀଲଙ୍କା ମଧ୍ୟରେ ୩ ଟିକିଆ ଟି-୨୦ ସିରିଜ ଆରମ୍ଭ ହେବ। ପ୍ରଥମ ମ୍ୟାଚ୍ ଲକ୍ଷ୍ନୌରେ ଖେଳାଯିବାକୁ ଥିବା ବେଳେ ବାକି ୨ଟି ଯାକ ମ୍ୟାଚ୍ ଧର୍ମଶାଳାରେ ଅନୁଷ୍ଠିତ ହେବ। ଏହାପରେ ମାର୍ଚ୍ଚ ୪ରେ ପ୍ରଥମ ଟେଷ୍ଟ ଓ ମାର୍ଚ୍ଚ ୧୨ରୁ ଦ୍ୱିତୀୟ ଟେଷ୍ଟ ବେଙ୍ଗାଲୁରୁରେ ଖେଳାଯିବ।
ଶ୍ରୀଲଙ୍କା ବିପକ୍ଷ ସିରିଜରେ ଯଶପ୍ରୀତ ବୁମ୍ରା ଓ ରବୀନ୍ଦ୍ର ଜାଡେଜା ଫେରିବାର ଯଥେଷ୍ଟ ସମ୍ଭାବନା ରହିଛି। ଆଜି ହିଁ ଶ୍ରୀଲଙ୍କା ବିପକ୍ଷ ଟି-୨୦ ସିରିଜ୍ ପାଇଁ ବିସିସିଆଇ ସ୍କ୍ୱାଡ ଘୋଷଣା କରିବାର ସମ୍ଭାବନା ମଧ୍ୟ ରହିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
