କୋଲକାତା: ଆଇପିଏଲରେ ଡେଭିଡ ୱାର୍ଣ୍ଣରଙ୍କ ଜଦରଦସ୍ତ ପ୍ରତ୍ୟାବର୍ତ୍ତନ କରିଛନ୍ତି। ସନରାଇଜର୍ସ ହାଇଦ୍ରାଦାବ ପକ୍ଷରୁ ଖେଳୁଥିବା ୱାର୍ଣ୍ଣର ରବିବାର କୋଲକାତା ନାଇଟ ରାଇଡର୍ସ ବିପକ୍ଷ ମ୍ୟାଚରେ ଅର୍ଦ୍ଧଶତକ ମାରି ନିଜର ଦାବିବାର ଦେଖାଇଛନ୍ତି। ସେ ମାତ୍ର ୩୧ ବଲରେ ଆଇପିଏଲରେ ନିଜର ୩୭ତମ ଅର୍ଦ୍ଧଶତକ ହାସଲ କରିଛନ୍ତି।
ରବିବାର ଆଇପିଏଲର ଦ୍ୱିତୀୟ ମ୍ୟାଚରେ ଇଡେନ ଗାର୍ଡେନ୍ସରେ ଖେଳାଯାଉଛି। ବଲ ଟ୍ୟାମ୍ପରିଂ ଅଭିଯୋଗରେ ଦୋଷୀ ସାବ୍ୟସ୍ତ ହୋଇ ବର୍ଷକ ପାଇଁ ବାସନ୍ଦ ହୋଇଥିବା ୱାର୍ଣ୍ଣର ଗତ ବର୍ଷ ଆଇପିଏଲ ଖେଳିବାରୁ ବଞ୍ଚିତ ହୋଇଥିଲେ। କିନ୍ତୁ ଏଥର ନିଜର ପ୍ରତ୍ୟାବର୍ତ୍ତନରେ ୱାର୍ଣ୍ଣର ଧମାକା କରିଛନ୍ତି।
ତାଙ୍କ ସହ ଓପନିଂ କରିବାକୁ ଆସିଥିବା ଇଂଲିଶ ବ୍ୟାଟ୍ସମ୍ୟାନ୍ ଜନ୍ନି ବେୟାରଷ୍ଟୋ ଭଲ ବ୍ୟାଟିଂ କରିଥିଲେ ହେଁ, ବଡ଼ ସ୍କୋର କରିବାକୁ ସକ୍ଷମ ହୋଇନାହାନ୍ତି। ସୂଚନାଯୋଗ୍ୟ, ୱାର୍ଣ୍ଣରଙ୍କ ନେତୃତ୍ୱରେ ସନରାଇଜର୍ସ ହାଇଦ୍ରାଦାବ ୨୦୧୬ରେ ଟାଇଟଲ ଜିତିଥିଲା। ୨୦୧୭ ସିଜନରେ ସେ ୧୪ ମ୍ୟାଚରୁ ୬୪୧ ରନ୍ କରିଥିଲେ ।