ଦୁବାଇ: ସ୍ୱିଜରଲ୍ୟାଣ୍ଡର ରୋଜର ଫେଡେରର ଦୁବାଇ ଟେନିସ୍ ଚାମ୍ପିୟନଶିପ୍ ଟାଇଟଲ୍ ଜିତି ଆଉ ଏକ ଉପଲବ୍ଧି ନିଜ ନାମରେ କରିଛନ୍ତି । ସେ ଶନିବାର ଖେଳାଯାଇଥିବା ଫାଇନାଲରେ ଗ୍ରୀସର ଷ୍ଟିଫାନୋସ୍ ସିଟସିପାସଙ୍କୁ ହରାଇ ଏହି ଟାଇଟଲ୍ ଜିତିଛନ୍ତି । ଟେନିସ୍ ଇତିହାସର ସବୁଠାରୁ ମହାନ୍ ଖେଳାଳି ଆଖ୍ୟା ଅର୍ଜନ କରିସାରିଥିବା ଫେଡେରର ଏଥିସହ ନିଜର ସିଙ୍ଗଲ୍ସ ଟାଇଟଲ୍ ସଂଖ୍ୟା ୧୦୦ରେ ପହଞ୍ଚାଇଛନ୍ତି । ସେ ଟେନିସ୍ ଇତିହାସରେ ଦ୍ୱିତୀୟ ଖେଳାଳି ଭାବେ ସିଙ୍ଗଲ୍ସ ଟାଇଟଲ ହାସଲ କରିବାରେ ଶତକ ମାରିଛନ୍ତି ।
ବିଶ୍ୱର ୭ ନମ୍ବର ଖେଳାଳି ଫେଡେରର ଫାଇନାଲରେ ସିଟସିପାସଙ୍କୁ ୬-୪, ୬-୪ ସେଟରେ ପରାସ୍ତ କରିଛନ୍ତି । ୩୭ ବର୍ଷୀୟ ଫେଡେରରଙ୍କୁ ଏହି ମୁକାବିଲା ଜିତିବା ପାଇଁ ୬୯ ମିନିଟ୍ ସମୟ ଲାଗିଥିଲା । ସିଟସିପାସ୍ ଚଳିତ ବର୍ଷର ପ୍ରଥମ ଗ୍ରାଣ୍ଡସ୍ଲାମ୍ ଅଷ୍ଟ୍ରେଲିଆନ୍ ଓପନ୍ର ଚତୁର୍ଥ ରାଉଣ୍ଡରେ ଫେଡେରରଙ୍କୁ ହରାଇଥିଲେ, କିନ୍ତୁ ଏଥର ଫେଡେରର ତାଙ୍କୁ ଏଭଳି କୌଣସି ସୁଯୋଗ ଦେଇନାହାନ୍ତି ।
‘ସ୍ୱିସ୍ କିଙ୍ଗ’ ନାମରେ ଲୋକପ୍ରିୟ ଫେଡେରରଙ୍କ ଏହା ୧୦୦ତମ ସିଙ୍ଗଲ୍ସ ଏବଂ ମୋଟ ୧୦୮ତମ ଏଟିପି ଟାଇଟଲ୍ । ପୂର୍ବତନ ଏକ ନମ୍ବର ଖେଳାଳି ୮ ଡବଲ୍ସ ଟାଇଟଲ୍ ମଧ୍ୟ ଜିତିଛନ୍ତି । ଫେଡେରର ୨୦୦୮ରେ ଖେଳାଯାଇଥିବା ଅଲିମ୍ପିକ୍ସ ଡବଲ୍ସରେ ସ୍ୱର୍ଣ୍ଣ ପଦକ ଜିତିଥିଲେ । ତାଙ୍କ ନାମରେ ସର୍ବାଧିକ ୨୦ ଗ୍ରାଣ୍ଡସ୍ଲାମ୍ ଟାଇଟଲ୍ ଜିତିବାର ବିଶ୍ୱ ରେକର୍ଡ ମଧ୍ୟ ଅଛି ।
ଫେଡେରରଙ୍କ ବ୍ୟତୀତ ଆମେରିକାର ଜିମ୍ମି କନର୍ସ ଏକମାତ୍ର ଖେଳାଳି, ଯିଏ ୧୦୦ରୁ ଅଧିକ ସିଙ୍ଗଲ୍ସ ଟାଇଟଲ୍ ଜିତିଛନ୍ତି । ୧୯୭୨ରୁ ୧୯୭୬ ମଧ୍ୟରେ କନର୍ସ ମୋଟ ୧୦୯ ସିଙ୍ଗଲ୍ସ ଟାଇଟଲ୍ ଜିତିଥିଲେ । ଇଭାନ୍ ଲେଣ୍ଡଲ୍ (୯୪) ସର୍ବାଧିକ ଟାଇଟଲ୍ ଜିତିବାରେ ତୃତୀୟ ସ୍ଥାନରେ ରହିଥିବା ବେଳେ ସ୍ପେନର ରାଫେଲ୍ ନାଡାଲ (୮୦) ଚତୁର୍ଥ, ଜନ୍ ମ୍ୟାକ୍ଏନ୍ରୋଇ (୭୭) ପଞ୍ଚମ, ରଡ୍ ଲେଭର୍ (୭୪) ଷଷ୍ଠ ଏବଂ ନୋଭାକ୍ ଜୋକୋଭିଚ୍ (୭୩) ସପ୍ତମ ସ୍ଥାନରେ ଅଛନ୍ତି।