ଦୁବାଇ: ନ୍ୟୁଜିଲ୍ୟାଣ୍ଡ୍ ବିପକ୍ଷ ଟେଷ୍ଟ ସିରିଜ୍ ୦-୨ରେ ହାରିବା ସତ୍ତ୍ୱେ ଭାରତୀୟ ଟିମ୍ ମଙ୍ଗଳବାର ଜାରି ନୂଆ ଆଇସିସି ଟେଷ୍ଟ ରାଙ୍କିଙ୍ଗରେ ଶୀର୍ଷ ସ୍ଥାନରେ ସୁରକ୍ଷିତ ରହିଛି। ସେହିପରି ଟିମ୍ ଇଣ୍ଡିଆ କ୍ୟାପଟେନ୍ ବିରାଟ୍ କୋହଲି ବ୍ୟାଟ୍ସମ୍ୟାନଙ୍କ ତାଲିକାରେ ଦ୍ୱିତୀୟ ସ୍ଥାନରେ ରହିଛନ୍ତି। ଭାରତର ବର୍ତ୍ତମାନ ୧୧୬ ରେଟିଂ ପଏଣ୍ଟ ରହିଛି, ଯାହା ଦ୍ୱିତୀୟ ସ୍ଥାନରେ ଥିବା ନ୍ୟୁଜିଲ୍ୟାଣ୍ଡଠାରୁ ୬ ପଏଣ୍ଟ ଅଧିକ। ଅଷ୍ଟ୍ରେଲିଆ ୧୦୮ ପଏଣ୍ଟ ସହ ତୃତୀୟ ସ୍ଥାନରେ ରହିଛି। ଆଇସିସି ଟେଷ୍ଟ ଚାମ୍ପିୟନଶିପରେ ଭାରତୀୟ ଟିମ୍ ପ୍ରଥମଥର ଲାଗି କୌଣସି ସିରିଜରେ ପରାସ୍ତ ହୋଇଛି।
ନ୍ୟୁଜିଲ୍ୟାଣ୍ଡ୍ ବିପକ୍ଷ ଦୁଇମ୍ୟାଚ୍ ବିଶିଷ୍ଟ ସିରିଜର ଚାରୋଟି ଇନିଂସରେ ମାତ୍ର ୩୮ ରନ୍ କରିଥିବା କୋହଲି ନିଜର ଦ୍ୱିତୀୟ ସ୍ଥାନ ବଜାୟ ରଖିଛନ୍ତି। ସେ ସିରିଜ୍ ପୂର୍ବରୁ ରାଙ୍କିଙ୍ଗର ଶୀର୍ଷ ସ୍ଥାନରେ ଥିଲେ, କିନ୍ତୁ ପ୍ରଥମ ଟେଷ୍ଟ ପରେ ଦ୍ୱିତୀୟକୁ ଖସି ଆସିଥିବା ବେଳେ ଅଷ୍ଟ୍ରେଲିଆର ପୂର୍ବତନ କ୍ୟାପଟେନ୍ ଷ୍ଟିଭ୍ ସ୍ମିଥ୍ ଶୀର୍ଷ ସ୍ଥାନ ଦଖଲ କରିଥିଲେ। ସ୍ମିଥ୍ କୋହଲିଙ୍କଠାରୁ ୨୫ ପଏଣ୍ଟ ଆଗରେ ଅଛନ୍ତି। ନ୍ୟୁଜିଲ୍ୟାଣ୍ଡ୍ ବିପକ୍ଷ ୪ଟି ଯାକ ଇନିଂସରେ ମାତ୍ର ୯୧ ରନ୍ କରିଥିବା ଭାରତୀୟ ଭାଇସ୍-କ୍ୟାପଟେନ୍ ଆଜିଙ୍କ୍ୟ ରାହାଣେ ନବମ ସ୍ଥାନକୁ ଖସି ଆସିଛନ୍ତି।
ଅନ୍ୟପକ୍ଷରେ ନିର୍ଭରଯୋଗ୍ୟ ବ୍ୟାଟ୍ସମ୍ୟାନ୍ ଚେତେଶ୍ୱର ପୂଜାରା ଦୁଇଟି ସ୍ଥାନ ଉପରକୁ ଉଠି ସପ୍ତମରେ ପହଞ୍ଚିଛନ୍ତି। ସେ ଦ୍ୱିତୀୟ ଭାରତୀୟ ବ୍ୟାଟ୍ସମ୍ୟାନ୍ ଭାବେ ନ୍ୟୁଜିଲ୍ୟାଣ୍ଡ୍ ବିପକ୍ଷ ସିରିଜରେ ୧୦୦ ରନ୍ କରିଥିଲେ। ତାଙ୍କ ବ୍ୟତୀତ ମୟଙ୍କ ଅଗ୍ରୱାଲ୍ ଭାରତର ଟପ୍ ସ୍କୋରର ଭାବେ ୧୦୨ ରନ୍ କରିଥିଲେ। ଏହା ସତ୍ତ୍ୱେ ମୟଙ୍କଙ୍କୁ ରାଙ୍କିଙ୍ଗରେ କ୍ଷତି ହୋଇଛି। ମୟଙ୍କ ଏବେ ଟପ୍-୧୦ରେ ବାଦ୍ ପଡ଼ି ଏକାଦଶ ସ୍ଥାନକୁ ଖସି ଆସିଛନ୍ତି। ରାଙ୍କିଙ୍ଗରେ ନ୍ୟୁଜିଲ୍ୟାଣ୍ଡର ଓପନିଂ ବ୍ୟାଟ୍ସମ୍ୟାନ୍ ଟମ୍ ବ୍ଲଣ୍ଡେଲ, ଭାରତର ପୃଥ୍ୱୀ ଶ'ଙ୍କୁ ଫାଇଦା ହୋଇଛି।
ବ୍ଲଣ୍ଡେଲ୍ ୪ଟି ଯାକ ଇନିଂସରେ ଗୋଟିଏ ଅର୍ଦ୍ଧଶତକ ସହ ୧୧୭ ରନ୍ କରିଥିଲେ। ତାଙ୍କୁ ରାଙ୍କିଙ୍ଗରେ ୨୭ଟି ସ୍ଥାନର ଫାଇଦା ହୋଇଛି ଏବଂ ସେ ୪୬ତମ ସ୍ଥାନରେ ପହଞ୍ଚିଛନ୍ତି। କ୍ରାଇଷ୍ଟଚର୍ଚ୍ଚ ଟେଷ୍ଟରେ ୫୪ ରନର ଇନିଂସ୍ ଖେଳିଥିବା ପୃଥ୍ୱୀ ୧୭ଟି ସ୍ଥାନ ଉପରକୁ ଉଠି ୭୬ତମ ସ୍ଥାନରେ ପହଞ୍ଚିଯାଇଛନ୍ତି। ନ୍ୟୁଜିଲ୍ୟାଣ୍ଡ୍ କ୍ୟାପଟେନ୍ କେନ୍ ୱିଲିୟମସନଙ୍କୁ ଗୋଟିଏ ସ୍ଥାନର କ୍ଷତି ହୋଇଛି ଏବଂ ସେ ଚତୁର୍ଥକୁ ଖସି ଆସିଛନ୍ତି। ଅନ୍ୟପକ୍ଷରେ ଅଷ୍ଟ୍ରେଲିଆର ମାର୍ନସ୍ ଲାବୁଶେନ୍ ତୃତୀୟ ସ୍ଥାନକୁ ଉତ୍ତୀର୍ଣ୍ଣ ହୋଇଛନ୍ତି।
ବୋଲରଙ୍କ ରାଙ୍କିଙ୍ଗରେ ଭାରତର ଏକ ନମ୍ବର ବୋଲର ଯଶପ୍ରୀତ ବୁମ୍ରା ୪ଟି ସ୍ଥାନ ଉପରକୁ ଉଠି ଟପ୍-୧୦ରେ ପ୍ରବେଶ କରିଛନ୍ତି। ସିରିଜରେ ୬ ୱିକେଟ୍ ନେଇଥିବା ବୁମ୍ରା ସପ୍ତମ ସ୍ଥାନରେ ପହଞ୍ଚିଛନ୍ତି। ସେହିପରି କିୱି ଦଳର ପେସ୍ ବୋଲର ଟିମ୍ ସାଉଦୀଙ୍କୁ ମଧ୍ୟ ଦୁଇଟି ସ୍ଥାନର ଫାଇଦା ହୋଇଛି ଏବଂ ସେ ନୂଆ ରାଙ୍କିଙ୍ଗରେ ଚତୁର୍ଥ ସ୍ଥାନରେ ପହଞ୍ଚି ଯାଇଛନ୍ତି। ସେହିପରି ତାଙ୍କ ସାଥୀ ପେସର୍ ଟ୍ରେଣ୍ଟ ବୋଲ୍ଟ ୪ଟି ସ୍ଥାନ ଉପରକୁ ଉଠି ନବମରେ ପହଞ୍ଚିଛନ୍ତି।
ବୋଲରଙ୍କ ରାଙ୍କିଙ୍ଗରେ ଅଷ୍ଟ୍ରେଲିଆର ପ୍ୟାଟ୍ କମିନ୍ସ ୯୦୪ ପଏଣ୍ଟ ସହ ଶୀର୍ଷ ସ୍ଥାନରେ ରହିଥିବା ବେଳେ ନ୍ୟୁଜିଲ୍ୟାଣ୍ଡର ବାମହାତୀ ପେସର ନିଲ୍ ୱାଗନର ୮୪୩ ପଏଣ୍ଟ ସହ ଦ୍ୱିତୀୟ ଏବଂ ୱେଷ୍ଟଇଣ୍ଡିଜର ଜେସନ୍ ହୋଲ୍ଡର ତୃତୀୟ ସ୍ଥାନରେ ବଳବତ୍ତର ରହିଛନ୍ତି। ଅଲରାଉଣ୍ଡରଙ୍କ ତାଲିକାରେ ରବୀନ୍ଦ୍ର ଜାଡେଜା ଓ ରବିଚନ୍ଦ୍ରନ୍ ଅଶ୍ୱିନ୍ ଯଥାକ୍ରମେ ତୃତୀୟ ଓ ପଞ୍ଚମ ସ୍ଥାନରେ ରହିଛନ୍ତି।