ଲୁଧିଆନା: ଚଳିତ ୭୩ତମ ଜାତୀୟ ଫୁଟବଲ ଚାମ୍ପିଅନଶିପ ସନ୍ତୋଷ ଟ୍ରଫିର ଫାଇନାଲ୍ ରାଉଣ୍ଡରେ ଓଡ଼ିଶା କ୍ରମାଗତ ଦ୍ୱିତୀୟ ମ୍ୟାଚରେ ପରାସ୍ତ ହୋଇଛି। ଶୁକ୍ରବାର ଓଡ଼ିଶା ତା'ର ଦ୍ୱିତୀୟ ମ୍ୟାଚରେ ସର୍ଭିସେସ ନିକଟରୁ ୦-୨ ଗୋଲରେ ପରାସ୍ତ ହୋଇଛି। ଏହା ପୂର୍ବରୁ ଓଡ଼ିଶା ତା'ର ପ୍ରଥମ ମୁକାବିଲାରେ ମେଘାଳୟଠାରୁ ୨-୩ ଗୋଲରେ ପରାସ୍ତ ହୋଇଥିଲା।
ଆଜି ଖେଳାଯାଇଥିବା ମ୍ୟାଚରେ ଓଡ଼ିଶା ନୈରାଶ୍ୟଜନକ ପ୍ରଦର୍ଶନ କରିଥିଲା। ମ୍ୟାଚର ପ୍ରଥମାର୍ଦ୍ଧ ସଂଘର୍ଷପୂର୍ଣ୍ଣ ହୋଇଥିଲା, ଯେଉଁଥିରେ କେହିକାହାରିକୁ ଗୋଲ୍ ଦେଇପାରିନଥିଲେ। ଦ୍ୱିତୀୟାର୍ଦ୍ଧ ଆରମ୍ଭରୁ ମଧ୍ୟ ଉଭୟ ଦଳ ମଧ୍ୟରେ ଜୋରଦାର ଟକ୍କର ଦେଖିବାକୁ ମିଳିଥିଲା।
ତେବେ ୭୨ତମ ମିନିଟରେ ସର୍ଭିସେସକୁ ପେନାଲ୍ଟି ମିଳିଥିଲା, ଯାହାକୁ ଏନ୍. ସୁରେଶ ମୈତି ଗୋଲରେ ପରିଣତ କରି ନିଜ ଦଳକୁ ୧-୦ରେ ଆଗୁଆ କରାଇଥିଲେ। ଏହା ପରେ ୮୭ତମ ମିନିଟରେ ହରିକ୍ରିଷ୍ଣା ସର୍ଭିସେସ୍ ପାଇଁ ଦ୍ୱିତୀୟ ଗୋଲ୍ ସ୍କୋର କରିଥିଲେ। ଏଥିସହ ସର୍ଭିସେସ୍ ମ୍ୟାଚକୁ ୨-୦ ଗୋଲରେ ଜିତିନେଇଥିଲା। ଆସନ୍ତା ୧୪ ତାରିଖରେ ଓଡ଼ିଶା ପରବର୍ତ୍ତୀ ମ୍ୟାଚରେ ଗୋଆକୁ ଭେଟିବ।