ଭଦୋଦରା: ଚଳିତ ବିଜୟ ହଜାରେ ଟ୍ରଫିରେ ଓଡ଼ିଶା ତା'ର ତୃତୀୟ ମ୍ୟାଚରେ ପଞ୍ଜାବକୁ ଭେଟିବାର ଥିଲା, କିନ୍ତୁ ଏହି ମ୍ୟାଚକୁ ବର୍ଷା ଧୋଇ ଦେଇଛି। ମ୍ୟାଚ୍ ବାତିଲ ହେବା ଦ୍ୱାରା ଉଭୟ ଓଡ଼ିଶା ଓ ପଞ୍ଜାବ ଟିମ୍ ପଏଣ୍ଟ ଭାଗ କରିଛନ୍ତି। ଏହାକୁ ମିଶାଇ ଚଳିତ ଟୁର୍ଣ୍ଣାମେଣ୍ଟରେ ଓଡ଼ିଶାର ଦୁଇଟି ମ୍ୟାଚ୍ ବାତିଲ ହୋଇଛି।
ଏହା ପୂର୍ବରୁ ଓଡ଼ିଶା ତା'ର ପ୍ରଥମ ମ୍ୟାଚରେ ବରୋଦା ସହ ମଧ୍ୟ ପଏଣ୍ଟ ଭାଗ କରିଥିଲା। କିନ୍ତୁ ବୁଧବାର ଓଡ଼ିଶା ଦ୍ୱିତୀୟ ମ୍ୟାଚରେ ହିମାଚଳ ପ୍ରଦେଶକୁ ୩ ରନରେ ହରାଇ ରୋମାଞ୍ଚକର ବିଜୟ ହାସଲ କରିଥିଲା। ବର୍ଷା ଯୋଗୁ ଏହି ମ୍ୟାଚ୍ ୨୧ ଓଭର ବିଶିଷ୍ଟ କରାଯାଇଥିଲା, ଯେଉଁଥିରେ ଓଡ଼ିଶା ୮ ୱିକେଟ୍ ହରାଇ ୧୪୫ ରନ୍ କରିଥିଲା।
ଜବାବରେ ହିମାଚଳ ପ୍ରଦେଶ ୯ ୱିକେଟ୍ ବିନିମୟରେ ୧୪୨ ରନ୍ କରିବାକୁ ସକ୍ଷମ ହୋଇଥିଲା। ଏବେ ଓଡ଼ିଶା ଏଲିଟ୍ ଗ୍ରୁପ୍-ବି'ରେ ୩ଟି ମ୍ୟାଚରୁ ମୋଟ ୮ ପଏଣ୍ଟ ପାଇଁ ଶୀର୍ଷରେ ରହିଛି। ଆସନ୍ତାକାଲି ଓଡ଼ିଶା ତା'ର ପରବର୍ତ୍ତୀ ମୁକାବିଲାରେ ହରିଆଣାକୁ ଭେଟିବ।