ନୂଆଦିଲ୍ଲୀ: ବୁଧବାର ଦକ୍ଷିଣ ଆଫ୍ରିକା ବିପକ୍ଷ ପ୍ରଥମ ଟେଷ୍ଟରେ ଶତକୀୟ ଇନିଂସ୍ ଖେଳିଥିବା ରୋହିତ୍ ଶର୍ମା ଏକ ନୂଆ ରେକର୍ଡର ଅଧିକାରୀ ହୋଇଛନ୍ତି। ଏହି ଶତକ ସହ ଭାରତ ମାଟିରେ ରୋହିତଙ୍କର ବ୍ୟାଟିଂ ଆଭରେଜ୍ ୯୮.୨୨ ହୋଇଛି। ସେ ଭାରତରେ ଖେଳିଥିବା ୧୫ ଇନିଂସରୁ ଏପର୍ଯ୍ୟନ୍ତ ୮୮୪ ରନ୍ କରିଛନ୍ତି।
ସେ ଭାରତରେ ୪ ଶତକ ଓ ୫ ଅର୍ଦ୍ଧଶତକ ମାରିଛନ୍ତି। ତାଙ୍କର ଏହି ଆଭରେଜ୍ ୧୦ରୁ ଅଧିକ ଇନିଂସ୍ ଖେଳିଥିବା ସବୁ ବ୍ୟାଟ୍ସମ୍ୟାନଙ୍କ ମଧ୍ୟରୁ ଯୁଗ୍ମ ଭାବେ ସର୍ବାଧିକ। ରୋହିତ୍ ଏବେ କିମ୍ବଦନ୍ତୀ ସାର୍ ଡନ୍ ବ୍ରାଡମ୍ୟାନଙ୍କ ସମକକ୍ଷ ହୋଇଛନ୍ତି, ଯିଏ ୫୦ ଇନିଂସରେ ୯୮.୨୨ ହାରରେ ୪୩୨୨ ରନ୍ କରିଥିଲେ।
ତେବେ ରୋହିତ୍ ଏହି ରେକର୍ଡକୁ ବଜାୟ ରଖିପାରୁଛନ୍ତି କି ନାହିଁ, ତାହା ଆଗାମୀ ଦିନରେ ଜଣାପଡ଼ିବ। ଆଜିର ଶତକକୁ ମିଶାଇ ରୋହିତ୍ ଟେଷ୍ଟ କ୍ରିକେଟରେ ୧୭୦୦ ରନ୍ ପୂରଣ କରିଛନ୍ତି। ହେଲେ ଭାରତ ବାହାରେ ଅର୍ଥାତ୍ ବିଦେଶରେ ରୋହିତ୍ ୩୩ ଇନିଂସରେ ମାତ୍ର ୮୧୬ ରନ୍ କରିଛନ୍ତି, ଯେଉଁଥିରେ ୫ ଅର୍ଦ୍ଧଶତକ ସାମିଲ୍ ଅଛି।