ବେଙ୍ଗାଲୁରୁ: ଟିମ୍ ଇଣ୍ଡିଆ ଭାଇସ୍ କ୍ୟାପଟେନ୍ ରୋହିତ୍ ଶର୍ମା ଟି-୨୦ କ୍ରିକେଟରେ ନୂଆ ରେକର୍ଡ କରିଛନ୍ତି। ଦକ୍ଷିଣ ଆଫ୍ରିକା ବିପକ୍ଷ ତୃତୀୟ ଟି-୨୦ ଖେଳିବାକୁ ଓହ୍ଲାଇବା ମାତ୍ରକେ ନୂଆ ଉପଲବ୍ଧି ନିଜ ନାଁରେ କରିଛନ୍ତି। ରୋହିତ୍ ଏହି ମ୍ୟାଚରେ ମାତ୍ର ୯ ରନ୍ କରି ଆଉଟ୍ ହୋଇଛନ୍ତି।
ରୋହିତ୍ ଭାରତ ପକ୍ଷରୁ ସର୍ବାଧିକ ଟି-୨୦ ଅନ୍ତର୍ଜାତୀୟ ମ୍ୟାଚ୍ ଖେଳିବାରେ ମହେନ୍ଦ୍ର ସିଂହ ଧୋନିଙ୍କ ସମକକ୍ଷ ହୋଇଛନ୍ତି। ରୋହିତଙ୍କର ଏହା ୯୮ତମ ଟି-୨୦ ମ୍ୟାଚ୍ । ରୋହିତ୍ ଏହା ପୂର୍ବରୁ ୯୭ ମ୍ୟାଚରେ ୨୪୩୪ ରନ୍ କରିଥିଲେ। ଅନ୍ୟପକ୍ଷରେ ୱିକେଟକିପର ବ୍ୟାଟ୍ସମ୍ୟାନ୍ ଧୋନିଙ୍କ ନାଁରେ ୧୬୧୭ ରନ୍ ରହିଛି । ଧୋନି ୨୦୧୯ ବିଶ୍ୱକପ୍ ସେମିଫାଇନାଲ୍ ପରେ ଅନ୍ତର୍ଜାତୀୟ କ୍ରିକେଟରୁ ବ୍ରେକ୍ ନେଇଛନ୍ତି।
ସର୍ବାଧିକ ଟି-୨୦ ମ୍ୟାଚ୍ ଖେଳିବା ମାମଲାରେ ପାକିସ୍ତାନର ଶୋଏବ ମଲିକ୍ ଆଗରେ ଅଛନ୍ତି। ସେ ଆଇସିସି ଏବଂ ପାକିସ୍ତାନ ପକ୍ଷରୁ ୧୧୧ ଟି-୨୦ ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି। ପାକିସ୍ତାନର ଅନ୍ୟତମ ଖେଳାଳି ଶାହିଦ୍ ଆଫ୍ରିଦି ୯୯ ମ୍ୟାଚ୍ ଖେଳି ଦ୍ୱିତୀୟରେ ଅଛନ୍ତି।
ଭାରତ ପକ୍ଷରୁ ସର୍ବାଧିକ ଟି-୨୦ ମ୍ୟାଚ୍ ଖେଳିବାରେ ସୁରେଶ ରାଇନା ଦ୍ୱିତୀୟ ସ୍ଥାନରେ ଅଛନ୍ତି। ସେ ୭୮ ମ୍ୟାଚ୍ ଖେଳିଥିବା ବେଳେ କ୍ୟାପଟେନ୍ ବିରାଟ୍ କୋହଲି ୭୨ ମ୍ୟାଚ୍ ଖେଳିଛନ୍ତି। ସେହିପରି ଯୁବରାଜ ସିଂହ ୫୮ ଏବଂ ଶିଖର ଧୱନ୍ ୫୫ ମ୍ୟାଚ୍ ଖେଳିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
