କଲମ୍ବୋ: ଶ୍ରୀଲଙ୍କା ଟେଷ୍ଟ କ୍ୟାପଟେନ୍ ଦିମୁତ କରୁଣାରତ୍ନେଙ୍କୁ ରବିବାର ସକାଳେ କଲମ୍ବୋରେ ମଦ୍ୟପାନ କରି ଗାଡି ଚଳାଇବା ଓ ଅନ୍ୟ ଏକ ଗାଡିକୁ ଧକ୍କା ଦେବା ମାମଲାରେ ଗିରଫ କରାଯାଇଛି। ପୁଲିସ ପକ୍ଷରୁ ଜାରି ସୂଚନା ଅନୁଯାୟୀ, ଏହି ଶ୍ରୀଲଙ୍କା କ୍ରିକେଟର ଜଣକ ଏକ ତିନିଚକିଆ ଗାଡ଼ିକୁ ଧକ୍କା ଦେଇଥିଲେ, ଯେଉଁ କାରଣରୁ ଗାଡିର ଡ୍ରାଇଭର ଆହତ ହୋଇ ହସ୍ପିଟାଲରେ ଭର୍ତ୍ତି ହୋଇଛନ୍ତି।
ତେବେ ଉକ୍ତ ଡ୍ରାଇଭର ଜଣକ ଗୁରୁତର ଆହତ ହୋଇନଥିବା ପୁଲିସ ପକ୍ଷରୁ କୁହାଯାଇଛି। ଦୁର୍ଘଟଣା ସମୟରେ କରୁଣାରତ୍ନେ ମଦ୍ୟପାନ କରିଥିଲେ। ଗିରଫ ପରେ କରୁଣାରତ୍ନେଙ୍କୁ ତୁରନ୍ତ ଜାମିନ୍ ମିଳିଯାଇଥିଲା। ଏହି ମାମଲାରେ କରୁଣାରତ୍ନେଙ୍କୁ ଚଳିତ ସପ୍ତାହରେ କୋର୍ଟରେ ହାଜିର ହେବାକୁ ପଡ଼ିବ। ଦୁର୍ଘଟଣାରେ ଗାଡି ଚାଳକଙ୍କୁ କୌଣସି ଆଘାତ ଲାଗିନାହିଁ ସତ, କିନ୍ତୁ ଶ୍ରୀଲଙ୍କାର ଏହି କ୍ରିକେଟରଙ୍କ କ୍ୟାରିୟର ଏବେ ବିପଦରେ ପଡ଼ିପାରେ।
ଆଗାମୀ ଦିନରେ ଶ୍ରୀଲଙ୍କା କ୍ରିକେଟ ବୋର୍ଡ ତାଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନେଇପାରେ ବୋଲି ସୂଚନା ମିଳିଛି। କରୁଣାରତ୍ନେଙ୍କ ନେତୃତ୍ୱରେ ଶ୍ରୀଲଙ୍କା କ୍ରିକେଟ ଟିମ ଦକ୍ଷିଣ ଆଫ୍ରିକାରେ ଟେଷ୍ଟ ସିରିଜ୍ ଜିତିଥିଲା। ଏହି ସଫଳତା କାରଣରୁ ଆସନ୍ତା ମେ' ୩୦ ତାରିଖରୁ ଇଂଲଣ୍ଡରେ ହେବାକୁଥିବା ବିଶ୍ୱକପ୍ ପାଇଁ ତାଙ୍କୁ ଦଳର କ୍ୟାପଟେନ୍ କରାଯିବା ନେଇ ଚର୍ଚ୍ଚା ମଧ୍ୟ ଚାଲିଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
