ନୂଆଦିଲ୍ଲୀ: ବିଦର୍ଭ ପକ୍ଷରୁ ଖେଳୁଥିବା ଯୁବ ତାରକା ଅକ୍ଷୟ କରନେୱର ପୁଣିଥରେ ଚର୍ଚ୍ଚାକୁ ଆସିଛନ୍ତି। ସେ ଏବେ ଅବଶିଷ୍ଟ ଭାରତ ବିପକ୍ଷରେ ଇରାନୀ କପ୍ ଖେଳୁଥିବା ବେଳେ ନିଜ ବୋଲିଂକୁ ନେଇ ସମସ୍ତଙ୍କୁ ଚକିତ କରିଛନ୍ତି। ଅକ୍ଷୟ ଇରନୀ କପ୍ରେ ଉଭୟ ବାମହାତ ଓ ଡାହାଣ ହାତରେ ବୋଲିଂ କରି ପ୍ରତିପକ୍ଷ ଖେଳାଳିଙ୍କୁ ଅଡ଼ୁଆରେ ପକାଇଛନ୍ତି। ଅବଶିଷ୍ଟ ଭାରତ ବିପକ୍ଷରେ ଅକ୍ଷୟ ପ୍ରଥମେ ବାମ ହାତରେ ବୋଲିଂ କରୁଥିଲେ।
ଏହାପରେ ସେ ହଠାତ୍ ଅମ୍ପାୟାରଙ୍କୁ ଡାହଣ ହାତରେ ବୋଲିଂ କରିବେ ବୋଲି ସୂଚନା ଦେଇଥିଲେ। ଅମ୍ପାୟାର ମଧ୍ୟ ଏକଥା ଶୁଣି ଆଶ୍ଚର୍ଯ୍ୟ ହୋଇଯାଇଥିଲେ। କିନ୍ତୁ ଅକ୍ଷୟ ଡାହାଣ ହାତରେ ବୋଲିଂ କରିବା ଆରମ୍ଭ କରିଥିଲେ।
ପ୍ରଥମେ ବାମ ହାତରେ ବୋଲିଂ କରୁଥିବା ଅକ୍ଷୟ ଅବଶିଷ୍ଟ ଭାରତର ଶ୍ରେୟସ ଆୟର(୧୯)ଙ୍କୁ ଆଉଟ୍ କରିଥିଲେ। ଏହାପରେ ବ୍ୟାଟିଂ କରିବାକୁ ଆସିଥିବା ଈଶାନ କିଷନଙ୍କୁ ଡାହଣ ହାତରେ ବୋଲିଂ କରିଥିଲେ। ଇରାନୀ କପ୍ର ପ୍ରଥମ ଇନିଂସ୍ରେ ୨୬ ବର୍ଷୀୟ ଅକ୍ଷୟ ୧୫ ଓଭର୍ରେ ୫୦ ରନ୍ ଦେଇ ଗୋଟିଏ ୱିକେଟ୍ ପାଇଛନ୍ତି। ଅବଶିଷ୍ଟ ଭାରତ ୩୩୦ ରନ୍ରେ ସୀମିତ ରହିଥିଲା।
ଡୋମେଷ୍ଟିକ ସ୍ତରରେ ଅକ୍ଷୟଙ୍କ ଏହି ନିଆରା ଶୈଳୀ ସମ୍ପର୍କରେ ସମସ୍ତେ ଜାଣିଛନ୍ତି। ପ୍ରଥମଥର ୨୦୧୬ ସୟିଦ ମୁସ୍ତାକ ଅଲୀ ଟ୍ରଫିରେ ଅକ୍ଷୟ ଏହି ଜଲୱା ଦେଖାଇଥିଲେ।