ବିଶ୍ୱକପ ମୁକୁଟ ପାଇଁ ଚାଲିଛି ଲଢ଼େଇ: ୪ର୍ଥ ଥର ପାଇଁ ଟାଇଟଲ୍‌ କବ୍‌ଜା କରିବାକୁ ଟିମ୍‌ ଇଣ୍ଡିଆର ଲକ୍ଷ୍ୟ

ଭୁବନେଶ୍ୱର(ଓଡ଼ିଶା ରିପୋର୍ଟର): ୧୯ ବର୍ଷରୁ କମ୍‌ ବିଶ୍ୱକପ କ୍ରିକେଟ୍‌ ଫାଇନାଲ ମ୍ୟାଚ୍‌ ନ୍ୟୁଜିଲାଣ୍ଡର ମାଉଣ୍ଟ ମୌଙ୍ଗାନୁଇରେ ଖେଳାଯାଉଛି। ଦୁଇ ଶକ୍ତିଶାଳୀ ଦଳ ଭାରତ ଓ ଅଷ୍ଟ୍ରେଲିଆ ମଧ୍ୟରେ ଚାଲିଛି କଡ଼ା ମୁକାବିଲା। କଂଗାରୁ ଦଳ ଟସ୍  ଜିତି ପ୍ରଥମେ ବ୍ୟାଟିଂ କରୁଛି। ଶେଷ ଖବର ସୁଦ୍ଧା ଅଷ୍ଟ୍ରେଲିଆ ୪ ୱିକେଟ୍‌ ହରାଇ କରିଛି ୧୬୩ ରନ୍‌। ଭାରତର ଇଶାନ ପୋରେଲଙ୍କୁ ୨ଟି ୱିକେଟ ମିଳିଥିବାବେଳେ କମଲେଶ ନଂଗରକୋଟି ଓ ଅନୁକୁଲ ରୟଙ୍କୁ ଗୋଟିଏ ଲେଖାଏଁ ୱିକେଟ୍‌ ମିଳିଛି। ଟୁର୍ଣ୍ଣାମେଣ୍ଟରେ ଫୁଲ୍‌ ଫର୍ମରେ ଥିବା ଭାରତୀୟ ଯୁବ ଦଳ ଟାଇଟଲ ହାତେଇବା ଲକ୍ଷ୍ୟରେ ରହିଛି। ଏହା ପୂର୍ବରୁ ଗ୍ରୁପ୍ ଷ୍ଟେଜର ପ୍ରଥମ ମ୍ୟାଚରେ ଅଷ୍ଟ୍ରେଲିଆକୁ ୧୦୦ ରନରେ ହରାଇ ସାରିଥିବା ଟିମ୍ ଇଣ୍ଡିଆର ପଲା ଭାରି ରହିଛି।  ଦଳର ଉଭୟ ବ୍ୟାଟ୍ସମ୍ୟାନ ଓ ବୋଲର୍ ଆକର୍ଷଣୀୟ ଫର୍ମରେ ଅଛନ୍ତି। ୧୯ ବର୍ଷରୁ କମ୍ ବିଶ୍ୱକପରେ ଭାରତ ଓ ଅଷ୍ଟ୍ରେଲିଆ ମଧ୍ୟରେ ୫ଟି ମ୍ୟାଚ ଖେଳାଯାଇଛି। ଏଥିରୁ ଭାରତ ୩ଟିରେ ଜିତିଥିବା ବେଳେ ୨ଟିରେ ଅଷ୍ଟ୍ରେଲିଆ ବିଜୟୀ ହୋଇଛି।