ଆମ୍ୱୁଲାନ୍ସ ଆସିଲାନି: ଗର୍ଭବତୀଙ୍କୁ ଟେକି ଟେକି ନେଲେ ୩ କିଲୋମିଟର

ନବରଙ୍ଗପୁର: ପୁଣି ଧୋକା ଦେଲା ୧୦୮ ଆମ୍ବୁଲାନ୍ସ। ବାରମ୍ବାର ଫୋନ୍ ସତ୍ତ୍ୱେ ୧୦୮ ‌ଆମ୍ବୁଲାନ୍ସ ନ ଆସିବାରୁ ୩ କିଲୋମିଟର ପର୍ଯ୍ୟନ୍ତ ବୁହା ହୋଇ ଗଲେ ଗର୍ଭବତୀ ମହିଳା। ଏମିତି ହୃଦୟ ବିଦାରକ ଦୃଶ୍ୟ ଦେଖିବାକୁ ମିଳିଛି ନବଙ୍ଗପୁର ଜିଲ୍ଲାର ରାମପାରା ଗାଁରେ। ଅଭିଯୋଗ ଅନୁସାରେ ଗତକାଲି ପୂର୍ବାହ୍ନରେ ଡମଣୀ ଗଣ୍ଡଙ୍କ ପ୍ରସବ ଯନ୍ତ୍ରଣା ହୋଇଥିଲା। ଏନେଇ ପରିବାର ଲୋକେ ୧୦୮ ଓ ୧୦୨ ଆମ୍ବୁଲାନ୍ସ ଗାଡ଼ିକୁ ଫୋନ କରିଥିଲେ।

ହେଲେ ଗାଡି ନ ପହଞ୍ଚିବାରୁ ଘରୁ ୩ କିଲୋମିଟର ପର୍ଯ୍ୟନ୍ତ ମହିଳାଙ୍କୁ ହାତରେ ବୋହି ନେଲେ ପରିବାର ଲୋକେ। ସେଠାରୁ ଏକ ଘରୋଇ ଗାଡ଼ି ଭଡ଼ା କରି ଉମରକୋଟ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ନେଇଥିଲେ। ସେଠାରେ ତାଙ୍କର ଏକ ଶିଶୁପୁତ୍ର ଜନ୍ମ ହୋଇଥିଲା। ବର୍ତ୍ତମାନ ଉଭୟ ମା’ ଓ ପୁଅ ସୁସ୍ଥ ଥିବା ଡାକ୍ତର କହିଛନ୍ତି।